Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Neh 8. 2-4a, 5-6, 8-10
Bol khai đăl tam sră Gùng-boh-lăm, mơ cau rơgơi wă jơnau neh đăl.
Đăl tam sră Nehemi, cau ala-bơr dê.
Ngai hơ̆, Esdras, cau kơiơng-yàng cèng sră Gùng-boh-lăm hơ đăp mpồl pơrjum, geh cau ùr, cau klau mơ jơh ală cau rơgơi wă Gùng-boh-lăm. Ngai hơ̆ lah ngai sơnrờp kơnhai poh. Bơh drim tŭs gùl ngai, Khai ntào tam tiah găl cau, hơ đăp mpồng dà, đăl sră dơ đăp măt cau klau, cau ùr mơ ală cau rơgơi wă Gùngboh-lăm. Jơh ală làng-bol sơrkềng tồr lơm iăt đăl sră Gùng-boh-lăm. Esdras ntào hơ đăng kơnờl lơh mơ chi làng đăl sră, khai lì sră dơ đăp măt làng-bol, bơh khai ntào hơ tiah jơnhoa rơlau cau.
Tŭ khai lì sră, gen jơh ală cau ntào lơm. Esdras yălniăm Kơnràñ gơ̆s Yàng Dờng Rơlau Jơh. Jơh mơ làng-bol pờ tê hơ wơl: Amen, Amen. Bol khai kun să mơ bĭc dŭp dơ đăp Yàng, muh-măt bol khai kun kèr ù. Dùl mpồl cau đăl dơ̆ dùl bơnah tam sră Gùng-boh-lăm Kơnràñ, yăl-mblàng jơnau-gùng kờñ đơ̆s, mơ cau wă wơl jơnau neh đăl. Nehemi lah kuăng ăt bồ kơnhoàl, Esdras lah cau kơiơng-yàng mơ cĭh sră, ală pôgru Levi bơtê-bơto làng-bol, đơ̆s mơ bol khai be do: Ngai do geh pơniămgoh pơdơng Kơnràñ gơ̆s Yàng bol he in, oh mi bañ geh bơta moăt chơ̆t, ñìm-răc ñìm-ròc. Bơh tŭ hơ̆ jơh mơ làng-bol ñìm-răc ñìm-ròc tŭ kơno đăl ală jơnau tam Gùng-boh-lăm. Bol khai đơ̆s mơ làng-bol be do: Lòt tĕ sa poăc tơngi, mơ ñô tơrnờm bơkah, pơyoa tĕ gơ bol cau ờ hềt geh crăp-rơcăng bơnah tờm in, bơh ngai do gơ̆s ngai niămgoh pơdơng Kơnràñ in, bañ moăt-jrùng, bơh bơta chờ Kơnràñ dê gơ̆s pôs đồng oh mi dê!
Hơ̆ jơnau đơ̆s Kơnràñ dê.
Nrĭ-nrềng: 18B. 8, 9, 10, 15
Hw: Ơ Kơnràñ, Bơr Đi dê gơ̆s Nhơm mơ bơta kĭs.
Gùng Kơnràñ dê niăm wil-tơl, tơmpràn nùs-nhơm. Jơnau-sồr Kơnràñ dê kơ̆ sùm, tơnroh bơta bơrngơl. Hw
Gùng bơtăn Kơnràñ dê song-dơpă, tơnchờ nùs-tồr. Jơnau-sồr Kơnràñ dê sàng-goh, pơnđàng muh-măt. Hw
Nùs duh-ngòt Kơnràñ niăm ngăn, găm sùm ală rài. Jơnau yăl-sồr Kơnràñ dê ngăn-ngồn, song-dơpă tơl jơh. Hw
Dăn Kơnràñ dờp ală jơnau bơr añ yăl-tơnggĭt, mơ jơnau nùs añ kơlôi-sơnơng dơ đăp măt Đi. Ơ Kơnràñ gơ̆s Bơnàng Lŭ, gơ̆s Bơtau Tơwài añ. Hw
Bơta đăl bàr: 1 Kr 12. 12-30
Oh mi gơ̆s să-jăn Kristo dê, mơ kờp nă gơ̆s dùl bơnăh.
Đăl tam sră dùl Paulo, cau Dờp-pơyoa bơtoah, pơyoa bol Korinto in.
Ơ oh mi kờñ-gơboh, be să-jăn gơ̆s dùl, mơ geh rà bơnăh, mơ jơh ală bơnăh bŭlah rà, mơya gơ̆s mìng dùl să-jăn, gen Kơnràñ Kristo krung be hơ̆ sơl. Kơyoa tam dùl Yàng Nhơm, jơh ală he dờp pơnđum làng lơh gơ̆s dùl să-jăn, bŭlah Juđa ngolah Grek, khăt gơboh ngolah dĭ-gơna, mơ jơh ală he neh hùc bal tam dùl Yàng Nhơm.
Bơh să-jăn ờ di lah mìng dùl bơnăh, mơya rà bơnăh. Di jơng he đơ̆s: Bơh añ ờ di lah tê, gen añ ờ gơrê mơ să-jăn; di be hơ̆ mơ gơ ờ gơrê mơ să-jăn sơl ờ ? Mơ di tồr he đơ̆s: Bơh añ ờ di lah măt, gen añ ờ gơrê mơ să-jăn; di be hơ̆ mơ gơ ờ gơrê mơ să-jăn sơl ờ ? Di jơh mơ să-jăn lah măt lơm, gen ntềng đah lah tồr taih ? Di jơh mơ să-jăn lah tồr lơm, gen ntềng đah lah mŭh taih ?
