Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: 1 Bơtau 17. 10-16
Mò aruh-bàng ai kơmbŭh lơh dùl nơm bañ dêt, mơ cèng tŭs Elia in.
Đăl tam sră dùl Bol Bơtau.
Tam ală ngai hơ̆, Elia, cau ala-bơr, ñă-ntào lòt gùng tŭs Sarepta. Tŭ khai tŭs hơ đăp mpồng bòn, khai gŏ dùl nă cau aruh-bàng găm khòm lòng, khai hòi mò hơ̆ mơ đơ̆s mơ mò be do: Dăn cèng añ in dŭt dà tam nhồng làng añ hùc. Sơdăng mò hơ̆ lòt ai dà, khai hòi wơl mơ đơ̆s: Dăn krung cèng añ in dùl gơl bañ. Mò hơ: Geh Kơnràñ gơ̆s Yàng kĭs sùm lơh cơng: Añ ờ geh bañ lài, añ mìng găm dùl mbăt kơmbŭh tam yăng mơ dŭt jiờu tam gri. Ndo añ khòm bàr pe nơm lòng rê gơm gơ añ in mơ kòn klau añ in sa, lồc gen chơ̆t sơl. Elia hơ wơl mơ mò be do: Ai bañ kơnòl, lòt gơ ĭh mơ lơh be ai neh đơ̆s. Mơya, bal mơ dŭt kơmbŭh hơ̆, lài jơh, lơh tĕ añ in dùl nơm bañ dêt, cèng hơ do añ in, tơnơ̆ hơ̆ lơh tĕ ai in mơ kòn klau ai in. Kơyoa Kơnràñ gơ̆s Yàng Israel yăl be do: Yăng kơmbŭh ờ jơh mơ gri jiờu ờ hŭc jơl tŭs ngai Kơnràñ ai mìu gơ dùh hơ đăng măt ù. Mò lòt lơh jăt bơr Elia; tờm ồng mơ mò bal mơ jơh cau hìu tơl sa lơm; bơh ngai hơ̆ yăng kơmbŭh ờ jơh mơ gri jiờu ờ hŭc be bơr Kơnràñ neh ngui Elia làng yăl.
Hơ̆ jơnau đơ̆s Kơnràñ dê.
Nrĭ-nrềng: 145. 6b-7a, 7b-8, 9-10
Hw: Ơ sồp-soàn añ, jờngrơ tĕ Kơnràñ
Kơnràñ tơngklàs cau kong rồn-bơklơn, cau jơgloh-tơhìr Khai tơnhờm. Kơnràñ tơngklàs bol cau kong ơm ngài. Hw
Cau jơngo măt Khai ai geh sền gŏ, bơntào cau kồl bŭt in, Kơnràñ gơboh mơ ală cau song-dơpă. Hw
Kơnràñ đơng-dong cau ơm bàng, cau kòn đời, mơya wà-phà ală kai bol iơ̆h-bơsăk dê. Ơ Sion, Kơnràñ gơ̆s Yàng mê dê, Khai rơ̆p ơm ăt jơl ală rài. Hw
Bơta đăl bàr: Hebrơ 9. 24-28
Kơnràñ kristo mìng lơh-yàng să tờm dùl dơ̆ lơm làng tơnroh oă-rà tìs-glài.
Đăl tam sră Paulo, cau Dờp-pơyoa bơtoăh, pơyoa bol Hebrơ in.
Ơ oh mi kờñ-gơboh, Kơnràñ Jesu ờ mŭt gơlăng niămgoh bơh tê cau dunia lơh gơ̆s, gơ mìng lah rùp-bơnòl gơlăng niămgoh ngăn, mơya Khai mŭt tam lơgăr trồ, làng bơh ndo tơlĭk să dơ đăp măt Yàng tài bơh he. Khai ờ găm pồ-pơdơng să tờm rà dơ̆ tai, be cau lơh Yàng dờng mŭt gơlăng niămgoh dùl năm dùl dơ̆ bal mơ mhàm ờ di he dê. Di ờ be hơ̆, bơh bŭt trồ bŭt tiah, Khai neh păl chơ̆t rà dơ̆. Mơya bơh ndo jơl tŭs lồi-dŭt trồ tiah, Khai mìng tơlĭk să dùl dơ̆ lơm lơh-yàng să tờm làng tơnroh tìs-glài. Be neh rơndăp-ơn, kòn-bơnŭs mìng chơ̆t dùl dơ̆ lơm be lơi, tơnơ̆ hơ̆ lah căhrơña, gen Kơnràñ Kristo krung gơsơ̆t-pơdơng dùl dơ̆ lơm be hơ̆ sơl, làng tơnroh tìs-glài oă-rà cau dê. Khai rơ̆p tơlĭk să dơ̆ bàr, ờ di làng tơwài tìs, mơya làng tơngklàs bol cau lơi gơn-kơnờm dơ Khai.
Hơ̆ jơnau đơ̆s Kơnràñ dê.
ALLELUIA: Mt 24. 42a mơ 44
Alleluia. Alleluia. Bol kòndrơng-kơ̆p tĕ mơ răk-rơcăng tĕ, tài bơh jiờ lơi bol kòn ờ gĭt, gen Kòn kòn-bơnŭs rơ̆p tŭs.Alleluia.
Jơnau Yălniăm: Mk 12. 38-44
Cau ùr-bàng rơbah do neh ơn oă rơlau jơh.
Đăl tam Jơnau Yălniăm niămgoh jăt Marko.
Ngai hơ̆, tam jơnau-bơto, Kơnràñ đơ̆s: “Prăp-gàr să tĕ bơh bol gơnoăr-cĭh, lah bol kờñ lòt pơrwài mơ ào jrùh mơ gen cau đơ̆s niăm-să tam gùng-dà, nggui dơ ală cơnờng hơ đăp tam ală hìu-pơrjum, mơ ală anih hơ đăp tam ală bơta ñô- sa, bol khai sa loăn ală hìu-đăm bol ùr-bàng mơ lơh be răc-dăn jòng gùng. Bol khai rơ̆p dờp bơta căhrơña kơnjơ̆ rơlau.”
Nggui tam toh mơ đài priă, Kơnràñ sền mbe mpồl làng-bol ơn priă tam đài; geh găl cau păs ơn oă. Krung geh dùl nă cau ùr-bàng rơbah tŭs ơn bàr đŏng-trà, hơ̆ lah dùl bơnăh poăn đŏng-su. Hòi bol jăt-dờn Khai dê tŭs, Kơnràñ đơ̆s mơ bol khai: “Di ngăn, Añ đơ̆s mơ bol kòn: Cau ùr-bàng rơbah do neh ơn oă rơlau mơ jơh ală cau neh ơn tam đài. Kơyoa jơh ală cau ơn bơh bơta jơngkăh bol khai dê, ai cau ùr do ơn bơh bơta siơ̆u-siăr khai dê, lah jơh ală bơta khai geh, jơh mơ phan ròng să khai dê.”
Hơ̆ jơnau đơ̆s Kơnràñ dê.
