Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Broă 4. 8-12
Bơta tơngklàs ờ bàn gŏ tam dùl nă cau lơi ndai tai.
Đăl tam Sră Ală Broă Bol Dờp-pơyoa dê.
Tam ală ngai hơ̆, Petro geh bềng Yàng Nhơm, neh đơ̆s: Ơ bol ăt-bồ làngbol mơ kuăng kra, dăn iăt tĕ, tài jơnau ngai do hi kong cèng làng lùp-sơwì bơh broă niăm neh lơh dùl nă cau kơlte in, bơh gùng-dà mơ cau hơ̆ neh geh tơmbời, dăn oh mi mơ làng-bol Israel gĭt be do: Tờm bơh sơnđăn Jesu Kristo Nazareth, Kơnràñ he, cau mơ oh mi neh tơ̆s tơrnơ̆s, mơ Yàng neh ai kĭs wơl bơh bơta chơ̆t, tờm bơh sơnđăn Khai mơ cau do geh pràn-kơldăng be oh mi gŏ ndo. Khai tờm gơ̆s pơnai lŭ neh kong oh mi lah cau băc săng-sơrbì, neh gơjềng gơ̆s pơnai lŭ mum tơrñăng , mơ bơta tơngklàs ờ bàn gŏ tam dùl nă cau lơi ndai tai. Kơyoa, ờ gŏ geh dùl sơnđăn lơi ndai hơ đơm kơloàng trồ, neh geh pà kòn-bơnŭs in, làng pal kơnờm bơh sơnđăn hơ̆, mơ he geh tơngklàs.
Hơ̆ jơnau đơ̆s Kơnràñ dê.
Nrĭ-nrềng: 117. 1 mơ 8-9, 21-23, 26 mơ 28cd mơ 29
Hw: Pơnai lŭ mơ cau băc săng-sơrbì, neh gơ gơ̆s wơl pơnai lŭ mum tơrñăng.
Ưn-ngài tĕ Kơnràñ, bơh Khai pơha nùs, mơ bơta tơpă-tơpài Khai dê gơ̆s sùm. Jòi tŭs sơnđìng dơ Kơnràñ, gen niăm rơlau mơ sơnđìng dơ kòn-bơnŭs. Jòi tŭs sơnđìng dơ Kơnràñ, gen niăm rơlau mơ sơnđìng dơ bol kuăng-bơtau. Hw
Añ ưn-ngài Kơnràñ bơh Khai neh iăt bơr añ, mơ neh gơjềng Bơtau tơngklàs añ. Pơnai lŭ mơ bol cau băc săng-sơrbì, Neh gơ gơ̆s pơnai lŭ mum tơrñăng. Broă hơ̆ neh bơh Kơnràñ lơh gơlĭk, broă krơi-sơrbơi dơ đăp măt hi. Hw
Kơnràñ gơ̆s Yàng añ dê mơ añ ưn-ngài Kơnràñ, ơ Kơnràñ añ, añ driau yălniăm Đi. Ưn-ngài tĕ Kơnràñ, bơh Khai pơha nùs, bơh bơta tơpă-tơpài Khai dê gơ̆s sùm. Hw
Bơta đăl bàr: 1 Jn 3. 1-2
Khai be lơi, he rơ̆p gŏ Khai be hơ̆ sơl.
Đăl tam sră dùl Joan, cau Dờp-pơyoa bơtoăh dê.
Ơ bol kòn kờñ-gơboh, bol kòn sề tĕ: Nùs gơboh Yàng Bàp dê bal mơ he mbe lơi, làng he geh hòi lah oh kòn Yàng, mơ jơnau ngăn lah be hơ̆. Bơh be hơ̆ mơ dunia ờ đăl-gĭt he, bơh dunia ờ gĭt Khai. Ơ bol kòn kờñ-gơboh, tŭ do, he gơ̆s oh kòn Yàng, ai he rơ̆p gơlĭk gơ̆s mbe lơi, gen găm ờ hềt geh ràng-tơlĭk. He gĭt be do: Tŭ geh ràng-tơlĭk, gen he rơ̆p ndrờm be Khai, bơh Khai be lơi, gen he rơ̆p gŏ Khai be hơ̆ sơl.
Hơ̆ jơnau đơ̆s Kơnràñ dê.
ALLELUIA: Jn 10-14
Alleluia, Alleluia. Kơnràñ đơ̆s: Añ lah cau ê niăm: Añ gĭt ală belàt Añ dê, mơ ală belàt Añ dê gĭt Añ. Alleluia.
Jơnau Yălniăm: Jn 10. 11-18
Cau ê niăm phi bơta kĭs he dê bơh ală belàt in.
Đăl tam Jơnau Yălniăm niămgoh jăt Joan.
Tŭ hơ̆, Kơnràñ Jesu đơ̆s: “Añ lah cau ê niăm: cau ê niăm phi bơta kĭs he dê bơh ală belàt in; ai cau lơh apah, ờ di lah cau ê, ală belàt ờ di lah phan ĭs khai dê tàng gŏ so rơhau tŭs, khai săng ală belàt mơ dô – so rơhau kăp bol gơ mơ lơh gơprăh-gơpring – , khai dô tài bơh khai lah cau lơh apah mơ ờ gơkoă mơ khai gơrềng bơh ală belàt. Añ lah cau ê niăm: Añ gĭt ală belàt Añ dê, mơ ală belàt Añ dê gĭt Añ, be Bàp gĭt Añ, mơ Añ gĭt Bàp; mơ Añ phi bơta kĭs Añ dê bơh ală belàt in. Añ geh ală belàt ndai, bol gơ ờ gơrê mơ wàng do, Añ pal lăm bol gơ rê, mơ bol gơ rơ̆p iăt săp Añ, mơ rơ̆p gơ̆s dùl mpồl, dùl nă cau ê. Tài bơh hơ̆ Bàp gơboh mơ Añ, bơh Añ phi bơta kĭs Añ dê làng ai wơl gơ. Ờ geh cau lơi tă gơ bơh Añ, mơya Añ phi gơ bơh să tờm Añ. Añ geh gơnoăr phi gơ mơ geh gơnoăr ai wơl gơ. Jơnau-sồr do, Añ neh dờp bơh dơ Bàp Añ.”
Hơ̆ jơnau đơ̆s Kơnràñ dê.
