Ngai Yàng poăn kàl Poăn-jơ̆t-Sơnăm B

Bơta đăl dùl: 2 Rb 36. 14-16, 19-23

Bơta hào gơjrañ mơ nùs tơpă-tơpài Kơnràñ dê geh ràng-tơlĭk tam bơta kong ơm ngài mơ bơta tơngklàs làng-bol dê.

Đăl tam sră bàr Rơndăp-broă dê.

Tam ală ngai hơ̆, jơh ală cau ăt-bồ bol kơiơng-yàng mơ làng-bol ơm-kĭs ờ dờn-song lơm, đòm-jăt ală jơnau ngkìr-ngkàc làng-bol bơdìh dê, bol khai tơnbơ̆ hìu duh-khoai neh geh Kơnràñ pơniăm-goh tam Jerusalem. Kơnràñ gơ̆s Yàng pàng yau bol khai, neh măng ngai sùm sồr bol ala-măt tŭs mơ bol khai, bơh Kơnràñ nđàc-sơngĭt làng-bol Khai mơ hìu duh-khoai Khai dê. Mơya bol khai tơnhiăl bol ala-măt Kơnràñ, sền-ờsơ̆p bơr Kơnràñ, mơ tơnnhiăl bol ala-bơr, tiăn tŭs, lồi-dŭt, bơta hào gơjrañ Kơnràñ dê neh tuh hơ đăng làng-bol Khai, mơ ờ rơgơi tơngklàs. Bol sò-tơ̆m neh chu hìu duh-khoai Kơnràñ dê, wà-phà tơrñăng bòn dờng Jerusalem, chu jơh ală gơlăng hìu mơ gŭc jơh ală phan màng. Dilah geh cau lơi klàs bơh măt đào, gen kong cèng rê hơ Babilon làng lơh dĭ-gơna bơtau mơ oh kòn bơtau dê, jơl tŭs rơnàng bơtau lơgăr Batư ơm-ăt, be hơ̆ gơlĭk di ngăn mơ jơnau Kơnràñ ngui bơr Jeremia, cau ala-bơr, mơ đơ̆s: jơl tŭs tŭ ù-dà geh gờm ngai Sabbat; bơh tam jơh ală ngai cŭ-cua, bol khai ờ rơgơi prăp wơl ngai Sabbat tam jơh poh jơ̆t sơnăm. Năm sơnrờp rơnàng Siro, bơtau lơgăr Batư, làng jơnau Kơnràñ ngui Jeremia, cau ala-bơr, yăl lài geh lơh gơ̆s, gen Kơnràñ bơchồl nhơm-nùs Siro, bơtau lơgăr Batư, cau bơtau sồr yăl-pơnrơ làm gùt ù-dà, mơ cĭh sră be do: “Do Siro, bơtau Batư yăl-tơlĭk: Kơnràñ gơ̆s Yàng trồ tiah neh pà añ in ală lơgăr hơ đăng măt ù, mơ Khai tờm neh sồr añ băc-bơtào Khai in dùl hìu duh-khoai hơ Jerusalem tam lơgăr Juđa. Gen tàng, cau lơi tam bol mê gơ rê mơ làng-bol Kơnràñ dê, Yàng rơ̆p ơm bal mơ khai, mơ khai cơnđoà lòt tĕ.”

Hơ̆ Jơnau đơ̆s Kơnràñ dê.

 

Nrĭ-nrềng: 136. 1-2, 3, 4-5, 6

Hw: Mpiăt añ gơ đềt dơ rơnồng-dờ, di lah añ ờ kah mê.

Hơ gah dà Babilon, hi nggui ñìm răc ñìm ròc, tŭ kah-kơlôi wơl bol niămgoh Sion. Hơ đăng ală tờm chi ñjrùh ntê tam tiah hơ̆, hi yồng ală kơlñi hi dê. Hw

Bơh tềng do , bol ling drơng-gàr sồr hi đơ̆schờ. Bol khai bơchồl hi be do: chờhờp tĕ, đơ̆scrih tĕ he in kơno gùng đơ̆scrih Sion. Hw

Mbe lơh hi rơgơi đơ̆scrih jờngrơ Yàng, tam ù năc bòn cau dê taih ? Ơ Jerusalem, di lah añ huĭ mê wơl, gen tê añ rơ̆p gơlơng. Hw

Mpiăt añ gơ đềt dơ rơnồng-dờ, di lah añ ờ kah mê. Dilah añ ờ tơnơn Jerusalem hơ đăng jơh ală bơta chơhờp. Hw

 

Bơta đăl bàr: Ep 2. 4-10

Bơh tìs-glài, oh mi chơ̆t, mơ bơh bơta hànggoh, oh mi geh tơngklàs.

