Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Gbl 4. 32-34, 39-40
Kơnràñ tờm gơ̆s Yàng, ờ geh Yàng lơi ndai tai.
Đăl tam sră Gùng-boh-lăm dê
Tŭ hơ̆, Moise đơ̆s mơ làng-bol be do: Bol mê jòi wă tĕ ală rơnàng yau òr, bơh tŭ Yàng klăc-mòn kòn-bơnŭs hơ đăng măt ù, bơh jơng trồ do tŭs jơng trồ ne, geh tŭ lơi gơlĭk gơ̆s dùl broă dờng-rơyŭ be do sơl ờ ? Geh tŭ lơi cau neh kơno ală broă krơi-sơrbơi be hơ̆ sơl ờ ? Geh tŭ lơi dùl làng-bol neh kơno bơr Yàng đơ̆s bơh tam ồs be bol mê neh kơno mơ găm kĭs sơl ờ ? Geh tŭ lơi Kơnràñ neh ngui bơta tơlòng, tềl-sơnđio, broă gơnrơh, gơtoă-kơlìn, tê pràn-gơnoăr, mơ ală bơta gơ tơnggŏ cù-kìr, làng săc-rơwăh wơl he in dùl làng-bol tam gùl ală làng-bol ndai, be Kơnràñ gơ̆s Yàng bol mê neh lơh jơh ală broă hơ̆ dơ đăp măt bol mê tam lơgăr Ejypto sơl ờ ? Be hơ̆, ngai do bol mê đăl-gĭt mơ kơlôi-sơnơng tĕ tam nùs be do: Hơ đăng trồ mơ tam tiah, Kơnràñ tờm gơ̆s Yàng, ờ geh Yàng lơi ndai tai. Dờn-prăp tĕ ală gùng-boh-lăm mơ jơnau-sồr, mơ ngai do añ tờm yăl-bơto bol mê in, làng bol mê in mơ kòn sau hìngnau in geh bơtoăh, mơ găm wơl hơ đăng bơnah ù mơ Kơnràñ gơ̆s Yàng rơ̆p pà bol mê in.
Hơ̆ jơnau đơ̆s Kơnràñ dê.
Nrĭ-nrềng: 32. 4-5, 6 mơ 9, 18-19, 20 mơ 22
Hw: Bơtoăh làng-bol lơi mơ Kơnràñ rơwăh gơ̆s jơtài.
Bơh bơr Kơnràñ gơ̆s bơr ngăn-ngồn, ală broă Khai lơh pal pin-kơnờm lơm. Khai gơboh mơ bơta song-dơpă, plai ù bềng bơta hànggoh Khai dê. Hw
Bơh bơr Kơnràñ mơ trồ geh crơnggơ̆s, mơ ală mpồl pràn gơ dê bơh nhơm bơr Khai dê. Bơh Khai tờm yăl-bơto, mơ bol gơ geh crơnggơ̆s, Khai tờm yăl-sồr mơ bol gơ gơjềng gơ̆s. Hw
Ne, Kơnràñ wèt măt sền ală cau duh-ngòt Khai, rơmê sền ală cau lơi gơn-kơnờm dơ bơta hànggoh Khai dê, làng klàs bol khai bơh tê huềng-chơ̆t, mơ siăm-ròng bol khai tam bơta rơbah-dồn. Hw
Sồp-soàn hi kơ̆p-càng Đi, Đi tờm gơ̆s Bơtau dong-kờl mơ pơgàng hi. Ơ Kơnràñ, dăn tuh nùs tơpă-tơpài tam hi, khăt gơ jăt be hi pin-kơnờm dơ Đi. Hw
Bơta đăl bàr: Rm 8. 14-17
Oh mi neh wă-rò nhơm-nùs kòn-dờp, tam nhơm-nùs hơ̆, he driau be do: Abba, ơ Bàp.
Đăl tam sră Paulo, cau Dờp-pơyoa bơtoăh, pơyoa bol Roma in.
Ơ oh mi kờñ-gơboh, cau lơi kĭs jăt Yàng Nhơm Yàng dê, gen gơ̆s oh kòn yàng. Bơh ờ di oh mi neh wă-rò nhơm-nùs dĭ-gơna tam bơta ngòt-rơngơ̆t taih, mơya neh wă-rò nhơm-nùs kòn-dờp, tam nhơm-nùs hơ̆, he driau be do: Abba, ơ Bàp. Bơh Yàng Nhơm tờm neh lơh cơng bồ-tồr he in be do: He gơ̆s oh kòn Yàng dê. Be hơ̆, dilah gơ̆s oh kòn, gen krung gơ̆s ală cau pơdờn, kờñ đơ̆s bơta pơdờn Yàng dê, mơ gơ̆s bơta pơdờn bal mơ Kristo, bơh he kong bal bơta jê-yăn mơ Khai, làng krung dờp bơta gơklŏ bal mơ Khai sơl.
Hơ̆ jơnau đơ̆s Kơnràñ dê.
ALLELUIA:
Alleluia, Alleluia. Gơklŏ Yàng Bàp mơ Yàng Kòn mơ Yàng Nhơm. Gơklŏ Yàng Tờm găm gơ̆s, neh gơ̆s, mơ rơ̆p tŭs. Alleluia.
Jơnau Yălniăm: Mt 28. 16-20
Pơnđum bol khai bơh sơnđăn Yàng bàp mơ Yàng Kòn mơ Yàng Nhơm.
Bơta pơndŭt Jơnau Yălniăm niămgoh jăt Mattheo.
Tŭ hơ̆, jơ̆t dùl nă cau jăt-dờn lòt hơ Galilea, tŭs hơ bơnơm Kơnràñ Jesu neh sồr bol khai, tŭ gŏ Kơnràñ, bol khai cùn-khoai; mơya geh bol bà pin wi-wơ. Kơnràñ Jesu tŭs rềp, đơ̆s mơ bol khai: “Jơh ală gơnoăr tam trồ mơ tam tiah neh geh jào Añ in. Be hơ̆, bol kòn lòt bơto tĕ jơh ală làng-bol, pơnđum bol khai bơh sơnđăn Yàng Bàp mơ Yàng Kòn mơ Yàng Nhơm, bơto bol khai prăp jơh ală jơnau Añ neh sồr bol kòn. Mơ do, Añ ơm bal mơ bol kòn tam jơh ală ngai tŭs lồi dŭt dunia.”
Hơ̆ jơnau đơ̆s Kơnràñ dê.
