Noe lồc gĕn Dà-kŏ-bŏ-lơ

Noe lồc gĕn Dà-kŏ-bŏ-lơ

(Ăpbơlăh tăm năm 2400 ờ hềt Jêsu Krist dĕh)

Jơh kòn cău ƀrŏ-ƀrŏ jềng iơ̆h 

Rài ŏh kòn Adam dê tăm-pà bàr gùng: ƀă jăt Yàng, ƀă jăt Cà-Kơ̆h. Bài pơ̆mềr Adam bơ̆h Abel chơ̆t rău, Bàp-Yàng ăi khăi in dĕh tăi dul nă kòn niăm sơnđăn Seth.

Rài Seth gĕn jăt Bàp-Yàng sùm. Rài Kaĕng dê tăi jềng cău ờ gŏ gĭt Yàng. Ƀrŏ-ƀrŏ, jơ̆h cău chuĭ Yàng, lồc gĕn jềng iơ̆h ngăn. Dờn Noe mơ hồm cău niăm gĭt kơlwê tơ Yàng.

Bàp Yàng yăl lài Dà-kŏ-bŏ-lơ

Bơh gơ gĕn Bàp-Yàng lăh mà nùs cơnơ̆ng: ‘‘Añ màl ngăn pơjềng kòn-cău! hồm dul rơhiăng băr jơ̆t năm tăi, Añ tơnlề jơ̆h să cău tăm tiăh! ‘‘

Bàp-Yàng lăh ma Noe: ‘‘Mê tăi, mê mòn lă dul nơ̆m ahò dờng, jòng pe rơhiăng tăl, prăm jơ̆t tăl lơ-àr, lồc gĕn pe jơ̆t tăl rĭs. Tơ rĭs ahò gĕn, mê lơ̆h dul nơ̆m mpồng dềt, lồc gĕn tơ găh, lơ̆h lă dul nơ̆m mpồng dờng. Añ mŏng phàk jơ̆h să cău jơ̆h ƀòn, lơgăr ma Dà-kŏ-bŏ-lơ! Jơ̆h să cău, jơ̆h jơnău ơ̆m jŏ tăm tiăh do di chơ̆t rŏt-tŏt rĕt-tĕt!

Ma Añ, Añ tăm-bơng kuă ma mê. Mê mŭt tăm Ahò băl ma ŏh kòn, kòn bău mê. Tă gĕn, mê tờmŭt sơ̆l jơ̆h jơ̆i-pôăn-jơ̆ng kôăng me, kôăng me tơ̆l mơta, lồc gĕn dăp lă jơ̆h jơnău ñơ bol mê in sa’’

Dà-kŏ-bŏ-lơ

Tăm dul rơ hiăng năm, Noe mòn Ahò gĕn jài, bơto jài, sồr jơ̆h să lời tĕ jơnău iơ̆h. Rŏh kŏng sơni! Bol cău iơ̆h kư̆ bơn tĭtồr, ờ lŭi bài jăt jơ̆h gơ Bàp-Yàng sồr. Gŏ gơ gĕn, Bàp-Yàng lăh ma Noe in: ‘‘Mŭt lă tăm Ahò mê, lồc gĕn jơ̆h kòn bău mê. Tăm pŏh ngăi tăi, Añ sồr miu dờng, miu dờng tăm pôăn jơ̆t ngăi, pôăn jơ̆t măng, ờ gŏ lŭi dơ̆h’’.

Jơ̆h rău pŏh ngăi gĕn, gơ rờp miu dờng, rĭk-grĭk rèk-grèk, ma càl ma rơ bŭt, tơrlŭk trồ tơrlŭk tiăh. Dà bơ̆h tiăh gơ gŭh, dà bơ̆h trồ gơ crùh. Ahò tăi, gơ khiăng lơngăi-lơngăp tơ rĭs dà. Jơ̆h cău ñìm, ngkè lung-kŭng lờng-kờng, ƀă gŭh tơ rĭs chi, ƀă gŭh tơ rĭs bơnơ̆m. dà tăi gŭh sùm, gŭh sùm tơ̆t tơ jơ̆t prăm tăl bơ̆h bồ bơnơ̆m.

