Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ose 2. 16b, 17b, 21-22
Añ rơ̆p tambau mơ mê jơl ală rài.
Đăl tam sră Ose cau ala-bơr dê.
Do Kơnràñ đơ̆s: Añ rơ̆p lăm mê mŭt tam tiah srau-ngềt. Añ rơ̆p pà mê in thòng Akor be mpồng kơnờm. Añ rơ̆p tambau mơ mê jơl ală rài. Añ rơ̆p tambau mơ mê tam bơta song-ring mơ song-dơpă, tam nùs gơboh mơ nđàc-sơngĭt. Añ rơ̆p tambau mơ mê tam bơta dờn-song, mơ mê rơ̆p gĭt Añ gơ̆s Kơnràñ.
Hơ̆ jơnau đơ̆s Kơnràñ dê.
Nrĭ-nrềng: 102. 1-2, 3-4, 8 mơ 10, 12-13
Hw: Kơnràñ gơ̆s Bơtau sơrmah-sơrmài mơ nđàc-sơngĭt.
Ơ sồp-soàn añ, yălniăm tĕ Kơnràñ, mơ jơh să añ, yălniăm tĕ sơnđăn niămgoh Khai. Ơ sồp-soàn añ, yălniăm tĕ Kơnràñ, mơ bañ tŭ lơi huĭ ală bơta niăm Khai dê. Hw
Khai neh hồ-lời ală bơta tìs bìr, mơ sơmbời mê bơh ală bơta tềl sồt. Khai tơwài să kĭs mê bơh bơta rung-rài, Khai pơn hơ đăng bồ mê mơ chèo tơpă-tơpài mơ hànggoh. Hw
Kơnràñ gơ̆s Bơtau sơrmah-sơrmài mơ nđàc-sơngĭt, adàr gơjrañ mơ gơboh lùng-làng. Khai ờ căhrơña hi jăt tìs hi dê, mơ ờ săl-tê jăt bơta iơ̆h hi dê. Hw
Krung ngài ngăn be Tô tŭs Jum, Khai neh cơm tìs-glài ngài bơh hi. Krung be cau bàp gơboh mơ oh kòn, Kơnràñ gơboh mơ bol cau lơi duh-ngòt Khai. Hw
Bơta đăl bàr: 2 Kr 3. 1b-6
Oh mi gơ̆s păng sră Kơnràñ Kristo dê bơh hi tào-cĭh.
Đăl tam sră bàr Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, chi kờñ duh, be bàr pe nă, hi pal geh sră yăl să hi mơ oh mi, ngolah bơh oh mi, be ală cau ndai. Sră hi dê, tờm gơ̆s oh mi, cĭh tơn tam nùs oh mi, mơ ală cau rơgơi gĭt mơ rơgơi đăl. Cau lơi krung gĭt loh oh mi gơ̆s păng sră Kơnràñ Kristo dê bơh hi tào-cĭh, geh cĭh ờ di mơ dà mờk, mơya lah mơ nhơm-ngăc Yàng kĭs sùm dê, ờ di cĭh hơ đăng ală păng lŭ, mơya lah cĭh hơ đăng nhơm-nùs oh mi. Hi pindờn be hơ̆ dơ đăp măt Yàng kơnờm bơh Kơnràñ Kristo. Ờ di hi rơgơi kơlôi-sơnơng bơta lơi gơ lơh be bơh să tờm hi, mơya bơta hơ̆ lah bơh dơ Yàng, Khai tờm gơ̆s Bơtau neh lơh hi in gơjềng cau dong-duh di-pal bơta bơrkoăt pa dê, ờ di sră cĭh dê, mơya nhơm-nùs dê: Bơh sră cĭh mìng tơnchơ̆t lơm, ai nhơm-nùs gen tơngkĭs.
Hơ̆ jơnau đơ̆s Kơnràñ dê.
ALLELUIA: Jn 17. 17b mơ a
Alleluia. Alleluia. Kơnràñ đơ̆s: Bơr Bàp dê lah bơta ngăn, dăn pơniăm-goh bol khai tam bơta ngăn. Alleluia.
Jơnau Yălniăm: Mk 2. 18-22
Cau bơrtơu găm ơm mơ bol khai.
Đăl tam Jơnau Yălniăm niămgoh jăt Marko.
Tŭ hơ̆, bol jăt-dờn Joan dê mơ bol Phariseo ơ̆t-sa. Geh cau tŭs đơ̆s mơ Kơnràñ: “Ñchi gơlơh bol jăt-dờn Joan dê mơ bol jăt-dờn mpồl Phariseo dê ơ̆t-sa, mơya bol jăt-dờn Đi dê ờ ơ̆t-sa taih ?” Kơnràñ Jesu đơ̆s mơ bol khai: “Bol năc ñô-bau rơgơi ơ̆t-sa, tam tŭ cau bơrtơu găm ơm bal mơ bol khai ơ ? Tam tŭ bol khai geh cau bơrtơu găm ơm bal mơ bol khai, gen bol khai ờ rơgơi ơ̆t-sa; Mơya rơ̆p tŭs ală ngai, tŭ cau bơrtơu kong tă-tơlĭk bơh bol khai, mơ tŭ hơ̆, bol khai rơ̆p ơ̆t-sa tam ngai hơ̆. Ờ geh cau lơi ai pơnồ biài tơme làng tơmbồl dơ ào klăr; di be hơ̆, pơnồ tơmbồl tơme lơh gơrồt wơl ào klăr, mơ chi sèt gơlĭk iơ̆h rơlau. Mơ ờ geh cau lơi tròc tơrnờm pa tam ală nhồng gơltau yau, di be hơ̆, tơrnờm rơ̆p lơh bơcăh ală nhồng gơltau, tơrnờm roh mơ ală nhồng gơltau krung roh sơl; mơya tơrnờm pa pal tròc tam ală nhồng gơltau pa.”
Hơ̆ jơnau đơ̆s Kơnràñ dê.