Gen tàng, Yàng neh tơnơn ală bơnăh, mơ kờp bơnăh ơm tam să-jăn be nùs Khai kờñ. Di jơh tơl lah mìng dùl bơnăh lơm, gen mbe rơgơi gơ̆s să-jăn taih ? Ngăn be hơ̆, geh rà bơnăh, mơya geh dùl să-jăn. Măt ờ rơgơi đơ̆s mơ tê: Añ ờ càng mê. Bồ krung ờ rơgơi đơ̆s mơ jơng: Añ ờ càng bol mê. Mơya rơlau tai, ală bơnăh să-jăn sền gơlơh lơbơn rơlau, gen pal geh rơlau.
Mơ ală bơnăh he sền lah ờ hoăn gơklŏ, gen wơl lah ală bơnăh he kờp lah gơklŏ rơlau; mơ ală bơnăh ờ hoăn niăm-bơnĕ, gen wơl geh he pơnờm rơlau, găm ală bơnăh niăm-bơnĕ, gen wơl ờ càng be hơ̆. Mơya Yàng neh ơn rơndăp să-jăn, làng chi lơi ờ hoăn gơklŏ, geh gơklŏ rơlau. Be hơ̆, ờ geh bơta căh ĭs tam să-jăn, mơya lah làng ală bơnăh kơlôi-kơnòl bơta kuơmàng bal.
Di lah dùl bơnăh kong jê, gen jơh ală bơnăh ndai gơ tờp jê bal; ngolah dùl bơnăh geh gơklŏ, gen jơh ală bơnăh geh chờ bal. Ai oh mi, oh mi gơ̆s să-jăn Kơnràñ Kristo mơ gơ̆s bơnăh Khai dê, kờp nă geh broă tờm ĭs he dê. Geh bol cau Yàng neh bơtào tam Pơrjum-niăm, lài jơh lah bol Dờp-pơyoa, lồc gen lah bol ala-bơr, pe lah bol jăk-chài; pơnjăt tai lah gơnoăr lơh broă gơnrơh, ală bơta tơmbời kòp, ală broă niăm-nđàc, ăt-gàr, đơ̆s rà dà đơ̆s. Gen jơh tơl ală cau lah Dờp-pơyoa sơl ờ ? Jơh tơl lah ala-bơr sơl ờ ? Jơh tơl lah jăk-chài sơl ờ ? Jơh tơl geh bơta lơh broă gơnrơh sơl ờ ? Jơh tơl geh bơta tơmbời kòp sơl ờ ? Jơh tơl đơ̆s rà dà đơ̆s sơl ờ ? Jơh tơl geh bơta yăl-mblàng sơl ờ ?
Hơ̆ jơnau đơ̆s Kơnràñ dê.
ALLELUIA: Lk 4. 18-19
Alleluia. Alleluia. Kơnràñ neh pơyoa añ yăl Jơnau Yălniăm bol rơbah in, yăl-pơnrơ bơta hồ-lời bol kong jàm in. Alleluia.
Jơnau Yălniăm: Lk 1. 1-4; 4. 14-21
Ngai do, jơnau Sră-goh do dơ tồr bol mê neh gơlĭk gơ̆s di ngăn.
Sơntờm Sră Jơnau Yălniăm niămgoh jăt Luka.
Kơyoa geh găl cau neh lơh-ngăn săp-rơndăp jơnau yăl wơl ală broă neh gơlĭk gơ̆s wil-tơl tam bol he, jăt be tơmo ală cau bơh sơnrơp neh gŏ mơ neh gơ̆s bol dongbroă jơnau đơ̆s dê, neh jào wơl bol he in, añ gŏ lah, tơnơ̆ mơ tŭ neh sền-sơwì jơh ală bơta bơh sơnrờp, pal jăt gùng săp-rơndăp cĭh wơl ồng in nền-cê, ơ Theophile niăm rơyŭ ngăn, làng ồng gĭt bơta kơ̆-nhăp ală jơnau đơs dê, mơ gơrềng bơh ală jơnau hơ̆ ồng neh geh bơto.
Tŭ hơ̆, Kơnràñ Jesu rê wơl tam Galilea mơ pràn-gơnoăr Huềng Nhơm dê, mơ tiơng-pơnrơ Khai gơrề làm jơh kơnhoàl. Khai bơto tam ală hìu-pơrjum bol khai dê, mơ geh jơh ală cau tơngklŏ. Khai tŭs tam Nazareth, tềng hơ̆ khai neh geh siăm-ròng, mơ jăt be bơta ờs – mờng Khai dê, ngai sabbat Khai mŭt tam hìu-pơrjum, mơ ñă-ntào đăl sră. Cau jào Khai in sră Isaia, cau ala-bơr; mơ tŭ pờ sră, Khai gŏ păng tềng hơ̆ neh geh cĭh: “Nhơm Kơnràñ dê hơ đăng Añ; tài bơh Khai neh bong jiờu Añ in, pơyoa Añ yăl Jơnau Yălniăm bol rơbah in, yă-pơnrơ bơta hồ-lời bol kong jàm in, bơta àng măt bol jơngo in, ai bol kong rồn-bơklơn in geh khăt-gơboh. Yăl-pơnrơ sơnăm hànggoh Kơnràñ dê.” Kơnràñ dơpê sră, jào wơl dơ cau dong-broă mơ nggui; mơ măt jơh ală cau tam hìu-pơrjum wèt hơ Khai. Kơnràñ sơntờm đơs mơ bol khai: “Ngai do, jơnau Sră Goh do dơ tồr bol mê neh gơlĭk gơ̆s di ngăn.”
Hơ̆ jơnau đơ̆s Kơnràñ dê.