Gĕn, jơ̆h jơnău ơ̆m jŏ tăm tiăh, bơ̆h kòn cău tơ̆t tơ jơ̆ipôăn-jơ̆ng: sềm-răc bơ̆s, kơl-ềp, chơ̆t jơ̆h rŏt-tŏt rĕt-tĕt. Dờn Noe mơ, băl ma jơ̆h jơnău tăm Ahò hồm ơ̆m jŏ tăm tiăh do.

Noe yăl-lơ̆h-yàng bài ơ̆n ngài Bàp-Yàng

Tăm dul rơhiăng prăm jơ̆t ngăi, dà bŭ jơ̆h. Bàp-Yàng sồr càl dŭh khồm kơdăng ngăn, gĕn dờng, dà hŭc ƀrŏ-ƀrŏ, lồc gĕn Ahò Noe dê gơ kờn tơ rĭs Bơnơ̆m Ararat tăm Lơgăr Armênie.

Ƀrŏ-ƀrŏ, mpờl bồ bơnơ̆m. Noe pờ mpồng ahò, lồc gĕn dờng-klàs dul nơ̆m kơnđà, kơnđà gĕn ờ gŏ lŭi wơ̆l rê tăi. Pŏh ngăi ƀơh ngkời, Noe dờng-klàs tăi dul nơ̆m plŭ. Kơyôa ờ gŏ gĕh brê rơ̆p, plŭ gĕn wơ̆l rê tăi tăm Ahò. Pŏh ngăi bơ̆h gĕn tăi, Noe dờng-klàs tăi dul nơ̆m sềm plŭ. Gơ wơ̆l rê sơ̆l tơ̆t tơ mho, gơ glèng tơ kơbùng dul tơnê chi Olivie.

Gŏ gơ gĕn, Noe brờn ngăn, khăi gĭt dà gĕn gơ mŏng hŭc rău. Noe ơ̆m tăm ahò dul năm tăi. Tă gĕn, Bàp-Yàng sồr khăi tŭh bơ̆h Ahò băl ma kòn bău khăi, băl ma jơ̆h jơ̆i-pôăn-jơ̆ng, sềm răc, bơ̆s, kơl-ềp ơ̆m tăm ahò gĕn. Noe ơ̆n Ngài Bàp-Yàng jơ̆h nùs jơ̆h pràn, lồc gĕn yăl-lơ̆hyàng ma jơ̆i-pôăn-jơ̆ng gŏh niăm. Gŏ gơ gĕn, Bàp-Yàng brờn ngăn, dờn sơ̆l gơ Noe yăl-lơ̆hyàng, khăi bơncrài Briăng-kăng hèr ngăn niăm ngăn. Tă gĕn, Bàp-Yàng pơniăm Noe ma ŏh kòn khăi, lồc gĕn lăh: ‘‘Añ tăm-bơngkuă ma mê ma ŏh kòn mê Hìng-nău, ờ gŏ lŭi Añ phàk kòn cău ma dà-kŏ-bŏ-lơ. Bơh dĭng-hơ̆ do tơ̆t tơ jơ̆h trồ tiăh, kăl sĭh koè kăl tơwès, kơnhăi prăng kơnhăi mrềt, măng ngăi jềng sùm sùm kờt ờs. Briăng-kăng Añ bơncrài tăm trồ gĕn jềng Tềl yŏng ngăi Añ bơng-kuă ềng ma mê! ‘‘

………………………………………

Ahò Noe dê jềng rùp Pơjum Niăm: Cău pơ mŭt tăm pơjum Niăm, gĕn ma klàs bơ̆h brê-bràs-tìng. Cău tìs, ờ bài màl tìs, drờm kờt kơnđà ờ gơ̆ lŭi bài wơ̆l rê tăm Ahò Noe dê. Hwềng cău niăm ơ̆m tăm Pơjum Niăm JÊSU-KRĬST dê tăi jềng kờt Plŭ.

