Ngai Yàng Lèh Nha Kah-kơlôi Broă Kong Jê-yăn Kơnràñ dê-Sơnăm B

Bơta đăl dùl: Is 50. 4-7

Añ neh ờ pồn muh-măt pleh bơh ală bơr ñŏ-tơnhial, mơya añ gĭt añ ờ di bàssìl. (Bơta đơ̆scrĭh pe gơrềng bơh cau duh-broă Kơnràñ.)

Đăl tam sră Isaia, cau ala-bơr dê.

Kơnràñ neh pà añ in bơr-mpiăt neh geh bơsrăm, làng añ gĭt ngui bơr đơ̆s đơng-dong cau kong-kòl bòl-glăr. Pah drim Khai pơrlai añ, Khai tơngăc tồr añ, làng iăt bơr Khai bơtê-bơto. Yàng neh pờ tồr añ, mơ añ ờ kơndăng wơl mơ krung ờ rŭc wơl. Añ neh ai ngkời cau in dài, neh ai trơmồ cau in dŭs tơnò-tềp, añ neh ờ pồn muh-măt pleh ngài ală bơr ñŏ-bơrsèl, mơ ală cau chŏh-tơnhial añ. Kơyoa Kơnràñ đơng-dong añ, gen añ ờ kòng bàssìl; gen añ dol muh dol măt kră be lŭ, añ gĭt añ rơ̆p ờ di bàssìl.

Hơ̆ jơnau đơ̆s Kơnràñ dê.

 

Nrĭ-nrềng: 21. 7-9, 17-18, 19-20, 23, 24

Hw: Ơ Yàng, Ơ Yàng kòn dê! Ñchi gơlơh Đi săng kòn ?

Să tu-rơhài ờ di bơnŭs tai, kòn kong dunia srăt-rơma sền-ờsơ̆p. Gal cau gŏ kòn, tơnhial kòn lơm, bol khai ngŏk-ngĕk bồ: Khi kơnờm dơ Kơnràñ, dăn Khai klàs khi, dilah Kơnràñ gơboh mơ khi, hồ klàs tĕ khi. Hw

Ntào gùt-dăr kòn lah mpồl jơi iơ̆h-bơsăk, rơwàng bơdìh dơlăm kòn wơl. Jơng tê kòn, bol khai cŭh blŭh tơn, kòn rơgơi kờp ală kồ ntìng kòn wơl. Hw

Ai bol khai gen rơmê sền kòn mơ chờhờp, cèng ồi ào kòn dê tam pà bal bal, găm păng ào jrùh, gen bol khai tă khà. Ai Đi, ơ Kơnràñ, dăn bañ ntào ngài bơh añ, ơ Bơtau dong-tò añ, dăn mhăr tơlĭk tê dong-kờl. Hw

Kòn rơ̆p yăl wơl sơnđăn Kơnràñ ală oh mi in, tam gùl anih pơrjum, kòn rơ̆p jờngrơ Khai. Oh mi lah cau duh-ngòt Kơnràñ, dăn jờngrơ tĕ Khai, jơh ală jơi-bơtiàn hìu Jakop dê, yălniăm tĕ Khai, duh-ngòt tĕ Kơnràñ, ơ jơh jơi-nòi Israel dê. Hw

 

Bơta đăl bàr: Pl 2. 6-11

Khai neh tơnhŭc ĭs să tờm, bơh be hơ̆ Yàng neh tơngklŏ Khai.

Đăl tam sră Paulo, cau Dờp-pơyoa bơtoăh, pơyoa bol Philip in.

Kơnràñ Jesu Kristo, bŭlah ờs gơ̆s bơta Yàng, neh ờ kơlôi pal sơmbăt geh wơl bơta ring bal mơ Yàng, sơlơ̆u wơl, Khai neh tơnroh să tờm, mơ dờp wơl să kĭs dĭ-gơna, neh gơjềng gơ̆s ndrờm be kòn-bơnŭs, jăt đah bơdìh, be dùl nă cau dunia. Khai neh tơnhŭc ĭs să tờm mơ dờn bơr jơl chơ̆t, mơ chơ̆t dơ chikal. Bơh be hơ̆, Yàng neh tơngklŏ Khai, mơ ai Khai in dùl sơnđăn-să dờng-rơlau mơ ală sơnđăn ndai, làng tŭ neh klo sơnđăn Jesu, jơh ală jơi hơ đăng trồ, tam tiah mơ tam ồs-yăn-sùm, di cùn-kơltăng mơ tơl mbùng bơr mpiăt di yăl-tơlĭk Jesu Kristo gơ̆s Kơnràñ, làng Yàng Bàp geh gơklŏ.

