Phàm Nă Cau Prum Lòt Jòi Che Riah

LỒC DÀ KOÊ DỀT

Tŭ lồc tih dà dờng ngăn, sơnđăn dà kơ Ềt, geh phàm nă cau Prum lòt jòi che riah, lời kơt rơpu. Tus tam brê bol khai jòi riah, bol khai ơm rơlô bal dùl êt, lồc gen lòt jòi che. Tŭ lòâc geh che riah bol khai rê.

Tam tŭ bol khai rê bol khi tìp mơ dùl nơm bơya dờng ngăn gơ ờ gŏ chài rê, kơyoa dà kơ ềt neh soăt rau. Bơya kòl tam dùl koăt dờng ngăn. Gen dàng gơ sồr bol khai hoài mơ che tơ ngko lời rê tai wơl tai tam dà lềng, kơyoa dà lềâng rềp mơ brê gen. Gơ lah bol khai in: Ơ bol gen, añ khoai bol mê, dăn sơnđàc hoài añ tơ hìu kòn bau añ, kơyoa añ ờ gŏ chài lòt, dà soăt rau. Bol cau gen wơl hơ: ờ bol hi bài, sơlơh mong hoài tơ ngko, jê ragơ! Dilah bol hi hoài, mê gơjềng sồt, gơdê wàih ơ! Bơya tai lah bol khai in: dilah sồt, phi gơ. Añ ờ lah bol mê; ờ gŏ sa bol mê ya; añ kờñ đau rê tus tơ kòn bau añ. Dilah añ ờ lòt ndo. Bàr pe ngai tai kòn bau añ chơt jơglŏh; tam do ờ gŏ geh jơnau sa, dà neh soăt rau. Bol khai ờ bài pơdiă. Bơya sồr sùm mơ dăn sơnđàc gơ. Dồ êt tai, be mơ bol khai dờn, mơ dờn bơr bơya sồr hoài, gen tàng bol khai tă che bàr pe dăng lồc gen kơt tơ ngko hoài Bơya.

Tus dơ gah dà lềng, tam gen rau rềp hìu Bơya dê, be bơya kờñ sa bol khai, bơya sơềl ngăn, jê hoài, gơjềng sồt ngko jơh. Gơ mhàm lơm làm să soàn bơya dê, Bơya lăh bol khai in: ñchi gơlơh bol mê hoài añ bê sur bê so kờt do? Cau sồr bol mê hoài añ! bol mê añ sa poăc! Bol phàm nă gen wơl hơ tai: Bơh să tờm mê rau sồr hi hoài! Di mê ờ sồr bol hi ờ gŏ bol hi hoài mê ya! Bơya lah tai bol khai in: poăc bol mê añ sa pơdiă ñchi gơlơh hoài añ be sur be so? Añ geh tê, dờng añ git bol jòi sa tam brê. Bol mê krung kờt gen ya; geh jơng tê kờt añ sơl, ma añ, bol mê hoài ală alai be kờt dồ kờt so, rơbah rơbừp ngăn; añ ờ jai kong jê. Bol cau gen ờ gŏ jai pơndăng mơ gơ. Bol khai ñìm, dăn sơnđàc mơ bơya lồc gen dăn lài rê yal mơ kòn bau bol khai in; bơh ngkời, gơ sa di ya. Tam tŭ bol khai rê yal kòn bau in, bơya krung sơnđàc bol khai lồc gen gơ lah: Bol mê rê lă yal ŏh kòn, kòn bau bol mê in; ngai hìng, di wơl mơ lik tơngai tus mơ ndo; di ờ gŏ tus lik tơngai ndo, añ gơ-jrañ êt mơ bol mê! Bol khai lùp jơnau Bơya sồr bè gen, lòâc gen rê rau bòn tờm; bol khai ñìm sùm ñìm sùm, kơyoa rơngòt ngăn jơnau chơt. Tam tŭ mờr tus rau dơ bòn tờm, bol khai tìp mơ dùl nơm rơpài lòt jòi jơnau sa. Rơpài àñ dùl nơm sah lồc gen tui yoas. Gơ lùp bol khai: ñchi gơlơh bol mê ñim jơh să ră hê bè gen? Bol khi hơ: Kơyoa, ngai hìng, bol hi Bơya sa poăc; gen dàng bol hi rê yal đah kòn, kòn bau in tam bòn. Be mơ rơpài gen lah: ờ gŏh rơngòt, ơ ŏh mi! lời añ căhrơña bol mê in. Ngai hìng bol mê ờ gŏ chơt! Mho do, bol mê lòt tam hìu añ tàng lùp ñchi gơlơh sa poăc bol mê ală alai be hơ̆.

Măt tơnngai mờr măng rau, jơh bol khai lòt tam hìu rơpài dê, lời yal rơpài in git. Tus tam hìu rơpài, bol khai ơm nggui tam bềl. Rơpài lùp: ñchi gơlơh gơ sa bol mê? Bol khai đơs: ngai do ti, bol hi lòt jòi che rơyah tam brê, bol hi tìp mơ gơ, gơ sồr hoài kơt tơ ngko; bol hi ờ bài sơl, gơ sồr prơdiă; gen tàng bol hi hoài kơt tơ ngko; gơjềng sồt rà ngăn, lồc gen gơtuh mhàm sơl, làm să soàn krung sồt jơh sơl; gơ jê ngăn lồc gen sơềl, kờñ sa bol hiõ; bol hi tơm kơndăng sơl ờ gŏ jai mơ gơ; ờ jai gơ pơdiă, kờñ sa sùm poăc bol hi. Be mơ rơpài gen đơs: Jơnau gen ờ gŏ hoan kơnjơ̆. Ngai hìng añ lòt bal mơ bol mê, bol mê ờ gŏ chơt. Bañ rơngòt yơ; dilah añ sồr jơnau lơi, bol mê jăt kơ̆ jơnau añ sồrgen. Jơh bol khai đơs: dirau ngai hìng hi jăt kơ̆ jơnau mê sồr gen.

