Ngai Yàng prăm kàl Poan-jơt

Bơta đăl dùl: Jr 31. 31-34

Añ rơ̆p cĭh bơta tam bơrkoăt pa, mơ Añ rơ̆p ờ kah tìs-glài tai.

Đăl tam sră Jeremia, cau ala-bơr dê.

Kơnràñ đơ̆s: Do tŭs ngai Añ cĭh bơta tam bơrkoăt pa mơ hìu Israel mơ hìu Juđa, bơta tam bơrkoăt do ờ ndrờm bal mơ bơta tam bơrkoăt Añ neh cĭh mơ pàng-yau bol khai dê, tam ngai Añ ăt tê bol khai lăm lĭk bơh lơgăr Ejypto, bol khai tờm neh pơrlơ̆-dră mơ bơta tam bơrkoăt hơ̆, bŭlah Añ ơm-ăt bol khai. Kơnràñ đơ̆s: Do lah bơta tam bơrkoăt Añ rơ̆p cĭh mơ hìu Israel tơnơ̆ ală ngai hơ̆. Añ rơ̆p tơnơn gùng-boh-lăm Añ dê tam dơlăm nùs bol khai, mơ rơ̆p cĭh tam nhơm-nùs bol khai, Añ rơ̆p gơ̆s Kơnràñ bol khai dê, mơ bol khai rơ̆p gơ̆s làng-bol Añ dê. Kơnràñ đơ̆s: Cau do rơ̆p ờ găm di bơto cau ne tai, cau bi rơ̆p ờ găm di bơto cau oh be do: Mê đăl gĭt tĕ Kơnràñ. Kơyoa ală cau bơh dêt tŭs dờng đăl-gĭt Añ lơm, bơh Añ rơ̆p hồ-lời tìs iơ̆h bol khai dê, mơ rơ̆p ờ găm kah tìs-glài bol khai dê tai.

Hơ̆ jơnau đơ̆s Kơnràñ dê.

 

Nrĭ-nrềng: 50. 3-4, 12-13, 14 -15

Hw: Ơ Kơnràñ, dăn mòn añ in plai nùs sàng-goh.

Ơ Kơnràñ, dăn nđàc añ jăt nùs niăm-lơnhơn Đi dê, tơnroh tìs añ jăt nùs tơpă-tơpài. Dăn rào añ kloh tìs-bìr, mơ jùt añ kloh tìs iơ̆h. Hw

Ơ Kơnràñ, dăn mòn añ in plai nùs sàng-goh, mơ tơnpa wơl nhơm-nùs pràn-kơldăng tam añ. Dăn bañ tơlĭk añ bơh măt Đi, Bañ ai wơl Yàng Nhơm Đi dê lĭk bơh añ. Hw

Dăn pà wơl añ in nùs chờ tam bơta tơngklàs, mơ nùs pơha, Đi đơng-dong añ. Añ rơ̆p bơto cau thừ-blơ̆ in gùng-dà Kơnràñ,88 mơ cau tìs-glài rơ̆p rê wơl mơ Khai. Hw

 

Bơta đăl bàr: Juđe 5. 7-9

Khai neh bơsrăm dờn-duh, mơ neh gơjềng tơnggu-me bơta tơngklàs gơ̆s sùm.

Đăl tam sră Paulo, cau Dờp-pơyoa bơtoăh, pơyoa bol Juđe in.

Tŭ găm kĭs tam dunia do, Kơnràñ Kristo neh lơ̆s săp mơ gơ hòr dà măt, pơdơng bơr khoai-dăn răc-ròc hơ Bơtau rơgơi klàs he bơh chơ̆t, mơ bơh nùs dờnsong, Khai neh geh dờp bơr. Bŭlah gơ̆s Kòn Yàng, Khai neh bơsrăm dờn-duh bơh ală bơta jê-yăn Khai kong, mơ tŭ bơsir rau, Khai neh gơjềng tơnggu-me bơta tơngklàs gơ̆s sùm, dơ jơh tơl ală cau dờn-jăt Khai.

Hơ̆ jơnau đơ̆s Kơnràñ dê.

 

Jơnau đăl lài Jơnau Yălniăm: Jn 12. 26

Kơnràñ đơ̆s: Cau lơi duh-broă Añ, gen jăt tĕ Añ, mơ Añ ơm tềng lơi, gen cau duh-broă Añ rơ̆p ơm tềng hơ̆.

Jơnau Yălniăm: Jn 12. 20-33

Dilah găr kòi gơ rung tam ù mơ gơ chơ̆t, gen gơ lĭk oă găr.

Đăl tam Jơnau Yălniăm niămgoh jăt Joan.

Tŭ hơ̆, tam bol cau guh làng duh-khoai tam ngai lèh, geh bol cau Grek; be hơ̆, bol do tŭs mơ Philippe, cau Bethsaiđa Galilea, dăn khai mơ đơ̆s: “Ơ ồng, bol añ kờñ tìp măt Kơnràñ Jesu.” Philippe tŭs đơ̆s mơ Andrea; Andrea tŭs bal mơ Philippe mơ bol khai đơ̆s mơ Kơnràñ Jesu. Tŭ hơ̆, hơ wơl, Kơnràñ Jesu đơ̆s mơ bol jăt-dờn lah: “Neh tŭs jiờ làng Kòn kòn-bơnŭs geh tơngklŏ. Di ngăn, di ngăn, Añ đơ̆s mơ bol kòn: Dilah găr kòi gơ rung tam ù mơ ờ chơ̆t, gen gơ ơm dùl nơm gơ dê; mơya dilah gơ chơ̆t, gen gơ lĭk oă găr. Cau lơi gơboh mơ bơta kĭs he dê, gen rơ̆p roh gơ; ai cau lơi ềng mơ bơta kĭs he dê, gen rơ̆p prăp gơ jơl tŭs dơ bơta kĭs sùm. Dilah cau lơi duh-broă Añ, gen jăt tĕ Añ, mơ Añ ơm tềng lơi, gen cau duh-broă Añ rơ̆p ơm tềng hơ̆; dilah cau lơi duh-broă Añ, gen Bàp Añ rơ̆p sền màng khai. Tŭ do, sồp-soàn Añ ờ sŭk. Ñchi Añ pal đơ̆s ? Ơ Bàp, dăn dong Kòn klàs bơh jiờ do. Mơya tài bơh hơ̆ mơ Kòn neh tŭs jơl tŭs dơ jiờ do. Ơ Bàp, dăn tơngklŏ tĕ sơnđăn Đi!” Tŭ hơ̆, geh săp bơh trồ tŭs: “Añ neh tơngklŏ mơ Añ rơ̆p tơngklŏ tai.” Mpồl làng-bol ntào tềng hơ̆, kơno gen đơ̆s lah ntơr; bol ndai đơ̆s: “Huềngduh đơ̆s mơ Khai.” Kơnràñ Jesu hơ wơl mơ đơ̆s: “Ờ di tài bơh Añ mơ geh săp do, mơya tài bơh bol mê. Tŭ do gơ̆s bơta cahrơña dunia do, tŭ do cau ăt-bồ dunia do kong bơtrơh hơ bơdìh; mơ Añ, dilah Añ rơ̆p geh tơngguh bơh tiah, Añ rơ̆p hoài jơh ală cau tŭs mơ Añ.” Kơnràñ đơ̆s jơnau hơ̆ làng sơnđio Khai rơ̆p chơ̆t bơh bơta chơ̆t lơi.

Hơ̆ jơnau đơ̆s Kơnràñ dê.