Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 6. 1-2a, 3-8258
Do, añ do, dăn pơyoa tĕ añ.
Đăl tam sră Isaia cau ala-bơr dê.
Năm bơtau Ozia chơ̆t, añ sền gŏ Kơnràñ nggui hơ đăng sơbàn jơnhoa, mơ tiăng ào Khai jơm-gòm hìu duh-khoai. Bol Huềng-duh duh-hur ntào dơ đăp măt Khai, mơ tam jăt driau-jờng be do: Niămgoh, Niămgoh, Niămgoh, Kơnràñ gơ̆s Yàng ală mpồl pràn, bơta gơklŏ Đi dê bềng làm trồ làm tiah. Ală bơnàng hìu gơ mprơm lơm hơ đăp săp driau-jờng, mơ jơh mơ hìu bềng ñhŭ lơm.
Tŭ hơ̆ song añ đơ̆s: Dồn-sa añ in, añ chơ̆t tơn, bơh mpiăt añ bơ̆-bơl, añ ơm tam gùl dùl jơi-nòi mơ mpiăt bol khai bơ̆-bơl lơm, măt añ neh ờ gŏ Bơtau, Khai gơ̆s Kơnràñ ală mpồl pràn. Mơya tŭ hơ̆, geh dùl tam bol Huềng-duh duh-hur păr tŭs hơ añ, tê ià chăh ồs hơng, mơ Khai neh ai chi sơkăp sơkăp bơh jơnào Yàng.
Khai ơn ồs chăh tam bơr añ mơ đơ̆s: Sền tĕ, ồs chăh do neh gơ bư dơ mpiăt mê, tìs mê dê geh tơnroh, mơ tìs-glài mê dê geh hồ-lời. Mơ añ kơno săp Kơnràñ yăl-sồr: Añ rơ̆p pơyoa cau lơi lòt taih ? Mơ cau lơi rơ̆p lòt bol Añ in taih ? Añ hơ mơ: Do, añ do, dăn pơyoa tĕ añ.
Hơ̆ jơnau đơ̆s Kơnràñ dê.
Nrĭ-nrềng: 137. 1-2a, 2bc-3, 4-5, 7c-8
Hw: Ơ Kơnràñ, dơ đăp măt bol Huềng-duh, añ pĕ kơlñi gờm Đi.
Ơ Kơnràñ, añ rơ̆p yălniăm Đi jơh nùs, bơh Đi neh kơno jơnau bơr añ dăn. Dơ đăp măt bol Huềng-duh, añ pĕ kơlñi gờm Đi, añ bĭc dŭp duh-khoai hơ găh gơlăng niămgoh Đi dê. Hw
Mơ añ rơ̆p yălniăm sơnđăn rơyŭ Đi dê, bơh nùs niăm-lơnhơn mơ dờn-song Đi dê. Tŭ añ hòi-dăn, Đi dờp bơr añ, Đi neh pà nhơm-nùs añ rà bơta pràn. Hw
Ơ Kơnràñ, ală bơtau dunia rơ̆p jờngrơ Đi, tŭ bol khai kơno ală jơnau bơh bơr Đi yăl-tơlĭk, mơ bol khai rơ̆p jờngrơ gùng-dà Đi dê: Ngăn, bơta gơklŏ Đi dê dờng-rơyŭ ngăn! Hw
Tê ma Đi dê lơh añ in kĭs ring-lơngai. Đi rơ̆p bơsir añ in ală bơta neh sơntờm.259 Ơ Kơnràñ, nùs sơrmah-sơrmài Đi dê găm sùm ală rài, dăn bañ lời dò broă tê Đi dê. Hw
Bơta đăl bàr:1 Kr 15. 1-11
Kơnràñ tơlĭk să mơ Jakobe, lồc gen mơ ală bol Dờp-pơyoa.
Đăl tam sră dùl Paulo, cau Dờp-pơyoa bơtoah, pơyoa bol Korinto in.
Ơ oh mi kờñ-gơboh, añ dăn tơngkăh wơl oh mi in Jơnau Yălniăm mơ añ neh yăl-bơto oh mi in, mơ oh mi neh wă-dờp mơ găm pin-jăt, kơnờm bơh hơ̆, oh mi geh tơngklàs, dilah oh mi dờp-prăp jơnô-jơnau añ neh yăl-bơto oh mi in, dilah ờ, oh mi neh pindờn ờ kuơ. Añ neh yăl-pơnrơ oh mi in lài jơh bơta mơ să tờm añ neh wă-dờp, gen lah Kơnràñ Kristo neh chơ̆t bơh tìs-glài he, di jăt be bơr Sră Goh. Khai neh geh tơ̆p mơ ngai pe Khai neh kĭs wơl di jăt be bơr Sră Goh. Khai neh tơlĭk să mơ Kepha, lồc gen mơ bol jơ̆t dùl nă.
