Ngai Yàng prăm kàl Lòt Găn

Bơta đăl dùl: Broă 9. 26-31

Barnaba yăl wơl bol khai in gĭt khai neh gŏ Kơnràñ tam gùng be lơi.

Đăl tam Sră Ală Broă Bol Dờp-pơyoa dê.

Tam ală ngai hơ̆, tŭ tŭs Jerusalem, Saolo jòi gùng tìp-tòm mơ bol jăt-dờn, mơya ală cau ngòt lơm khai, ờ pin khai neh gơjềng cau jăt-dờn. Barnaba lăm khai tŭs tìp bol Dờp-pơyoa, mơ khai yăl wơl bol khai in gĭt, tam gùng khai neh gŏ Kơnràñ be lơi, neh geh Kơnràñ bơto-sồr, mơ tam Đamas, khai chăm-cha yăl-tơlĭk sơnđăn Jesu be lơi. Mơ bơh nhơ̆, khai mŭt lĭk Jerusalem bal mơ bol khai, mơ chăm-cha yăl-tơlĭk sơnđăn Kơnràñ. Khai krung yăl-bơto làng-bol bơdìh in sơl, mơ tam pơndăng mơ bol Grek, gen bol do jòi gùng tơnchơ̆t khai. Ală oh mi gĭt broă hơ̆, gen cèng khai mù hơ Sesarea, lồc gen jun-tơngăc khai rê hơ Tarse. Pơnjumniăm geh ring-lơngai tam kơnhoàl Juđea, Galilea mơ Samaria, ơm kĭs tam bơta duh-ngòt Kơnràñ, geh bơ̆t-bơtào mơ bềng bơta pơndờm-pơnđiăng Yàng Nhơm dê.

Hơ̆ jơnau đơ̆s Kơnràñ dê.

 

Nrĭ-nrềng: 21. 26b-27, 28 mơ 30a, 30b-32

Hw: Ơ Kơnràñ, bơh dơ Đi mơ bơr añ jờngrơ mpong tam bơta pơrjum-dờng

Bơh dơ Kơnràñ mơ bơr añ jờngrơ mpong tam bơta pơrjum-dờng, añ rơ̆p bơsir ală jơnau hơ-pơrgon añ dê dơ đăp măt ală cau duh-ngòt Kơnràñ. Cau rơbah rơ̆p sào mơ geh hờm, ală cau jòi-sơwì Kơnràñ rơ̆p jơngrơ Khai, nhơm-nùs oh mi dê chờ kĭs tĕ jơl jơh ală rài. Hw

Jơh ală cau rơ̆p kah tồr mơ rê wơl mơ Kơnràñ, làm khŏp plai ù, jơh ală làng-bol rơ̆p tơmbĭc să dơ đăp măt Kơnràñ. Gĭt-nđờ nă cau bĭc tam kơnàng-ù rơ̆p duh-khoai mìng Kơnràñ lơm, gĭt-nđờ nă ơm tam kơmbuh-ù rơ̆p tơmbĭc să dơ đăp măt niămgoh. Mơ sồp-soàn añ rơ̆p kĭs Kơnràñ in lơm. Hw

Jơi-bơtiàn añ rơ̆p duh-broă Kơnràñ, rơ̆p yăl wơl gơrềng bơh Kơnràñ ală rơnàng tơnơ̆ in, mơ bol khai yăl wơl ală làng-bol tơnơ̆ in gĭt bơta song-dơpă Kơnràñ dê be do: Bơta hơ̆ Kơnràñ neh lơh. Hw

 

Bơta đăl bàr: 1 Jn 3. 18-24.

Do lah jơnau-sồr Kơnràñ dê, lah he pal pindờn mơ tam gơboh bal.

Đăl tam sră dùl Joan, cau Dờp-pơyoa bơtoăh dê.

Ơ bol kòn kờñ-gơboh, he bañ gơboh mìng bơh săp đơ̆s mơ bơh bơr mpiăt lơm, mơya bơh broă lơh mơ ngăn-ngồn. Bơh be hơ̆, he gĭt he gơrê mơ jơnau ngăn, mơ rơ̆p geh kơ̆ nùs dơ đăp măt Kơnràñ. Bơh dilah nùs he lah-pơrhơng he, gen Yàng găm dờng rơlau mơ nùs he, mơ Khai gĭt jơh ală bơta. Ơ bol kòn kờñ-gơboh, dilah nùs he ờ lah-pơrhơng, gen he pindờn dơ Yàng, mơ jơh ală jơnau lơi he dăn, gen he krung geh Khai pà, bơh he prăp jơnau-sồr Khai mơ lơh jơnau niăm nùs Khai. Mơ do lah jơnau-sồr Khai dê: He di pindờn dơ sơnđăn niămgoh Kòn Khai dê lah Kơnràñ Jesu Kristo, mơ pal tam gơboh bal be Khai neh pà jơnau-sồr he in. Cau lơi prăp ală jơnau-sồr Khai dê, gen ơm tam Khai mơ Khai ơm tam bol hơ̆. Bơh dơ jơnau do mơ he gĭt Khai ơm tam he, gen lah Yàng Nhơm mơ Khai neh pà he in.

Hơ̆ jơnau đơ̆s Kơnràñ dê.

 

ALLELUIA: Jn 15. 4a, 5b

Alleluia, Alleluia. Kơnràñ đơ̆s: Ơm wơl tĕ tam Añ mơ Añ tam bol kòn. Cau lơi ơm tam Añ, cau hơ̆ gơlĭk plai oă ngăn. Alleluia.

Jơnau Yălniăm: Jn 15. 1-8

Cau lơi ơm tam Añ, mơ Añ tam khai, cau hơ̆ gơlĭk plai oă ngăn.

Đăl tam Jơnau Yălniăm niămgoh jăt Joan.

Tŭ hơ̆, Kơnràñ Jesu đơ̆s mơ bol jăt-dờn be do: “Añ lah tờm ño ngăn, mơ Bàp Añ lah cau tăm. Ntê lơi tam Añ ờ gơlĭk plai, gen Khai koh gơ; mơ ntê lơi gơlĭk plai, gen Khai jơkăo gơ, làng gơlĭk plai oă rơlau. Bol kòn neh goh rau bơh jơnau Añ neh đơ̆s mơ bol kòn. Ơm wơl tĕ tam Añ mơ Añ tam bol kòn. Be ntê chi ño ờ rơgơi gơlĭk plai ĭs gơ dê dilah ờ ơm wơl tam chi ño, bol kòn krung be hơ̆ sơl dilah ờ ơm wơl tam Añ.

Añ lah chi ño, bol kòn lah ntê. Cau lơi ơm tam Añ, mơ Añ tam khai, cau hơ̆ gơlĭk oă plai oă ngăn, kơyoa ờ geh Añ, bol kòn ờ rơgơi lơh chi lơi. Dilah cau lơi ờ ơm wơl tam Añ, gen kong săng hơ bơdìh be ntê ño mơ gơ ro, mơ cau tơrgùm ală ntê gen mơ cơm tam ồs, mơ ồs sa. Dilah bol kòn ơm wơl tam Añ, mơ ală jơnau đơ̆s Añ dê ơm wơl tam bol kòn, gen bơta lơi bol kòn kờñ, dăn tĕ, mơ gơ gơ̆s bol kòn in. Tam bơta do, Bàp Añ geh tơngklŏ, lah bol kòn gơlĭk oă plai mơ gơjềng bol jăt-dờn Añ dê.”

Hơ̆ jơnau đơ̆s Kơnràñ dê.