Hơ̆ jơnau đơ̆s Kơnràñ dê.

 

Jơnau đăl lài Jơnau Yălniăm: Pl 2. 8-9

Kơnràñ Kristo bơh bol he, neh dờn bơr jơl tŭs chơ̆t, mơ chơ̆t dơ chikal. Bơh be hơ̆, Yàng neh tơngklŏ Khai, mơ ai Khai in dùl sơnđăn să dờngrơlau mơ ală sơnđăn să.

Jơnau Yălniăm: Mk 14. 1—15. 47

Bơta kong jê-yăn Kơnràñ Jesu Kristo dê jăt Marko.

cy:Bàr ngai lài mơ lèh Lòt Găn mơ lèh Bañ ờ kañ, bol lơh-yàng dờng mơ bol gơnoăr-cĭh jòi gùng mbe lơh geh kai kŭp Kơnràñ mơ gơsơ̆t; kơyoa bol khai đơ̆s: “Bañ lơh tam ngai lèh, mbài gơlĭk bơta nggồr-nggàc dờng tam làng-bol.” Tŭ Kơnràñ ơm tam Bethania, tam hìu Simon, cau lŭt-dun, mơ găm sào, gen geh dùl nă cau ùr ià dùl nơm gri lŭ màng ơn bơñà găm tờm gơ dê, bô bơlhu, kăs ngăn; lồc pờng bơcăh gri lŭ màng, khai tuh bơñà hơ đăng bồ Kơnràñ dê. Geh dŭt cau gơjrañ, đơ̆s ndring bol khai: dn: “Ñchi kuơ lơh roh bơñà be hơ̆ ? Kơyoa bơñà do rơgơi tăc geh rơlau mơ pe rơhiăng đong priă mơ pà bol rơbah in.” cy: Mơ bol khai rơmbŏ lah ùr hơ̆. Mơya Kơnràñ Jesu đơ̆s: KJ: “Lời khai dê, ñchi gơlơh bol mê lơh kal-ke khai in taih ? Khai neh lơh broă niăm Añ in. Kơyoa bol rơbah, bol mê geh sùm bal mơ bol mê, mơ tŭ bol mê kờñ, bol mê rơgơi lơh niăm bol khai in; mơya Añ, bol mê ờ geh sùm. Bơta khai rơgơi, gen khai neh lơh: khai neh ai bơñà tuh lài dơ să Añ làng tơ̆p Añ. Di ngăn, Añ đơ̆s mơ bol mê: Tềng lơi tam jơh dunia, Jơnau Yălniăm rơ̆p geh yăl-pơnrơ, gen bơta cau ùr do neh lơh, krung rơ̆p geh yăl wơl làng kah-kơlôi khai.” cy:Juđa Iskarioth, dùl nă tam bol Jơ̆t Bàr, lòt tŭs hơ bol lơh-yàng dờng, làng jào Kơnràñ bol khai in. Bol khai kơno, gen chờhờp mơ hơ pà khai in priă. Mơ khai jòi gùng mbe lơh làng buơn jào Kơnràñ. Ngai sơnrờp tam ală ngai lèh Bañ ờ kañ, hơ̆ lah tŭ gơsơ̆t-pơdơng belàt Lòt Găn, bol jăt-dờn Kơnràñ dê đơ̆s mơ Khai: dn:“Ntềng đah Đi kờñ bol kòn lòt rơcăng Đi in sa lèh Lòt Găn taih ?” cy: Kơnràñ pơyoa bàr nă tam bol jăt-dờn Khai dê lòt, mơ đơ̆s mơ bol khai: KJ: “Bol kòn lòt tĕ tam bòn dờng, mơ rơ̆p geh dùl nă đoa yăng dà tŭs tìp bol kòn; bol kòn jăt tĕ cau hơ̆, mơ khai mŭt tềng lơi, gen bol kòn đơ̆s tĕ mơ cau tờm hìu: “Pôgru đơ̆s: Ntềng đah Añ rơ̆p sa lèh Lòt Găn bal mơ bol jăt-dờn Añ dê ?” Khai rơ̆p sơnđio bol kòn in dùl adŭ dờng, tăp hơ đăng, neh geh rơcăng; mơ bol kòn rơcăng tĕ bol he in tềng hơ̆.” cy:Bol jăt-dờn lĭk-lòt, tŭs tam bòn dờng mơ gŏ be Kơnràñ neh đơ̆s mơ bol khai, mơ bol khai rơcăng lèh Lòt Găn. Mho tŭs, Kơnràñ tŭs bal mơ bol Jơ̆t Bàr. Tam tŭ bol khai găm ơm dơ cơnờng mơ găm sào, gen Kơnràñ Jesu đơ̆s: KJ: “Di ngăn, Añ đơ̆s mơ bol kòn: Dùl nă tam bol kòn rơ̆p jào Añ, lah cau găm sào mơ Añ.” cy:Bol khai sơntờm moăt-jrùng, mơ kờp nă đơ̆s mơ Kơnràñ: dn: “Añ ơ ?” cy:Kơnràñ đơ̆s mơ bol khai: KJ: Dùl nă tam bol Jơ̆t Bàr, lah cau iŭ bal mơ Añ tam preng. Ngăn, Kòn kònbơnŭs lĭk-lòt be neh cĭh gơrềng bơh Khai. Mơya dồn-sa cau hơ̆ in, bơh khai mơ Kòn kòn-bơnŭs kong jào! Niăm cau hơ̆ in, dilah neh ờ deh khai.” cy:Tam tŭ Kơnràñ mơ bol jăt-dờn găm sào, Kơnràñ neh dờp bañ, yălniăm mơ pĕt gơ, pà bol jăt-dờn in mơ đơ̆s: KJ: “Bol kòn dờp tĕ: do lah să Añ dê.” cy:Lồc dờp coàn, Kơnràñ ưn-ngài mơ pà bol jăt-dờn in; mơ jơh ală bol khai hùc coàn gen. Kơnràñ đơ̆s mơ bol khai: KJ: “Do lah mhàm Añ dê, mhàm bơta tam bơrkoăt pa, kong tuh bơh rà cau in. Di ngăn, Añ đơ̆s mơ bol kòn: Añ rơ̆p ờ tŭ lơi hùc tai dà ño do jơl tŭs ngai hơ̆, tŭ Añ rơ̆p hùc dà ño tam lơgăr Yàng.”

