Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Năm B
Bơta đăl dùl: L l 20. 1-17
Gùng-boh-lăm neh yăl-tơlĭk bơ Moise.
Đăl tam Sră Lĭk-lòt.
Tam ală ngai hơ̆, Kơnràñ yăl sồr ală jơnau do: “Añ gơ̆s Yàng mê, Bơtau neh tề-lăm mê lĭk bơh lơgăr Ejypto, bơh hìu dĭ-gơna. Mê ờ geh duh Yàng lơi ndai tai dơ đăp măt Añ. Bañ păc-sềr rùp mơ chi, ngolah cĭh-còr rùp ală phan-jơi hơ đăng trồ, tam tiah, tam dà, hơ đơm kơnàng ù. Bañ duh-khoai mơ duh-broă ală rùp-ràk hơ̆, bơh Añ gơ̆s Kơnràñ, Yàng mê dê, Yàng pràn-kơldăng, Yàng boăhgơjrañ, lơh glài cau kòn bơh tìs cau bàp jơl tŭs pe poăn rơnàng, ală cau gơjrañ mơ Añ, Añ tơlĭk nùs niăm-lơnhơn jơl ală rài bal mơ ală cau lơi duh-gơboh Añ, mơ dờn prăp ală jơnau-sồr Añ dê. Mê bañ ai sơnđăn Kơnràñ, Yàng mê dê, mơ lơh blăc, bơh Yàng ờ rơgơi mơ ờ lơh glài cau lơi ai sơnđăn Khai mơ lơh blăc. Mê kah tĕ pơniăm-goh ngai Sabbat. Mê lơh jơh ală broă tam prau ngai, găm ngai poh gơ̆s ngai Sabbat, gen gơ rê mơ Kơnràñ, Yàng mê dê. Tam ngai hơ̆, mê, kòn klau, kòn ùr, dĭ klau dĭ ùr, jơi-phan ròng, cau năc ơm rŭ tam hìu mê, jơh68 tơl ờ geh lơh broă lơi. Bơh tam prau ngai, Yàng neh crơnggơ̆s trồ, tiah, dà-lềng, mơ jơh tơl ală phan-jơi tam hơ̆, lồc gen Khai rơlô tam ngai poh. Gen tàng, Kơnràñ yălniăm mơ pơniăm-goh ngai Sabbat. Mê duh-adăt tĕ me bàp, làng mê geh kĭs jŏ-jòng tam lơgăr mơ Yàng rơ̆p pà mê in. Mê bañ gơsơ̆t cau, bañ lơh tìs bơrnàn, bañ kơñau, bañ lơh cơng blăc ơniai oh mi he, bañ hàm-hà phan cau, bañ ngờñ bau ùr gơ̆p-bơyô, dĭ klau dĭ ùr, kơnrồ, alàng mơ ală phan lơi lơi gơ̆p-bơyô dê.
Hơ̆ jơnau đơ̆s Kơnràñ dê.
Nrĭ-nrềng: 18. 8, 9, 10, 11
Hw: Ơ Kơnràñ, Đi geh bơr pà bơta kĭs sùm. Gùng-boh-lăm Kơnràñ dê niăm wil-tơl, crò pràn nhơm-nùs, Jơnau-sồr Kơnràñ dê kơ̆ sùm, tơnroh bơta bơrngơl. Hw
Jơnau-sồr Kơnràñ dê song-dơpă, tơnchờ nùs-tồr. Jơnau yăl Kơnràñ dê sàng-goh, pơnđàng muh-măt. Hw
Nùs duh-ngòt Kơnràñ niăm ngăn, găm geh sùm. Jơnau kờñ đơ̆s Kơnràñ dê ngăn-ngồn, song-dơpă rơlau jơh. Hw
Ală jơnau hơ̆ di-pal kờñ rơlau mơ màh, rơlau màh ngăn, lơngồt rơlau mơ dà sŭt mơ rơlau mpờng dà kròt sơl. Hw
Bơta đălbàr: 1 Kr 1. 22-25
Bol hi yăl-bơto Kơnràñ Kristo kong tơ̆s tơrnơ̆s dơ chikal, dùl jơnau tơntŭp oă-rà cau in, mơya gơ̆s dùl jơnau ngăc-ngăr bal mơ cau neh geh Kơnràñ rơwăh.
