Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Gùng 6. 2-6
Ơ Israel, iăt tĕ ndo, mê gơboh tĕ mơ Kơnràñ jơh nùs mê.
Đăl tam sră Gùng-boh-lăm.
Moise đơ̆s mơ làng-bol be do: Bol mê duh-ngòt tĕ Kơnràñ gơ̆s Yàng bol mê, dờn-prăp tĕ ală gùng-bơtăn mơ jơnau sồr Khai dê, mơ añ yăl-bơto bol mê in, oh kòn sau sê bol mê in dờn prăp ală ngai tam rài kĭs bol mê, làng bol mê geh kĭs jŏ-jòng. Ơ Israel, iăt tĕ ndo, làng lơh jăt ală jơnau Kơnràñ yăl-bơto mê, gen mê geh bơtoăh mơ deh-dùh oă-rà rơlau, be bơr Kơnràñ gơ̆s Yàng pàng-yau mê neh hơ pà mê in bă ù gơ hòr dà toh mơ dà kròt. Ơ Israel, iăt tĕ ndo, Kơnràñ gơ̆s Yàng he, Yàng dùl lơm. Gơboh tĕ mơ Kơnràñ gơ̆s Yàng mê, jơh nùs, jơh sồpsoàn mơ jơh pràn mê. Ală jơnau añ yăl mê in ngai do, păl păc-sềr tam nùs.
Hơ̆ jơnau đơ̆s Kơnràñ dê.
Nrĭ-nrềng: 17. 2-3a, 3bc-4, 47 mơ 51ab
Hw: Kòn gơboh mơ Đi, ơ Kơnràñ gơ̆s bơta pràn kòn dê.
Kòn gơboh mơ Đi, ơ Kơnràñ gơ̆s bơta pràn kòn dê, ơ Kơnràñ gơ̆s bơnơm lŭ, gơ̆s tơrñăng bòn, gơ̆s Bơtau tơngklàs kòn. Hw
Ơ Yàng kòn duh-khoai, gơ̆s bơnơm lŭ kòn in ơm prŭ, gơ̆s tà khèl, gơ̆s Bơtau tơngklàs tờm gơnrơh, gơ̆s tơrñăng bòn gràng-gàr. Añ nggà-hòi Đi gơ̆s Bơtau di-păl tơl bơr jờngrơ, mơ añ geh tơngklàs bơh bol sò-tơ̆m. Hw
Ơ Yàng kĭs sùm, kòn driau-gờm Đi! Yălniăm Đi gơ̆s bơnơm lŭ añ in ơm prŭ. Tơngklŏ Yàng gơ̆s Bơtau tơngklàs añ, Đi pà rà bơta pha-lin dờng-rơyŭ Bơtau in mơ Đi tờm neh bơtào. Hw
Bơta đăl bàr: Hebrơ 7. 23-28
Tài jơnau Khai găm wơl rài rài, gen khai geh dùl gơnoăr lơh-yàng gơ̆s sùm.
Đăl tam sră Paulo, cau Dờp-pơyoa bơtoăh, pơyoa bol Hebrơ in.
Ơ oh mi kờñ-gơboh, geh rà cau lơh-yàng (bơta tam bơrkoăt yau dê), tài jơnau bơta chơ̆t kơryăn bol khai găm wơl jŏ-jòng. Ai Kơnràñ Kristo, tài jơnau Khai găm wơl rài rài, gen Khai geh dùl gơnoăr lơh-yàng gơ̆s sùm. Bơh be hơ̆, Khai rơgơi tơngklàs ờ dŭt-lồi bol cau lơi kơnờm dơ Khai làng tŭs mơ Yàng, bơh Khai kĭs sùm làng kờl-răc he in. Ngăn, bơh he di geh dùl nă cau lơh-yàng niămgoh, ờ tìs, sàng-goh, căh-ĭs bơh cau tìs-glài, mơ neh geh yờ-tơngguh hơ đăng ală tăp trồ. Khai ờ duh di be ală cau lơh-yàng pah ngai pơdơng phan lơh-yàng, lài jơh lah săl tìs-glài he, lồc gen lah săl tìs-glài làng-bol, bơh Khai lơh broă hơ̆ mìng dùl dơ̆ lơm tŭ pồ-pơdơng să tờm. Kơyoa Gùng-boh-lăm gen bơtào bol cau lơbơn-lơñơ gơ̆s cau lơh Yàng, găm bơr sơntơ̆m geh tơnơ̆ mơ Gùng-boh-lăm gen bơtào Cau Kòn niăm wil-tơl gơ̆s cau lơh-yàng dờng jơl ală rài.
Hơ̆ jơnau đơ̆s Kơnràñ dê.
ALLELUIA: Mt 4. 4b
Alleluia. Alleluia. Kòn-bơnŭs kĭs ờ di mìng bơh bañ lơm, mơya găm bơh jơh ală jơnau gơlĭk bơh bơr Yàng dê. Alleluia.
Jơnau Yălniăm: Mk 12. 28b-34
Mê păl gơboh mơ Kơnràñ, Yàng mê dê. Mê păl gơboh mơ gơ̆p mê.
Đăl tam Jơnau Yălniăm niămgoh jăt Marko.
Tŭ hơ̆, dùl nă tam bol gơnoăr-cĭh tŭs rềp Kơnràñ Jesu mơ lùp: “Jơnau lơi lah jơnau-sồr lài jơh tam jơh ală jơnau-sồr taih ?” Kơnràñ Jesu hơ wơl: “Jơnausồr lài jơh lah: “Iăt tĕ, ơ Israel: Kơnràñ Yàng he dê lah Kơnràñ dùl-lơm, mơ mê păl gơboh mơ Kơnràñ Yàng mê dê jơh nùs, jơh soàn, jơh tồr mơ jơh pràn mê.” Jơnau-sồr bàr lah: “Mê păl gơboh mơ gơ̆p mê be să tờm mê.” Ờ geh jơnau-sồr ndai dờng rơlau mơ bàr jơnau hơ̆.” Cau gơnoăr-cĭh đơ̆s mơ Kơnràñ: “Di, ơ Pôgru, Đi neh đơ̆s di ngăn: “Yàng lah dùl-lơm, mơ ờ gơ̆s Yàng ndai tai, mìng Khai lơm; gơboh Khai jơh nùs, jơh tồr, jơh pràn” mơ: “Gơboh mơ gơ̆p be să tờm he”, gen lah rơlau mơ jơh ală phan chu-gŭc mơ ală phan pơdơng.” Kơnràñ Jesu gŏ khai hơ wơl jăk-chài, gen đơ̆s mơ khai: “Mê ờ ngài mơ lơgăr trồ.” Mơ ờ geh cau lơi khĭn lùp Kơnràñ tai.
Hơ̆ jơnau đơ̆s Kơnràñ dê.