cy:Mơ neh đơ̆s chờ rau, Kơnràñ mơ bol jăt-dờn lĭk-lòt tam bơnơ Olive. Kơnràñ Jesu đơ̆s mơ bol jăt-dờn: KJ: “Jơh ală bol kòn rơ̆p gơ tŭp tìs, bơh neh cĭh: “Añ rơ̆p pù-lơh cau ê, mơ ală belàt rơ̆p gơprah-gơpring.” Mơya tơnơ̆ mơ tŭ Añ neh kĭs wơl, Añ rơ̆p lòt lài mơ bol kòn tŭs tam Galilea.” cy:Petro đơ̆s mơ Kơnràñ: dn: “Bŭlah jơh tơl nă rơ̆p gơ tŭp tìs, mơya kòn ờ.” cy:Kơnràñ Jesu đơ̆s mơ khai: KJ: “Di ngăn, Añ đơ̆s mơ kòn: Kòn, ngai do, tam măng do, lài mơ tŭ iăr nrau bàr dơ̆, kòn neh pơndăng-săng Añ pe dơ̆.” cy:Mơya khai đơ̆s rơlau tai: dn: “Bŭlah kòn rơ̆p pal chơ̆t Kơnràñ in, kòn krung rơ̆p ờ pơndăng-săng Kơnràñ.” cy:Jơh ală cau krung đơ̆s ndrờm be hơ̆ sơl. Kơnràñ mơ bol jăt-dờn tŭs tam dùl bă tiah, sơnđăn lah Jethsemani; mơ Kơnràñ đơ̆s mơ bol jăt-dờn Khai dê: KJ: “Bol kòn nggui tĕ ndo, tam tŭ Añ răc-dăn.” cy:Kơnràñ lăm Petro, Jakobe mơ Joan lòt bal mơ Khai, mơ Khai sơntờm rơngòt mơ kơlôi-kơnòl; Kơnràñ đơ̆s mơ bol khai: KJ: “Sồp-soàn Añ moăt-jrùng jơl tŭs chơ̆t; bol kòn ơm tĕ ndo mơ drơng tĕ.”

