Ngai Yàng pe kàl Lòt Găn

Bơta đăl dùl: Broă 3. 13-15, 17-19

Bơtau pà bơta kĭs, gen oh mi neh tơnchơ̆t Khai rau, mơya Yàng neh ai Khai in kĭs wơl bơh bơta chơ̆t.

Đăl tam Sră Ală Broă Bol Dờp-pơyoa dê.

Ngai hơ̆, Petro tơlĭk săp đơ̆s mơ làng-bol be do: Ơ bol cau Israel, Yàng ală pàng-yau Abraham, Isaac mơ Jakop, Yàng pàng-yau he dê, neh tơngklŏ sơnđăn Kơnràñ Jesu, Kòn Khai dê, Bơtau mơ oh mi neh tơnjào, mơ pơndăng-săng dơ đăp măt Pilato, tam tŭ Pilato sơwì lah pal hồ-lời Khai. Oh mi neh pơndăng-săng Bơtau Niămgoh, Bơtau Song-dơpă, mơ dăn hồ-lời he in cau tơnchơ̆t cau, ai Bơtau pà bơta kĭs, gen oh mi tơnchơ̆t Khai rau, mơya Yàng neh ai Khai in kĭs wơl bơh bơta chơ̆t, bơta hơ̆ hi dăn lơh cơng. Ơ oh mi, mơya añ gĭt oh mi neh lơh-lòt bơh ờ gĭt, krung be ală cau ăt-bồ oh mi dê neh lơh. Yàng neh bơsir broă Khai neh ngui bơr bol ala bơr mơ yăl lài. Bơtau Kristo Khai dê pal kong jê-yăn. Be hơ̆ oh mi di ềng-màl mơ rê wơl mơ Yàng, làng tìs-glài oh mi dê geh jùt-kloh.

Hơ̆ jơnau đơ̆s Kơnràñ dê.

 

Nrĭ-nrềng: 4. 2, 4, 7, 9

Hw: Ơ Kơnràñ, dăn sòl-pơnđàng muh-măt Đi dê hơ đăng hi.

Tŭ añ răc-dăn, Kơnràñ iăt, ơ Kơnràñ song-dơpă añ dê, Đi neh tơngklàs añ tam bơta kòl-yăn, dăn nđàc-sơngĭt mơ iăt bơr añ răc-dăn. Hw

Pal gĭt be do Kơnràñ sền dờng-màng cau niămgoh Khai dê, Kơnràñ rơ̆p iăt añ, tŭ añ răc-dăn mơ Khai. Hw

Gĭt-nđờ cau đơ̆s: ñcau sơnđio he in gŏ bơta niăm wil-tơl taih ? Ơ Kơnràñ, dăn sòl-pơnđàng muh-măt Đi dê hơ đăng hi. Hw

Geh ring-lơngai, añ rơ̆p tơmbĭc să, gen lơhă bĭc mơ, bơh, ơ Kơnràñ, mìng Đi ai añ in ring-lơngai lơm. Hw

 

Bơta đăl bàr: 1 Jn 2. 1-5a

Khai tờm gơ̆s phan lơh-yàng săl tìs, ờ di mìng he in lơm, mơya găm jơh dunia in tai.

Đăl tam sră dùp Joan, cau Dờp-pơyoa bơtoăh dê.

Ơ bol kòn kờñ-gơboh, añ cĭh ală jơnau do bol kòn in, làng bol kòn bañ lơh tìs tai. Mơya dilah geh cau lơi neh lơh tìs, gen he geh Jesu Kristo, Bơtau Songdơpă, gơ̆s cau dong-tò dơ đăp Yàng Bàp. Khai tờm gơ̆s phan lơh-yàng săl tìs he dê, ờ di mìng he in lơm, mơya găm săl tìs jơh dunia in tai. Tờm bơh bơta do mơ he gĭt loh wơl lah he gĭt Kơnràñ Jesu, dilah he prăp ală jơnau-sồr Khai dê. Cau lơi đơ̆s he gĭt Khai, mơ ờ prăp jơnau-sồr Khai dê, lah cau đơ̆s blăc, mơ tam cau hơ̆ ờ geh jơnau ngăn. Ai cau lơi prăp bơr Khai, gen ngăn, nùs gơboh Yàng dê neh niăm wil-tơl tam cau hơ̆.

Hơ̆ jơnau đơ̆s Kơnràñ dê.

 

ALLELUIA: Lk 24. 32

Alleluia, Alleluia. Ơ Kơnràñ Jesu, dăn yăl-mblàng hi in ală bơr Sră Gŏh, dăn lơh nhơm-nùs hi in duh-hur tŭ iăt Đi đơ̆s mơ hi. Alleluia.

Jơnau Yălniăm: Lk 24. 35-48

Bol khai đăl-gĭt Kơnràñ tam tŭ Kơnràñ pĕt bañ.

Đăl tam sră Jơnau Yălniăm niămgoh jăt Luka.

Tŭ hơ̆, bàr nă cau jăt-dờn bơh Emmaus rê wơl, yăl wơl ală bơta neh gơlĭk gơ̆s tam gùng, mơ mbe lơi bol khai neh đăl-gĭt Kơnràñ tam tŭ Kơnràñ pĕt bañ. Tam tŭ bol khai đơ̆s ală bơta hơ̆, gen să tờm Kơnràñ ntào tam gùl bol khai mơ đơ̆s mơ bol khai: “Ring-lơngai bol kòn in!” Mơya bol khai nrơ̆t-dơl mơ rơngòt, tồn lah gŏ huềng. Kơnràñ đơ̆s mơ bol khai: “Ñchi bơh tài bol kòn nrơ̆t-dơl, mơ ñchi gơlơh ală jơnau kơlôi-sơnơng gơguh tam nùs bol kòn taih ? Sền tĕ tê Añ mơ jơng Añ, bơh tờm lah Añ! Bư tĕ dơ Añ mơ sền tĕ, tài bơh huềng ờ geh poăc mơ ntìng, be bol kòn gŏ Añ geh.” Tŭ neh đơ̆s be hơ̆ rau, Kơnràñ sơnđio tê mơ jơng bol khai in. Tam tŭ bol khai găm ờ hềt pindờn tài bơh chờhờp mơ găm ai lơh krơi, gen Kơnràñ đơ̆s mơ bol khai: “Tềng do, bol kòn geh chi lơi sa sơl ờ ?” Bol khai cèng Kơnràñ in dùl pĕt ka buh. Kơnràñ dờp mơ sa dơ đăp bol khai. Kơnràñ đơ̆s mơ bol khai: “Hơ̆ lah ală jơnau Añ neh đơ̆s mơ bol kòn tŭ Añ găm ơm bal mơ bol kòn, lah pal gơlĭk gơ̆s wil-tơl jơh ală jơnau neh geh cĭh gơrềng bơh Añ tam Gùng-boh-lăm Moise dê, tam Ală jơnau ala-bơr mơ tam Ală jơnau nrĭ-nrềng.” Tŭ hơ̆, Kơnràñ pờ bồ-tồr bol khai in làng gĭt-wă Sră Goh. Kơnràñ đơ̆s mơ bol khai: “Neh geh cĭh be hơ̆, lah Bơtau Kristo pal kong jê-yăn mơ ngai pe kĭs wơl bơh bol cau chơ̆t, mơ pal ai sơnđăn Khai yăl-bơto bơta ềng-màl làng geh hồ tìs tam jơh ală làng-bol, sơntờm bơh Jerusalem. Bol kòn lah cau cơng ală bơta hơ̆.”

Hơ̆ jơnau đơ̆s Kơnràñ dê.