……………………………………

Ŏh-kòn Noe dê…mòn ntùng pơrdăc ‘’Babel’’(Gĕn XI)

Noe gĕh pe nă kòn: Sem, Kam, lồc gĕn Japhet. Noe ờs lơ̆h mìr lơ̆h sre ma bol khăi. Noe tăm chi-ño sơ̆l, ma kơyôa khăi ờ tơ̆l hăn gĭt ñô ra ìr trơnờm jềng bơñŭl, dơ̆ gĕn khăi ñô rà ìr, gơjềng bơñŭl ngăn, lồc gĕn bĭc să kŭh tăm hiu ôê khăi. Gŏ bàp khăi ơ̆m să kŭh, Kam lòt yăl ma bol ŏh mi khăi ma dơñŏ ma bơsăh. Bol bàr nă ŏh mi Kam tăi, bol khăi kờñ ngăn bàp bol khăi, lồc gĕn lơ̆h mềr ngăn ma khăi, gĕn dờng, bol khăi ăi ào dờng. Lòt rềp, lồc gĕn bơn tơ̆ bàp bol khăi in. Tă lồc lŭh bơ̆h bĭc ma klo Kam bơsăh khăi Noe lăh khăi in: ‘‘Añ bơrtăp mê, Kam. Sem, lồc gĕn Japhet tăi niăm lă! ‘‘ Ŏh-kòn, kòn-său Noe dê rơ̆-rŭ ngăn. Gĕn dờng, ờ gŏ jăi tăi ơ̆m băl dul bă brê.

Mờñ bol khăi tăm pơ-iăh, bol khăi lơ̆h bơcrì ngăn ma lăh: ‘‘He lơ̆h lă dul nơ̆m ƀol dờng ngăn, lồc gĕn tăm ƀòn do, he mòn lă dul nơ̆m Ntùng-Pơrdăc bơ̆h tiăh do gơ gŭh tơ̆t tơ trồ!‘‘

Gĭt gơ bol khăi kơlwê kờñ lơ̆h, Bàp-Yàng lăh: ‘‘Añ mong phàk, tăm bơrlŭ dà đơ̆s bol khăi, bài ơ̆ gŏ chài tăm-wờng tăi, cău do ma cău dă! ‘‘

Bơh gơ gĕn, ma gĕh dà đơ̆s rà ngăn: yào mpồl, yào đơ̆s dĭs. Ntùng-Pơrdăc gĕn sơnđăn Babel, gơ bài lăh: ‘’Ƀời-ƀa ală alăi’’.

Bĕ mơ, bol khăi lời tĕ brôă gĕn, jơ̆h pơlào ndrăh. Rài Sem lòt tăm Lơgăr Asie, bơ̆h rài gĕn rău, Bàp-Yàng rơwăh dul nơ̆m pơlào, sơnđăn Israel. Rài Kam dê tăi, ơ̆m tăm Lơgăr Afryque. Rài Japhet lòt tăm Lơgăr Europe.

………………………………………
Mò-pàng he ơ̆m jŏ jĭh jòng ngăn, kra cồn kra căn ngăn. tăm tŭ Adam chơ̆t, khăi gĕh 930 năm. Mathưsalem gĕh 969 năm, gĕn ma khăi chơ̆t. Noe tăi, khăi 950 năm, gĕn ma khăi chơ̆t sơ̆l. Noe ơ̆m jŏ 58 năm băl ma Abraham. Bơh gơ gĕn, bol Cău-ăt-bồ-pơlào wơ̆l tăm tờmbơ̆h ndrăng bol khăi jơ̆h jơnău Bàp-Yàng tơnngĭt tơ dunnia bơ̆h chŭp bơ̆h chờm òr

………………………………………

Nội dung được lấy từ: 

Sră goh Bơng-kŭa Yau

Center Montagnard

Les Péres Rédemtoristes 

DàLat (Fyan) VietNam

Bol cau mblàng Sr.Dàmin CsR
Rev, Sylvère Drouin C.Ss.R.
Lé Pè ré Rédemtoristes
Dà làc (Fyan) Vietnam.
Pôgru K’Pŏh (Pàng – Tìng) ƀòn Dà-làc.

1e Edition: Fête
du Christ-roi, 27 Oct.1957
2e Edition: Fête du SS.Redempteur: 19-7-1959