cy:Lòt hơ đăp dŭt, Kơnràñ blŭp să dơ ù mơ răc-dăn, làng dilah rơgơi, jiờ hơ̆ gơ găn bơh Khai; Kơnràñ đơ̆s: KJ: “Abba, ơ Bàp! Jơh ală bơta, Bàp rơgơi lơm. Dăn tă coàn do bơh Kòn; mơya ờ di lah bơta Kòn kờñ, mơ lah bơta di kờñ.” cy:Kơnràñ tŭs mơ gŏ bol khai găm bĭc, gen đơ̆s mơ Petro: KJ: “Ơ Simon, kòn bĭc ơ ? Kòn ờ rơgơi drơng dùl jiờ ơ ? Drơng tĕ mơ răc-dăn tĕ, làng bol kòn ờ mŭt tam bơta tơlòng; nùs-nhơm ñhăp-ñhăr, mơya poăc-să lơbơn-lơñơ.” cy: Kơnràñ lòt tai răc-dăn, mơ đơ̆s krung jơnau hơ̆. Kơnràñ tŭs tai, gŏ bol khai găm bĭc; mơ măt bol khai gơ jồt, mơ bol khai ờ gĭt hơ wơl chi lơi mơ Kơnràñ. Kơnràñ tŭs dơ̆ pe mơ đơ̆s mơ bol khai: KJ: “Tŭ do, bĭc tĕ, rơlô tĕ! Tơl rau, jiờ neh tŭs rau: do Kòn kòn-bơnŭs kong jào tam tê bol cau tìs. Guh tĕ, bol he lòt ĭh! Do, cau jào Añ, neh rềp rau.” cy:Tŭ hơ̆ mơ, tam tŭ Kơnràñ găm đơ̆s, gen Juđa, dùl nă tam bol Jơ̆t Bàr tŭs, mơ bal mơ khai, geh mpồl cèng đào mơ gai bơh bol lơh-yàng dờng, bol gơnoăr-cĭh mơ bol kuăng kra. Cau jào Kơnràñ neh ai tềl bol khai in mơ đơ̆s: dn: “Cau lơi añ cum, hơ̆ lah Khai; bol mê kŭp tĕ Khai mơ lăm lòt nền-nờn.” cy:Tŭ Juđa tŭs, khai ràn mơ hơ Kơnràñ mơ đơ̆s: dn: “Rabbi!” cy:mơ khai cum Kơnràñ. Bol khai ai tê sơmbăt kŭp Kơnràñ. Dùl nă tam ală cau ơm tềng hơ̆, tă đào sreh cau duh-broă cau lơh-yàng dờng dê, mơ lơh tăc tồr cau hơ̆. Hơ wơl, Kơnràñ Jesu đơ̆s mơ bol khai: KJ: “Bol mê ăt đào mơ gai lòt kŭp Añ be kŭp cau thừ-blơ̆ ơ ? Pah ngai, Añ ơm tam gùl bol mê, bơto tam hìu duh-khoai, mơ bol mê neh ờ kŭp añ; mơya làng jơnau Sră Goh geh gơlĭk gơ̆s wil-tơl.” cy:Jơh ală cau jăt-dờn săng-lời Kơnràñ mơ dô. Dùl nă cau pơnu jăt Kơnràñ, nggòc mìng dùl păng ồi dơ să kuh, mơ cau sơmbăt kŭp khai; khai lời păng ồi, dô să kuh. Bol khai lăm Kơnràñ Jesu tŭs hơ cau lơh-yàng dờng; jơh ală cau lơh-yàng dờng, cau kuăng kra mơ cau gơnoăr-cĭh pơrjum bal. Petro lòt jăt Kơnràñ ngài ngài, tŭs tam dơlăm hìu-gơlăng cau lơh-yàng dờng dê, nggui bal mơ dong-broă mơ ñjơr ồs. Bol lơh-yàng dờng mơ jơh kuăng tơrña jòi cơng tam dră mơ Kơnràñ Jesu, làng gơsơ̆t Khai, mơ ờ gŏ. Kơyoa gal cau lơh cơng blăc tam dră mơ Kơnràñ, mơya ală cơng hơ̆ ờ tam toh bal. Geh bàr pe nă ñă-ntào lơh cơng blăc tam dră mơ Kơnràñ, mơ đơ̆s: dn: “Bol hi neh kơno Khai đơ̆s: Añ rơ̆p lơh tơrlah hìu duh-khoai do bơh tê cau lơh, mơ tam pe ngai, Añ rơ̆p bơtào wơl ờ di bơh tê cau lơi.” cy:Bŭlah be hơ̆, cơng bol khai dê krung ờ tam toh bal. Cau lơh-yàng dờng ñă-ntào tam gùl, lùp Kơnràñ Jesu mơ đơ̆s: dn: “Mê ờ hơ wơl chi lơi mơ ală jơnau cau lơh cơng tam dră mơ mê ơ ?” cy:Mơya Kơnràñ ơm momŏ, mơ ờ hơ wơl chi lơi. Cau lơh-yàng lùp Khai tai mơ đơ̆s: dn: “Mê lah Kristo, kòn Bơtau geh yălniăm dê ờ ?” cy:Kơnràñ Jesu đơ̆s: KJ: “Añ lah cau hơ̆, mơ bol mê rơ̆p gŏ Kòn kòn-bơnŭs nggui đah ma Pràn-gơnoăr dê mơ tŭs bal mơ mhoal trồ.” cy:Cau lơh-yàng dờng crè ào tờm mơ đơ̆s: dn: “Ñchi bol he kờñ taih bol cau cơng ? Bol mê neh kơno jơnau tràl-sơrbil. Mbe bol mê kơlôi taih ?” cy:Jơh ală bol khai yăl-glài Kơnràñ pal chơ̆t. Geh cau chŏh dơ Kơnràñ, lềt măt Khai, tăp Khai mơ đơ̆s mơ Khai: dn: “Mê hồr tĕ!” cy:mơ bol dong-broă pah Khai.

