Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Mk 5. 1-4a
Tam mê rơ̆p gơlĭk Bơtau ăt-bồ Israel.
Đăl tam sră Mikea, cau ala-bơr dê.
Do bơr Kơnràñ đơ̆s: Ơ Belem-ephrata, mê dêt êt tam rơbô-rơhiăng bơnah ù Juđa, mơya tam mê rơ̆p gơlĭk dùl Bơtau ăt-bồ Israel, mơ tơnggu-me Khai geh bơh sơnrờp, bơh ală rài. Gen tàng, Khai rơ̆p săng-lời làng-bol Khai jơl tŭs tŭ dùl nă cau ùr di deh, rơ̆p deh kòn. Mpồl găm wơl tam oh mi mê, rơ̆p rê wơl mơ kòn sau Israel. Mê rơ̆p ntào kơ̆ mơ ê-lăm tam bơta pràn Kơnràñ dê, tam sơnđăn niămgoh dờng-rơyŭ Kơnràñ gơ̆s Yàng mê dê. Mơ bol khai rơ̆p rê wơl, bơh tŭ do mê rơ̆p gơjềng dờng-màng jơl tŭs lồi-dŭt plai ù. Bơh be hơ̆, mê rơ̆p gơ̆s tờm bơta ring-lơngai.
Hơ̆ jơnau đơ̆s Kơnràñ dê.
Nrĭ-nrềng: 79. 2ac mơ 3b, 15-16, 18-19
Hw: Ơ Kơnràñ gơ̆s Yàng hi, dăn nđàc sền hi, dăn tơlĭk muh-măt niămgoh Đi, gen hi rơ̆p geh klàs.
Ơ Bơtau ê-lăm Israel, dăn iăt tồr, Đi gơ̆s Bơtau ơm hơ đăng bol huềng-duh gràng-gàr mơ lĭk măt tam bơta àng-gơklŏ. Dăn Đi sơnđio tĕ pràn-gơnoăr Đi dê, mơ tŭs tĕ tơngklàs hi. Hw
Ơ Kơnràñ ală mpồl pràn, dăn rê wơl tĕ, bơh trồ jơnhoa, dăn Đi wèt sền mơ còp-cul suơn ño do. dăn pơgàng tờm ño mơ tê Đi neh tăm mơ ntê mơ Đi neh rơwăh. Hw
Dăn tơlĭk tĕ tê gràng-gàr hơ đah ma Đi, hơ đăng cau mơ Đi neh rơwăh. Mơ hi ờ găm nrah ngài mơ Đi tai, dăn Đi pà hi in bơta kĭs, gen hi rơ̆p hòi dăn sơnđăn niămgoh Đi. Hw
Bơta đăl bàr: Dt 10. 5-10
Ndo añ tŭs làng lơh jăt nùs Kơnràñ.
Đăl tam sră Paulo, cau Dờp-pơyoa bơtoăh, pơyoa bol Hebreo in.
Ơ oh mi kờñ-gơboh, tŭ tŭs tam dunia, Kơnràñ Jesu đơ̆s: Kơnràñ neh ờ kờñ phan gơsơ̆t lơh-yàng mơ phan-ơn pơdơng, mơya neh klăc-mòn añ in dùl să- jăn. Kơnràñ ờ dờp phan chu lơh-yàng mơ phan lơh-yàng rơmăl tìs. Gen añ đơ̆s: Ơ Kơnràñ, ndo añ tŭs làng lơh jăt nùs Đi dê, be neh đơ̆s gơrềng bơh añ tam gơl bồ păng sră. Sră hơ̆ sơntờm be do: Phan gơsơ̆t lơh-yàng, phan-ơn pơdơng, phan chu lơh-yàng mơ phan lơh-yàng rơmăl tìs, Yàng ờ kờñ krung ờ dờp sơl, bŭlah geh pồ-pơdơng jăt gùng-boh-lăm. Lồc gen Khai đơ̆s tai: Ơ Kơnràñ, ndo añ tŭs làng lơh jăt nùs Đi dê. Be hơ̆ neh sơrbì bơta lài làng bơtào gơ̆s bơta tơnơ̆, tờm bơh nùs kờñ hơ̆ mơ he geh lơh niămgoh, kơnờm bơh broă pồ-pơdơng Să Kơnràñ Jesu Kristo dùl dơ̆ tơl rau.
Hơ̆ jơnau đơ̆s Kơnràñ dê.
ALLELUIA: Lk 1. 38
Alleluia, alleluia. Do ùr duh-broă Kơnràñ dê, dăn gơlĭk gơ̆s añ in jăt be jơnau huềng-duh yal. Alleluia.
Jơnau Yălniăm: Lk 1. 39-45
Mbơh lơi añ geh mè Kơnràñ añ dê tŭs mơ añ.
Đăl tam Jơnau Yălniăm niămgoh jăt Luka.
Tam ală ngai hơ̆, Maria ñă-ntào, sơrbăc-sơrbăng lòt hơ tiah bơnơm, tŭs tam bòn dờng Juđa dê, mŭt tam hìu Zakaria mơ còp să Elisabeth. Gơlĭk gơ̆s lah, tŭ Elisabeth kơno jơnau còp să Maria dê, gen kòn tam kơndul khai sơnđohñchừn, mơ Elisabeth geh bềng Yàng Nhơm, khai driau mơ săp dờng mơ đơ̆s: “Ai geh yalniăm tam ală cau ùr, mơ plai-bơkào kơndul ai dê krung geh yalniăm. Mbơh lơi añ geh bơta do, lah mè Kơnràñ añ dê tŭs mơ añ ? Kơyoa do, tŭ tồr añ pa kơno jơnau còp să ai dê, gen kòn tam kơndul añ neh sơnđoh-ñchừn chờhờp. Bơtoăh cau neh pindờn in, kơyoa ală bơta Kơnràñ neh đơ̆s mơ khai, rơ̆p geh lơh gơ̆s wil-tơl.
Hơ̆ jơnau đơ̆s Kơnràñ dê.
