Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Broă 2. 1-11
Ală bol khai geh bềng-lìu Yàng Nhơm mơ sơntờm tơlĭk săp đơ̆s.
Đăl tam Sră Ală Broă Bol Dờp-pơyoa dê.
Tŭ tŭs ngai lèh Prăm Jơ̆t, jơh ală cau jăt-dờn pơrjum bal lơm tam dùl anih, nisơna bơh trồ geh săp ntăs be săp càl-rơbŭt dờng khồm tŭs, gơ dŏ mŭt bềng hìu bol khai pơrjum. Gơlĭk tŭs tai ală lơmpiăt ndrờm be lơmpiăt ồs, gơ căh ĭs mơ rơ̆p hơ đăng kờp nă cau. Jơh tơl ală cau geh bềng-lìu Yàng Nhơm lơm, mơ sơntờm đơ̆s ală dà đơ̆s ĭs khăt gơ jăt Yàng Nhơm pà bol khai in đơ̆s. Tŭ hơ̆, ơm kĭs tam Jerusalem, geh ală cau Juđa mềr-duh bơh ală lơgăr tam ù-tiah rê pơrjum wơl. Tŭ kơno săp ntăs hơ̆ gơlĭk, gen mpồl găl ràn tŭs, bồ-tồr ai lơh krơi lơm, bơh kờp nă cau kơno lơm bol jăt-dờn đơ̆s dà tờm he dê. Ală cau nrơ̆t să mơ ai lơh krơi lơm mơ đơ̆s be do: Jơh ală cau găm đơ̆s do ờ di lah cau Galilea sơl ờ ? Mơya ñchi gơlơh kờp nă hi kơno wơl bol khai đơ̆s dà lơgăr tờm hi dê taih ? Bol hi lah cau Parthi, Međi, Elam, Mesopotamia, Juđea, Kappadocia, Ponto, Asia, Phryzia, Pamphilia, Ejypto, Libia rềp-kèr Sirene, bà lah cau Roma ơm kĭs tềng do, bà lah cau Juđa mơ jăt-gùng, bà lah cau Kreta mơ Ả-rập, bol hi kơno lơm bol khai đơ̆s dà bol hi dê làng jờngrơ ală broă krơi-sơrbơi Yàng dê.
Hơ̆ jơnau đơ̆s Kơnràñ dê.
Nrĭ-nrềng: 103. 1ab mơ 24ac, 29bc-30, 31 mơ 34
Hw: Ơ Kơnràñ, dăn pơyoa Yàng Nhơm tŭs, mơ dăn tơnpa wơl măt ù-tiah.
Ơ sồp-soàn añ, yălniăm tĕ Kơnràñ, ơ Kơnràñ gơ̆s Yàng añ dê, Đi dờng-rơyŭ ngăn. Ơ Kơnràñ, oă-rà ngăn broă-lơh Đi dê, plai ù lìu-làc jơi crơnggơ̆s Đi dê. Hw
Đi tă-tơlĭk nhơm bol gơ dê, bol gơ chơ̆t mơ, mơ bol gơ rê wơl hơ tiah kơmbuh-ù he dê. Di Đi pơyoa nhơm tŭs, bol gơ geh crơnggơ̆s, mơ Đi tơnpa wơl măt ù-tiah. Hw
Dăn bơta gơklŏ Đi dê găm sùm jơl ală rài, dăn Đi in chờhờp bơh broă-lơh Đi dê. Wờl-kờñ săp đơ̆s añ dê lơh Đi in geh chờhờp, ai añ, añ rơ̆p chờhờp tam Đi. Hw
Bơta đăl bàr: 1 Kr 12. 3b-7, 12-13
Tam dùl Yàng Nhơm, jơh ală he geh tơngkloh làng lơh gơ̆s dùl să-jăn.