Tam tŭ Petro ơm tam blàng dơ tiah, gen geh dùl nă tam bol ùr duh-broă cau lơh-yàng dờng dê tŭs; tŭ gŏ Petro ơm njơr ồs, ùr hơ̆ sền trong dơ khai mơ đơ̆s: dn: “Mê tai, mê krung ơm mơ Jesu, cau Nazareth hơ̆!” cy:Mơya Petro pơndăng-săng mơ đơ̆s: dn: “Añ ờ gĭt mơ krung ờ wă chi ai đơ̆s!” cy:Mơ khai lĭk bơdìh, dơ đăp blàng, mơ iăr nrau. Cau ùr duh-broă, tŭ gŏ khai, gen sơntờm đơ̆s tai mơ bol ơm tềng hơ̆: dn: “Cau do krung tam bol hơ̆.” cy:Mơya khai pơndăng-săng tai. Dùl thoa tơnơ̆, ală cau ntào tềng hơ̆, đơ̆s mơ Petro: dn: “Ngăn, mê krung ơm tam bol hơ̆, tài bơh mê krung lah cau Galilea.” cy:Khai sơntờm srăt-rơma mơ sơntơ̆m: dn: “Añ ờ gĭt cau hơ̆, cau bol mê đơ̆s hơ̆!” cy:Tŭ hơ̆ mơ, iăr nrau tai; mơ Petro kah wơl jơnau, be Kơnràñ Jesu neh đơ̆s mơ khai: “Lài mơ tŭ iăr nrau bàr dơ̆, kòn neh pơndăng-săng Añ pe dơ̆.” Mơ khai sơntờm ñìm. Prŭ drim, bol lơh-yàng dờng bơyai bal mơ bol kuăng kra mơ bol gơnoăr-cĭh, hơ̆ lah jơh mpồl tơrña; bol khai căp Kơnràñ Jesu, cèng jào dơ Pilato. Pilato lùp Kơnràñ: dn: “Mê lah Bơtau bol Juđe ơ ?” cy:Kơnràñ hơ wơl, đơ̆s mơ khai: KJ: “Ồng đơ̆s hơ̆.” cy:Bol lơh-yàng dờng yă Kơnràñ rà jơnau. Pilato lùp Kơnràñ tai mơ đơ̆s: dn: “Mê ờ hơ wơl chi lơi ơ ? Sền bol khai yă mê gĭt-nđờ jơnau.” cy:Kơnràñ Jesu ờ hơ chi lơi tai, tiăn tŭs Pilato ai lơh krơi. Pah dơ̆ lèh, khai mờng hồ bol khai in dùl nă tam bol ơm jàm lơi bol khai dăn. Geh cau sơnđăn lah Barabba, kong jàm bal mơ bol pơrlơ̆-dră, lah bol neh gơsơ̆t cau tam tŭ pơrlơ̆-dră. Mpồl làng-bol guh, sơntờm dăn bơta be khai ờs lơh bol khai in. Pilato hơ wơl mơ bol khai mơ đơ̆s: dn: “Bol mê kờñ añ hồ bol mê in bơtau Juđea ơ ?” cy:Kơyoa khai gĭt lah, bơh nùs boăh-gơjrañ, mơ bol lơh-yàng dờng neh jào Kơnràñ. Mơya bol lơh-yàng dờng bơchồl mpồl làng-bol, làng niăm rơlau lah Pilato hồ Barabba bol khai in. Pilato hơ wơl mơ đơ̆s mơ bol khai tai: dn: “Be hơ̆, ñchi bol mê kờñ añ lơh bơtau Juđea in taih ?” cy:Bol khai nggà tai: lb: “Tơ̆s tĕ Khai dơ chikal!” cy:Pilato đơ̆s mơ bol khai: dn: “Mơya ñchi