Tơnơ̆ tai, Khai neh tơlĭk să mơ rơlau prăm rơhiăng nă oh mi tam dùl dơ̆ dăng, rà cau tam oh mi hơ̆ găm kĭs jơl tŭs tŭ do, mơya geh cau bà neh chơ̆t. Gen tai, Khai tơlĭk să mơ Jakobo, lồc gen mơ jơh ală cau Dờppơyoa. Lồi dŭt, Khai krung tơlĭk să mơ să tờm añ be mơ dùl nă kòn dĕh ờ tơl kơnhai. Añ ờs gơ̆s cau ờ diă ờ diơng rơlau jơh tam bol Dờp-pơyoa, mơ ờ di pal geh hòi lah Dờp-pơyoa, bơh añ neh kŭp-kuăn Pơrjum-niăm Yàng dê.
Mơya tŭ do añ gơ̆s cau be lơi, gen lah kơnờm bơh bơta hànggoh Yàng dê, mơ bơta Khai dê ờ di lah ờ kuơ añ in. Añ neh kong bòl-glăr rà rơlau mơ jơh ală bol khai, mơya ờ di lah añ, mơ lah bơta hànggoh Yàng dê ơm bal mơ añ. Bŭlah añ, bŭlah bol khai, bol hi yăl-bơto ndrờm be hơ̆ lơm, mơ oh mi krung neh pindờn be hơ̆ sơl.
Hơ̆ jơnau đơ̆s Kơnràñ dê.
ALLELUIA: Mt 4. 19
Alleluia. Alleluia. Kơnràñ đơ̆s: Bol mê jăt tĕ Añ, Añ rơ̆p lơh bol mê gơ̆s cau kŭp ka bơnŭs. Alleluia.
Jơnau Yălniăm: Lk 5. 1-11
Lời jơh ală bơta, bol khai jăt Kơnràñ.
Đăl tam Jơnau Yălniăm niămgoh jăt Luka
Gơlĭk gơ̆s lah, tam tŭ Kơnràñ ơm ntào dơ găh dà-lềng Genesareth, mpồl làng-bol ntềt dơ Khai làng iăt jơnau Yàng dê. Khai gŏ bàr nơm ahò ơm dơ găh dà-lềng, ai bol kŭp ka neh lĭk bơh gơ mơ găm rào bơrtơng. Kơnràñ hào tam dùl nơm ahò, ahò Simon dê, dăn khai wăs ngài dŭt bơh dơ găh, mơ nggui bơto ală mpồl làng-bol bơh ahò.
Dơ̆ Kơnràñ neh bơto rau, gen sồr Simon: “Wăs tĕ dơ tiah jrô mơ dăng tĕ bơrtơng kŭp ka.” Hơ wơl, Simon đơ̆s: “Ơ Pô gru, bol hi neh lơh broă bòl-glăr măng-àng tơn mơ ờ geh chi lơi; mơya bơh bơr Đi dê, añ rơ̆p dăng bơrtơng.” Bol khai neh lơh be hơ̆, neh kŭp oă-rà ka; mơ bơrtơng bol khai mờr gơcrè. Bol khai kuời tê bol gơ̆p in găm ơm tam ahò ndai, làng bol hơ̆ tŭs kờl bol khai; bol hơ̆ tŭs mơ tơmbềng bàr nơm ahò, tiăn tŭs mờr gơ krăm.
Tŭ Simon Petro gŏ be hơ̆, khai kun să dơ jơng Kơnràñ Jesu mơ đơ̆s: “Ơ Kơnràñ, dăn pleh ngài bơh añ, tài bơh añ lah cau tìs.” Kơyoa tŭ gŏ ka pa kŭp, bơta nrơ̆t-dơl gơ glòm khai mơ jơh ală cau ơm bal mơ khai. Jakobe mơ Joan, bàr nă kòn Zebeđe dê, lah bol gơ̆p Simon dê, krung be hơ̆ sơl. Kơnràñ đơ̆s mơ Simon: “Bañ ngòt; bơh ndo mê rơ̆p gơ̆s cau kŭp bơnŭs.” Wăs ahò rê hơ găh rau, lời jơh ală bơta, bol khai jăt Kơnràñ.
Hơ̆ jơnau đơ̆s Kơnràñ dê.