Đăl tam sră dùl Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, ờ cau lơi rơgơi đơ̆s: Jesu gơ̆s Kơnràñ, mơ ờ bơh Yàng Nhơm wơl. Be hơ̆, geh rà jơi hànggoh, mơya geh mìng dùl Yàng Nhơm lơm. Geh rà jơi gơnoăr-broă, mơya geh mìng dùl Kơnràñ lơm. Geh rà jơi broă-lơh, mơya geh mìng dùl Yàng lơm, gơ̆s Bơtau lơh ală bơta tam ală cau. Bơta tơnggŏ să Yàng Nhơm dê geh pà kờp nă cau in, khăt gơ jăt bơta kuơ-màng. Krung be geh mìng dùl să-jăn lơm, mơya geh rà jơng-tê, mơ ală jơng-tê bŭlah rà, mơya mìng lah dùl să-jăn lơm, gen Kơnràñ Kristo krung be hơ̆ sơl. Kơyoa tam dùl Yàng Nhơm, jơh ală he geh pơnđum làng lơh gơ̆s dùl să-jăn, bŭlah lah cau Juđa ngolah làng-bol bơdìh, cau dĭ-gơna ngolah cau khăt-gơboh: Jơh ală he neh hùc tam dùl Yàng Nhơm lơm.
Hơ̆ jơnau đơ̆s Kơnràñ dê.
Bơta đơ̆s tam jăt bal:
Ơ Yàng Nhơm, dăn Đi tŭs, mơ bơh trồ gơcrà àng-gơklŏ Đi dê. Ơ Bàp cau rơbah, dăn Đi tŭs, Bơtau pà bơta niăm-nđàc, Bơtau sòlpơnđàng nhơm-nùs, dăn Đi tŭs. Ơ Bơtau pơndờm-pơnđiăng krơi-sơrbơi, gơ̆s cau năc tơpă-tơpài nhơm-nùs Đi, gơ̆s Bơtau bơting-bơtăn niăm-lơnhơn. Đi gơ̆s bơta rơlô-bòl tam bơta rơbah-dồn, gơ̆s bơta pơndờm-pơnđiăng tam bơta ñìm-moăt. Ơ bơta àng lìu-làc bơtoăh, dăn sòl-pơnđàng băm-lìu nhơm-nùs bol pindờn Đi dê. Dilah ờ geh Đi dong-kờl, tam kòn-bơnŭs ờ gŏ chi lơi niămgoh, ờ gŏ chi lơi ờ tìs. Dăn Đi rào kloh bơta bơ̆-bơl, tŭh-rơsìh tiah rañ-rơsơ̆h, mơ tơmbời bơta jê-sồt. Dăn du niăm bơta kră-kràñ, tơnduh tiah noăt-mrềt, pơnsong wơl bơta tìs gùng. Dăn Đi pà bol pindờn in, gơ̆s bol cau pin-kơnờm dơ Đi, geh poh tô bơta niăm. Dăn pà bol khai in geh dờp cồng-nha broă niăm, geh bơtoăh tơngklàs mơ geh chờhờp rài rài.
ALLELUIA:
Alleluia, Alleluia. Ơ Yàng Nhơm, dăn tuh bềng-lìu nhơm-nùs bol pindờn Đi dê in, mơ dăn sing ồs gơboh Đi dê tam nùs bol khai. Alleluia.
Jơnau Yălniăm: Jn 20. 19-23
Be Bàp neh pơyoa Añ, gen Añ krung pơyoa bol kòn. Bol kòn dờp tĕ Yàng Nhơm.
Đăl tam Jơnau Yălniăm niămgoh jăt Joan.
Tam mho ngai hơ̆, ngai sơnrờp tam poh, tŭ ală mpồng tam tiah bol jăt-dờn ơm neh til bơh ngòt bol Juđe, gen Kơnràñ Jesu tŭs, ntào tam gùl mơ đơ̆s mơ bol khai: “Ring-lơngai bol kòn in!” Tŭ neh đơ̆s jơnau hơ̆, Kơnràñ sơnđio bol khai in tê mơ wĕ. Bol jăt-dờn chờhờp bơh gŏ Kơnràñ. Kơnràñ đơ̆s tai mơ bol khai: “Ringlơngai bol kòn in! Be Bàp neh pơyoa Añ, gen Añ krung pơyoa bol kòn.” Mơ tŭ neh đơ̆s jơnau hơ̆, Khai khồm nhơm mơ đơ̆s mơ bol khai: “Bol kòn dờp tĕ Yàng Nhơm. Bol kòn hồ tìs ală cau lơi, gen gơ geh hồ ală cau hơ̆ in; bol kòn kơ̆t wơl tìs ală cau lơi, gen gơ kong kơ̆t wơl.”
Hơ̆ jơnau đơ̆s Kơnràñ dê.