Đăl tam sră Paulo, cau Dờp-pơyoa bơtoăh, pơyoa bol Epheso in.

Ơ oh mi kờñ-gơboh, Yàng gơ̆s Bơtau păs nùs tơpă-tơpài, bơh nùs gơboh dờng-màng gĭt nđờ, mơ Khai neh gơboh mơ he, tiăn tŭs tŭ tìs-glài lơh he in pal chơ̆t, gen Khai lơh he in kĭs wơl tam Kơnràñ Kristo, kơnờm bơh bơta hànggoh Khai dê mơ he geh tơngklàs; Khai neh ai he in geh kĭs wơl bal mơ ơm-ăt bal hơ đăng lơgăr trồ tam Jesu Kristo. Be hơ̆, Khai sơnđio nùs niăm-lơnhơn Khai dê bal mơ he tam Jesu Kristo, làng ràng-tơlĭk ală rơnàng hìngnau in geh gŏ bơta hànggoh păs-gơ̆s lìu-làc Khai dê. Ngăn be hơ̆ tờm bơh bơta hànggoh mơ kơnờm dơ nùs pindờn mơ oh mi geh tơngklàs: Do ờ di bơh bơta pràn oh mi dê, mơya lah bơta hànggoh Yàng dê; krung ờ di bơh broă lơh, làng ờ cau lơi rơgơi jờng ĭs să tờm. Bơh he lah jơi crơnggơ̆s Khai dê, neh geh klăc-mòn tam Jesu Kristo, làng lơh ală broă niăm mơ Kơnràñ neh săp-rơndăp, làng he cèng lơh jăt.

Hơ̆ jơnau đơ̆s Kơnràñ dê.

 

Jơnau đăl lài Jơnau Yălniăm: Jn 3. 16

Yàng neh gơboh mơ dunia, tiăn tŭs neh pà Kòn Dùl Khai dê, Làng cau lơi pindờn dơ Khai, rơ̆p geh bơta kĭs sùm.

Jơnau Yălniăm: Jn 3. 14-21

Yàng sồr Kòn Khai dê tŭs tam dunia, làng dunia bơh Khai mơ geh tơngklàs.

Đăl tam Jơnau Yălniăm niămgoh jăt Joan.

Tŭ hơ̆, Kơnràñ Jesu đơ̆s mơ Nikođemo be do: “Be Moise neh yờ bơ̆s tam blàng bràs, gen Kòn kòn-bơnŭs pal kong yờ be hơ̆ sơl, làng cau lơi pindờn, gen geh bơta kĭs sùm tam Khai.79 Kơyoa Yàng neh gơboh mơ dunia, tiăn tŭs neh pà Kòn Dùl Khai dê, làng cau lơi pindờn dơ Khai, gen ờ roh, mơya geh bơta kĭs sùm. Tài bơh Yàng ờ sồr Kòn tŭs tam dunia làng cahrơña dunia, mơya làng dunia bơh Khai mơ geh tơngklàs. Cau lơi pindờn dơ Khai, gen ờ kong cahrơña; mơya cau lơi ờ pindờn, gen neh kong cahrơña rau, tài bơh ờ pindờn dơ sơnđăn Kòn Dùl Yàng dê. Do lah bơta cahrơña: Bơta àng neh tŭs tam dunia, mơ kòn-bơnŭs neh gơboh mơ bơta jơngo rơlau mơ bơta àng; tài bơh ală broă bol khai dê lah iơ̆h. Kơyoa cau lơi lơh ală bơta iơ̆h, gen gơjrañ mơ bơta àng mơ ờ tŭs hơ bơta àng, làng ală broă Khai dê ờ kong lah-pơrhơng; mơya cau lơi lơh bơta ngăn-ngồn, gen tŭs hơ bơta àng, làng ală broă Khai dê geh sơnđio-tơlĭk, tài bơh neh geh lơh tam Yàng.”

 Hơ̆ jơnau đơ̆s Kơnràñ dê.