Đăl tam sră dùl Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, ală cau Juđe kờñ lùp ală tềl krơi, bol cau Kreko jòisơwì bơta ngăc-ngăr, ai bol hi, bol hi yăl-bơto Kơnràñ Kristo kong tơ̆s tơrnơ̆s dơ chikal, dùl jơnau tơntŭp cau Juđe in, dùl bơta sơnrăng bal mơ ală cau bơdìh, mơya bal mơ ală cau geh hòi, bŭlah uđe ngolah Kreko, gen Khai gơ̆s Kơnràñ Kristo, gơnoăr gơnrơh Yàng dê, gen lèt rơlau mơ bơta ngăc-ngăr kòn-bơnŭs dê, mơ bơta lơbơn-lơñơ Yàng dê, gen lèt rơlau mơ bơta pràn-kơldăng kòn-bơnŭs dê.
Hơ̆ jơnau đơ̆s Kơnràñ dê.
Jơnau đăl lài Jơnau Yălniăm: Jn 3. 16: Yàng neh gơboh mơ dunia, tiăn tŭs neh pà Kòn Dùl Khai dê, Làng cau lơi pindờn dơ Khai, gen ờ roh, mơya geh bơta kĭs sùm.
Jơnau Yălniăm: Jn 2. 13-25
Bol mê lơh tơrlah tĕ hìu duh-khoai do, mơ tam pe ngai Añ rơ̆p bơtào wơl gơ.
Đăl tam Jơnau Yălniăm niămgoh jăt Joan.
Mờr tŭs lèh Lòt Găn bol Juđe dê, Kơnràñ Jesu guh hơ Jerusalem. Khai gŏ tam hìu duh-khoai bol tăc kơnrồ, belàt, ntờp, mơ bol gơl priă găm nggui; Khai ai che lơh gai, bơtrơh jơh ală cau bơh hìu duh-khoai bal mơ belàt, Kơnrồ, lơh prihprah priă-jền bol gơl priă mơ tơlơ cơnờng; Khai đơ̆s mơ bol tăc ntờp: “Cèng-tơlĭk tĕ ală phan do bơh ndo! Bañ lơh hìu Bàp Añ gơ̆s hìu tăc phan.” Bol jăt-dờn Khai dê kah wơl lah neh geh cĭh: “Bơta duh-hur hìu Yàng in sa siăr añ.” Gen bol Juđe hơ wơl mơ đơ̆s mơ Khai: “Tềl lơi Ồng sơnđio bol hi in mơ lơh be hơ̆ ?” Kơnràñ Jesu hơ wơl mơ đơ̆s mơ bol khai: “Bol mê lơh tơrlah tĕ hìu duhkhoai do, mơ tam pe ngai Añ rơ̆p bơtào wơl gơ.” Gen bol Juđe đơ̆s: “Hìu duhkhoai do neh geh băc tam poăn jơ̆t prau sơnăm, mơ Ồng rơ̆p bơtào wơl gơ tam pe ngai ơ ?” Mơya Kơnràñ đơ̆s gơrềng bơh hìu duh-khoai lah să-jăn Khai. Gen tàng, tŭ Kơnràñ kĭs wơl bơh bol cau chơ̆t, bol jăt-dờn Khai dê kah wơl lah Khai neh đơ̆s jơnau hơ̆, mơ bol khai pindờn dơ Sră Goh mơ dơ jơnau Kơnràñ Jesu neh đơ̆s. Tam tŭ Kơnràñ ơm tam Jerusalem, tam ngai lèh Lòt Găn, geh gal cau pindờn dơ sơnđăn Khai, bơh gŏ ală tềl Khai dê mơ Khai neh lơh. Mơya să tờm Kơnràñ Jesu ờ pindờn bol khai, tài bơh Khai gĭt jơh ală cau, mơ Khai ờ càng cau lơi lơh cơng gơrềng bơh kòn-bơnŭs, kơyoa să tờm Khai gĭt geh chi lơi tam kòn-bơnŭs.
Hơ̆ jơnau đơ̆s Kơnràñ dê.
