Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Jr 31. 7-9
Añ rơ̆p ai nùs tơpă-tơpài tề-lăm cau jơngo mơ kuĕt-kơlte.
Đăl tam sră Jeremia, cau ala-bơr dê.
Do, Kơnràñ đơ̆s: Ơ Jakop, chờhờp-chờchờr tĕ, nggà-wao tĕ dơ bồ ală làng-bol bơdìh, tơlĭk tĕ săp mpong mơ đơ̆scrĭh be do: Ơ Kơnràñ, klàs tĕ làng-bol Đi dê gơ̆s bol cau gơ lời kĭs tam Israel. Do, Añ rơ̆p tề-lăm bol khai rê wơl bơh đah Tô, rơ̆p tơrgùm wơl bol khai bơh nhàr-àr plai ù, tam bol khai rơ̆p geh cau jơngo, kuĕt-kơlte, ơm bun mơ deh kòn, tam lòt bal bal, lơh gơjềng dùl mpồl-pơrjum găl ngăn ràn rê hơ do. Bol khai lòt ndăng ñìm ndăng, Añ rơ̆p ai nùs tơpă-tơpài mơ tề-lăm bol khai rê wơl, Añ rơ̆p lăm bol khai lòt hơ đăng gùng ring, tiă găn ală croh dà, bol khai ờ di gơtŭp gơplơ̆ hơ đăng gùng lòt, bơh Añ neh gơjềng Bàp tờm làng-bol Israel, mơ Ephraim gơ̆s kòn tơnhoa Añ dê.
Hơ̆ jơnau đơ̆s Kơnràñ dê.
Nrĭ-nrềng: 125. 1-2ab, 2cd-3, 4-5, 6
Hw: Kơnràñ neh pơha nùs mơ hi, gen hi chờhờp-chờchờr.
Tŭ kơnràñ cèng ală cau Sion kong kŭp rê wơl, hi gơ lơh be cau găm mpau, tŭ hơ̆ bơr hi ñŏ chờ, lơmpiăt hi tơlĭk ală săp hờnchờ. Hw
Tŭ hơ̆ làng-bol dunia tam đơ̆s bal bal be do: Kơnràñ neh pơha nùs mơ bol khai. Yàng neh pơha nùs mơ hi, gen hi chờhờp-chờchờr. Hw
Ơ Kơnràñ dăn tam gơl tĕ rài kĭs hi, be ală croh dà đah Jum. Cau lơi sĭh tam moăt-jrùng, rơ̆p tơwès tam hờnchờ. Hw
Cau lòt ndăng ñìm ndăng, tê cèng kòi lòt sĭh; Bol khai rê wơl tam hờnchờ, pơnì tui ală tơrnoăn kòi. Hw
Bơta đăl bàr: Hebrơ 5. 1-6
Kòn gơ̆s cau lơh-yàng jơl jơh ală rài, jăt gơnoăr-rơndăp Melkiseđe.
Đăl tam sră Paulo, cau Dờp-pơyoa bơtoah, pơyoa bol Hebrơ in.
Ơ oh mi kờñ gơboh, jơh ală cau lơh-yàng dờng geh rơwăh tam gùl kònbơnŭs, gen geh bơtào ala kòn-bơnŭs làng răk broă Kơnràñ, làng pồ-pơdơng phan mơ lơh-yàng săl tìs. Khai rơgơi tam wă bal mơ ală cau bơrngơl-gơla mơ tìs nrah, bơh khai tờm krung gơkuă tam tơl bơta lơbơn-lơñơ. Bơh be hơ̆, krung be khai păl lơh-yàng săl tìs ala làng-bol in be lơi, gen khai krung lơh-yàng săl tìs să tờm in be hơ̆ sơl. Ờ cau lơi rơgơi sơmbăt wơl bơta bơnàng-bò hơ̆, mơya păl lah cau geh Yàng hòi-jà, be Aaron. Krung be hơ̆ sơl, Kơnràñ Kristo ờ bơh nùs tờm, pìt wơl gơnoăr gơ̆s cau lơh-yàng dờng, mơya lah Bơtau neh đơ̆s mơ Khai be do: Kòn gơ̆s Kòn Bàp, ngai do Bàp deh-dùh Kòn. Krung geh tŭ ndai Yàng đơ̆s: Kòn gơ̆s cau lơh-yàng jơl jơh ală rài, jăt gơnoăr-rơndăp Melkiseđe.
Hơ̆ jơnau đơ̆s Kơnràñ dê.
ALLELUIA: Lk 19. 38
Alleluia. Alleluia. Yălniăm Bơtau tŭs bơh sơnđăn Kơnràñ! Ring-lơngai tam trồ, mơ gơklŏ tam ală kơloàng trồ! Alleluia.
Jơnau Yălniăm: Mk 10. 46-52
Ơ Kơnràñ, dăn ai añ in gŏ
Đăl tam Jơnau Yălniăm niămgoh jăt Marko.
Tŭ hơ̆, Kơnràñ Jesu lĭk bơh Jeriko bal mơ bol jăt-dờn Khai dê mơ mpồl làng-bol găl ngăn, gen geh kòn klau Time dê lah Bartime, cau kơnư-dàn jơngo măt nggui dơ gah gùng. Dơ̆ khai kơno hơ̆ lah Kơnràñ Jesu Nazareth, gen khai sơntờm hòi-nggà mơ đơ̆s: “Ơ Jesu, kòn Đavit, dăn nđàc-sơngĭt añ!” Rà cau lah pơrhơng khai làng khai ơm momŏ, mơya khai sơlơ hòi-nggà rà tai: “Ơ kòn Đavit dê, dăn nđàc-sơngĭt añ!” Kơnràñ Jesu ơm wơl mơ đơ̆s: “Hòi tĕ khai.” Bol khai hòi cau jơngo mơ đơ̆s mơ khai: “Kơnhăp nùs tĕ. Ñă tĕ, Khai hòi mê.” Cau jơngo cơm ào wăr khai dê, brồ ntào, tŭs mơ Kơnràñ Jesu. Hơ wơl, Kơnràñ Jesu đơ̆s mơ khai: “Ñchi mê kờñ Añ lơh mê in taih ?” Cau jơngo đơ̆s mơ Kơnràñ: “Ơ Kơnràñ, dăn ai añ in gŏ.” Kơnràñ Jesu đơ̆s mơ khai: “Lòt tĕ; nùs pindờn mê dê neh tơmbời mê.” Tŭ hơ̆ mơ, khai gŏ mơ jăt kơnràñ tam gùng lòt.
Hơ̆ jơnau đơ̆s Kơnràñ dê.
