Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Broă 10. 25-26, 34-35, 44-48
Bơta Yàng Nhơm krung neh tơntuh hơ đăng ală làng-bol.
Đăl tam Sră Ală Broă Bol Dờp-pơyoa dê.
Gơlĭk gơ̆s lah tŭ Petro rơ̆p mŭt hìu, gen Kornelio lĭk rò khai, mơ tơmbĭc să hơ đơm jơng khai mơ khoai. Petro yờ khai ntào mơ đơ̆s be do: Dăn đi ñă-ntào, bơh să tờm añ krung lah bơnŭs lơm. Petro tơlĭk săp đơ̆s be do: Ngăn, añ tiămgĭt lah Yàng ờ sền dờng-màng ĭs cau lơi, mơya tam jơh ală lơgăr lơi, cau lơi duhngòt Khai mơ lơh jăt ală jơnau song-dơpă, gen geh Khai wă-dờp lơm. Sơdăng Petro đơ̆s ală bơr hơ̆, gen Yàng Nhơm neh mù hơ đăng ală cau ơm iăt bơr. Ală cau pindờn neh siăt kơltau, ală cau neh tŭs bal mơ Petro, gen nrơ̆t nùs lơm, tŭ gŏ bơta Yàng Nhơm krung neh tơntuh hơ đăng ală làng-bol, mơ sơl bol khai kơno ală cau hơ̆ đơ̆s rà dà đơ̆s mơ jờngrơ Yàng. Tŭ hơ̆ Petro tơlĭk săp đơ̆s be do: Ñcau rơgơi kơryăn he ai dà làng pơnđum ală cau do, tŭ bol khai neh wă-dờp Yàng Nhơm be taih ? Mơ khai sồr pơnđum bol khai in bơh sơnđăn Kơnràñ Jesu Kristo. Tŭ hơ̆, bol khai dăn Petro ơm wơl mơ bol khai bàr pe ngai.
Hơ̆ jơnau đơ̆s Kơnràñ dê.
Nrĭ-nrềng: 97. 1, 2-3ab, 3cd-4
Hw: Kơnràñ neh pờ-tơlĭk bơta tơngklàs Khai dê dơ đăp măt ală làng-bol.
Jờngrơ tĕ Kơnràñ dùl jơnau đơ̆scrĭh pa, bơh Khai neh lơh gơ̆s ală broă krơi-sơrbơi. Tê ma Khai neh cèng wơl bơta phalin, bal mơ tê niămgoh Khai dê. Hw
Kơnràñ neh yăl-tơlĭk bơta tơngklàs, neh sơnđio bơta song-dơpă Khai dê dơ đăp măt ală làng-bol. Khai neh kah wơl nùs niăm-lơnhơn mơ dờn-song bal mơ hìu Israel. Hw
Khŏp tiah dunia do neh sền gŏ bơta tơngklàs Yàng he dê. Ơ jơh plai ù, driau gờm tĕ Kơnràñ, chờhờp-chờchờr mơ pĕ kơlñi. Hw
Bơta đăl bàr: 1Jn 4. 7-10
Yàng gơ̆s gơboh
Đăl tam sră dùl Joan, cau Dờp-pơyoa bơtoăh dê.
Ơ bol kòn kờñ-gơboh, he di tam gơboh bal, bơh bơta gơboh gơlĭk bơh Yàng. Kơyoa cau lơi gơboh, gen neh lĭk bơh Yàng, mơ đăl-gĭt Yàng. Ai cau lơi ờ gơboh, gen ờ gĭt Yàng, bơh Yàng gơ̆s gơboh. Bơta do ràng-tơlĭk bơta gơboh Yàng dê bal mơ he, lah Yàng he neh sồr Kòn Dùl Khai dê tŭs tam dunia, làng kơnờm dơ Khai mơ he geh kĭs. Bơta gơboh hơ̆ lah be do: Ờ di he neh gơboh mơ Yàng, mơya Khai tờm neh gơboh mơ he lài, mơ neh sồr Kòn Dùl Khai dê tŭs gơ̆s phan lơhyàng sal tìs he in.
Hơ̆ jơnau đơ̆s Kơnràñ dê.
ALLELUIA: Jn 14. 23
Alleluia, Alleluia. Kơnràñ đơ̆s: Dilah cau lơi gơboh mơ Añ, gen rơ̆p prăp jơnau Añ dê, mơ Bàp Añ rơ̆p gơboh mơ khai, mơ Bol Añ rơ̆p tŭs mơ khai, mơ Bol Añ rơ̆p ơm tam khai. Alleluia.
Jơnau Yălniăm: Jn 15. 9-17
Ờ geh cau lơi geh bơta gơboh dờng rơlau mơ cau phi màng kĭs he dê bơh bơyô he.
Đăl tam Jơnau Yălniăm niămgoh jăt Joan.
Tŭ hơ̆, Kơnràñ Jesu đơ̆s mơ bol jăt-dờn be do: “Be Bàp neh gơboh mơ Añ, Añ neh gơboh mơ bol kòn; bol kòn ơm tĕ tam bơta gơboh Añ dê. Dilah bol kòn prăp ală jơnau-sồr Añ dê, gen bol kòn ơm tam bơta gơboh Añ dê, be Añ neh prăp ală jơnau-sồr Bàp Añ dê, mơ Añ ơm tam bơta gơboh Khai dê. Añ đơ̆s ală jơnau do bol kòn in, làng bơta chờhờp Añ dê ơm tam bol kòn, mơ bơta chờhờp bol kòn dê geh bềng-lìu. Do lah jơnau-sồr Añ dê, lah bol kòn tam gơboh bal be Añ neh gơboh mơ bol kòn; ờ geh cau lơi geh bơta gơboh dờng rơlau mơ cau phi màng-kĭs he dê bơh bơyô he. Bol kòn lah bơyô Añ dê, dilah bol kòn lơh jơnau Añ sồr bol kòn. Añ neh ờ hòi bol kòn lah cau duh-broă, bơh cau duh-broă ờ gĭt bơta cau tờm khai dê lơh; mơya Añ neh hòi bol kòn lah cau bơyô, bơh jơh ală bơta Añ neh kơno bơh Bàp Añ, gen Añ neh ai bol kòn in gĭt. Ờ di bol kòn neh rơwăh Añ, mơya Añ neh rơwăh bol kòn mơ neh bơtào bol kòn, làng bol kòn lòt mơ gơlĭk plai, mơ plai bol kòn dê gơ găm, làng bơta lơi bol kòn dăn mơ Bàp bơh sơnđăn Añ, gen Khai rơ̆p pà bol kòn in. Añ sồr bol kòn ală bơta hơ̆ làng bol kòn tam gơboh bal.”
Hơ̆ jơnau đơ̆s Kơnràñ dê.