Bè drim hìng, trồ neh àng rau, bol khai jà rơpài lòt gờñ ngăn, rơpài ờ bài lòt gờñ. Lồc gen lah bol khai in, tam phàm sin jiờ mơ bol he lòt; ờ gŏ ngòt mơ Bơya; lòt rơleh rơlùn khăt gơbŏh. Bol khai kơlôi rơngòt ngăn, kơyoa bol khai tam prơgon mơ Bơya; lik tơngai tus mơ, bol khai kơlôi sùm, dilah lòt bat, Bơya gơjrañ mơ bol khai; gen tàng, bol khai jà sùm rơpài lòt gờñ. Tŭ Rơpài lòt, bol gen lòt sơbăc. Mờr tus tơ dà lềng, bol khai gŏ bơya neh rơcăng sing ồs; cau bà jòi lòng, cau bà jòi dà; cau bà trŭ piang làng sa poăc bol khai. Bol khai rơngòt ngăn lồc gen ñìm sơnđàc mơ rơpài lời tơngklàs bol khai. Mơ Rơpài tai lah bol khai in: Bañ ñìm gŏ rơngòt, lời añ đơs bol mê in; bañ phung, ơ ŏh mi. Tŭs rau tam gen; be mơ Bơya lah bol khai in ma ñŏ ntăs ngăn: haha! Nõchi gơlơh bol mê lòt gờñ ngăn? Aêt lă poăc bol mê añ insa! Bemơ Rơpài lùp: ñchi gơlơh bol mê kờñ sa poăc bol khai? Bol mê mơ bol khai lah ŏh mi bal; añ krung ŏh mi ma bol mê ya! Ờ gŏ di sa poăc gơp, ơm bal tĕ sùm sùm! Bơya gen wơl đơs: Kơyoa ngai òr, bol khai hoài añ gơjềng sồt rà ngăn; añ kong jê sùm! Rơpài lùp: mê sồr bol khai, lah ờ? Bơya lah: añ sồr dùl êt mơ; bol khai hoài bời! Rơpài wơl lah: geh jơnau. Bol phàm nă bol khai lơm, rơngòt sùm, tồn lah rơpài ờ chài hơ bơr. Rơpài lùp tai Bơya: Jê ngăn ờ, bol khai kơt mê tơ ngko? Bơya đơs mơ Rơpài: Jê ngăn gơdê lăh! dilah ờ gŏ jê, añ ờ sa poăc bol khai, jê ngăn gơdê! Rơpài lah Bơya in: nđờ che, kơt tơ ngko mê, ngai òr, lòng kơt wơl. Bơya găm đơs: di ya. Lồc gen rơpài sồr cau phàm nă ai che, kơt dơ ngko, lồc gen sồr Bơya bic. Bơya bic, jơh ală Bơya ndai ơm gùt-dar bol khai. Rơpài sồr bol cau Prum rềt dơ ngko lồc gen lùp sùm Bơya: nkàr jê mê ngai òr? Kàr hơ̆, lah ờ? Bơya hơ: jê ngănya gơ dê, ngai òr wàih! Lah jê kàr hơ̆ añ ờ gŏ lŭi sa bol khai. Rơpài sồr tai rềt pràn êt kờñ tơnchơt gơ; khai lah: rềt tai lă! Be mơ, bol khai rềt lồc gen rơpài lùp Bơya: kàr hơ̆, jê bol khai kơt mê ngai òr? Bơya ờ gŏ jai đơs tai, mờr chơt rau, gơ đơs dùl êt mơ: kàr hơ̆, ờ be jê, yah jê kàr hơ̆, añ ờ gŏ sa bol khai. Rơpài sồr bol cau Prum rềt tai pràn êt tai. Bemơ Bơya gen chơt rau. Ală Bơya ndai dô jơh, prŭ tam dà lềng gờñ ngăn. Jơh bol cau Prum ưn-ngài rơpài rà ngăn kơyoa chài cahrơña be gen.

Tam tŭ jơh sa poăc Bơya, Rơpài lòt ơm nggui tơ rơbàng dà lềng lồc gen đơs crih sùm. Bemơ, Bơya ùr mbŏh dơ jơng rơpài lồc gen lah rơpài in: mê sa bau añ, añ sa poăc mê sơl! Rơpài hơ wơl: ai đơs be hơ̆, añ ờ gŏ rơngòt. Dilah ai pờ mbùng, đơs pràn kơldăng ngăn, gen mơ añ rơngòt ngăn mơ ai. Bemơ, bơya pờ mbùng lồc gen nggà ntas ngăn. Tam tŭ Bơya pờ mbùng, rơpài tă jơngbơh Bơya. Rơpài ờ gŏ rùs chơt, gơ đơs chờ sùm mơ bơrtăp Bơya tơl bơta. Lồi dŭt rơpài jà bol cau Prum phàm nă rê lơh leh ñô sa, kơyoa rơpài jăk ngăn tơngklàs să tờm bơh bơr Bơya, lồc gen tơngklàs jơh phàm nă cau Prum krung bơh Bơya sơl.