Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Soph 3. 14-18a
Kơnràñ rơ̆p hờnchờ tài bơh mê.
Đăl tam sră Sophonia, cau ala-bơr dê.
Ơ kòn ùr Sion, đơ̆s crih gờm tĕ! Ơ Israel, chờ-hờp tĕ! Ơ kòn ùr Jerusalem, chờhờp mơ sơnđoh-ñchừn tĕ jơh nhơm-nùs! Kơnràñ neh tă wơl bơr yal glài mê, mơ neh tơnrŭc bol sò-tơ̆m mê dê. Bơtau Israel gơ̆s Kơnràñ ơm tam gùl mê, mê ờ găm ngòt jê-bòl tai. Tam ngai hơ̆, tam Jerusalem, cau rơ̆p đơ̆s be do: Ơ Sion, bañ ngòt, tê mê rơ̆p jơh lơgah! Kơnràñ gơ̆s Yàng mê, lah Bơtau pràn-kơldăng ơm tam gùl mê, Khai tờm tơngklàs mê. Khai chờhờp-chờchờr tài bơh mê. Khai nđàc nùs gơboh mơ mê, mơ tài bơh mê, Khai chờ hờp driau-gờm. Bol cau rồcroh săng-lời gùng-boh-lăm, añ rơ̆p trơgùm wơl bol khai, bơh bol khai krung lah oh kòn mê.
Hơ̆ jơnau đơ̆s Kơnràñ dê.
Nrĭ-nrềng: Is 12. 2-3, 4bcđ, 5-6
Hw: Sơnđoh-ñchừn mơ jờngrơ tĕ, bơh ơm tam gùl mê, geh Bơtau Niămgoh Israel dê dờng-rơyŭ ngăn.
Do Yàng, Bơtau Tơwài añ. Añ rơ̆p pindờn mơ lơh-lòt, añ ờ gơtrơ̆s-ngòt. Bơh Yàng gơ̆s bơta pràn añ dê mơ gơ̆s Bơtau añ jờngrơ. Khai gơjềng gơ̆s bơta tơngklàs añ dê. Hw
Bol mê rơ̆p rơhờn bơ̆ dà tam croh Bơtau tơngklàs dê. Driau jờng tĕ Kơnràñ, hòi-dăn tĕ mơ sơnđăn niămgoh Khai, Yal-pơnrơ tĕ ală làng-bol in gĭt ală broă krơi-sơrbơi Khai dê, kah tĕ sơnđăn Khai dờng-màng ngăn. Hw
Đơ̆s crih gờm tĕ Kơnràñ, bơh Khai neh lơh ală broă dờng-rơyŭ, yal-pơnrơ tĕ broă do hơ đăng khŏp plai ù. Ơ làng-bol Sion, sơnđoh-ñchừn mơ jờngrơ tĕ, Bơh ơm tam gùl mê, Bơtau Niămgoh Israel dê dờng-rơyŭ ngăn. Hw
Bơta đăl bàr: Phil 4. 4-7
Kơnràñ mờr tŭs.
Đăl tam sră Paulo, cau Dờp-pơyoa bơtoăh, pơyoa bol Philip in.
Ơ oh mi kờñ-gơboh, oh mi chờ tĕ sùm tam Kơnràñ! Añ đơ̆s wơl dùl dơ̆ tai: oh mi chờhờp tĕ. Bơta răm-sòr oh mi dê pal pơnđàng àng hơ đăp măt ală cau, bơh Kơnràñ neh mờr tŭs. Oh mi bañ kơlôi-kơnòl chi lơi, mơya tam tŭ răc-dăn, oh mi ràng-tơlĭk tĕ ală bơta wờl-kờñ hơ Kơnràñ, bơh jơnau răc mơ bơr khoai-dăn dùl bal mơ bơr ưn-ngài. Mơ bơta ring-lơngai Yàng dê lèt-găn ală tơngoh wă-wờng, rơ̆p prăp-gàr nùs-tồr oh mi tam Kơnràñ Jesu Kristo.
Hơ̆ jơnau đơ̆s Kơnràñ dê.
ALLELUIA: Is 61. 1
Alleluia, alleluia. Nhơm Kơnràñ dê hơ đăng añ, pơyoa añ yăl Jơnau Yălniăm bol rơbah in. Alleluia.
Jơnau Yălniăm: Lk 3. 10-18
Be hơ̆, ñchi bol hi pal lơh taih ?
Đăl tam Jơnau Yălniăm niămgoh jăt Luka.
Tŭ hơ̆, ală mpờl làng-bol lùp Joan mơ đơ̆s: “Be hơ̆, ñchi bol hi pal lơh taih ?” Hơ wơl, khai đơ̆s mơ bol khai: Cau lơi geh bàr blah ào, tam pà tĕ cau ờ geh in; mơ cau lơi geh phan sa, krung lơh tĕ be hơ̆ sơl.” Krung geh bol dăr-dia tŭs làng geh pơnđum, mơ bol khai đơ̆s mơ khai lah: “Ơ Pôgru, ñchi bol hi pal lơh taih ?” Khai đơ̆s mơ bol khai: “Bol mê bañ lơh chi lơi rơlau mơ bơta neh rơndăp- ơn bol mê in.” Bol ling krung lùp khai mơ đơ̆s: “Bol hi tai, ñchi bol hi pal lơh ?” Khai đơ̆s mơ bol khai: “Bol mê bañ rồn-bơklơn cau lơi, krung bañ pơrdah cau lơi in, mơya ring nùs tĕ mơ priă tơngai bol mê dê.” Bơh làng-bol găm kơ̆p-gơn mơ jơh ală cau găm kơlôi tam nùs gơrềng bơh Joan, khai tờm lah Kristo ngolah ờ ? Joan hơ wơl mơ jơh ală cau lah: “Añ, Añ pơnđum bol mê mơ dà. Mơya geh cau pràn rơlau mơ añ tŭs, añ ờ pal hồ che khŏ Khai dê: tờm Khai rơ̆p pơnđum bol mê tam Yàng Nhơm mơ ồs; tê Khai ăt đồng làng puh kloh kòi tam blàng, mơ tơrgùm kòi rơlai ơn tam đăm Khai dê, ai kòi ñsiăp, gen Khai rơ̆p chu tam ồs ờ gŏ chơ̆t.” Joan găm bơrchul nùs làng-bol mơ rà jơnau ndai, mơ yal jơnau yal niăm bol khai in.
Hơ̆ jơnau đơ̆s Kơnràñ dê.