bơta iơ̆h Khai neh lơh taih ?” cy:Bol khai sơlơ nggà dờng rơlau: lb: Tơ̆s tĕ Khai dơ chikal!” cy:Pilato, bơh kờñ lơh di nùs làng-bol, neh hồ Barabba bol khai in, sồr pù-lơh Kơnràñ Jesu mơ jào tơ̆s dơ chikal. Bol ling cèng Kơnràñ mŭt tam dơlăm blàng, hơ̆ lah hìu lơh broă cau kuăng dờng dê, mơ pơrjum jơh mpồl ling. Bol khai tơnsoh Kơnràñ in ào prơhê, mơ ai lò wăc dùl nơm gơnoàr groă Khai in, mơ sơntờm niăm-să Khai: lb: “Niăm-să bơtau bol Juđe!” cy:Bol khai ai gai proh tờl dơ bồ Kơnràñ, chŏh dơ Khai, mơ cùn-kơltăng duh-khoai Khai. Tơnơ̆ mơ tŭ bol khai neh ñŏ-tơnhial Kơnràñ, gen bol khai hồ ào prơhê, tơnsoh wơl Khai in ào Khai dê. Mơ bol khai cèng Kơnràñ lòt làng tơ̆s dơ chikal. Bol khai kŭp-bơklơn dùl nă tŭs bơh bòn, lòt găn tềng hơ̆, lah Sinom, cau Sirene, bàp Alexandre mơ Rufo, tui chikal Kơnràñ dê. Bol khai cèng Kơnràñ tŭs tam dùl bă tiah, hòi lah Golgotha, hơ̆ lah tiah Kơndoh Bồ. Bol khai ai Kơnràñ in alăk pơrlŭ bal mơ plai măt bơtăng, mơya Khai ờ ñô. Bol khai tơ̆s Kơnràñ dơ chikal mơ tă khà tam pà ào Khai dê, sền cau lơi ai chi lơi. Hơ̆ lah jiờ dơ̆ pe, mơ bol khai neh tơ̆s Kơnràñ dơ chikal. Păng mpàn cĭh kồ jơnau lơh glài Kơnràñ lah: “Bơtau bol Juđe.” Bal mơ ơnràñ, bol khai tơ̆s bàr nă cau thừ-blơ̆, dùl nă đah ma, dùl nă đah kiau Khai dê. Ală cau lòt găn đơ̆s tràl-sơrbil dơ Kơnràñ, rơtơ̆s bồ mơ đơ̆s: dn: “Ơ, mê lah cau lơh tơrlah hìu duh-khoai mơ tam pe ngai bơtào wơl; mù tĕ bơh chikal, tơngklàs să tờm mê!” cy:Krung ndrờm be hơ̆ sơl, bol lơh-yàng dờng bal mơ bol gơnoăr-cĭh ñŏ-tơnhial bal mơ đơ̆s: dn: “Khai neh tơngklàs ală cau ndai, mơ ờ rơgơi tơngklàs să tờm. Kristo, Bơtau Israel, tŭ do, mù tĕ bơh chikal, làng bol he gŏ mơ pindờn.” cy: Bol cau kong tơ̆s dơ chikal bal mơ Kơnràñ, krung bơtăt-bơtrờh Khai. Bơh jiờ dơ̆ prau, gơlĭk klăm-jơngo làm ù jơl tŭs dơ jiờ dơ̆ sin. Dơ jiờ dơ̆ sin, Kơnràñ Jesu hòi mơ săp dờng: KJ: “Heloi, Heloi, lema sabacthani ?” cy: Gơ cĭh-tơlĭk lah: KJ: “Ơ Yàng añ, ơ Yàng añ, ñchi gơlơh Đi săng-lời añ ?” cy: Geh bol bà tam ală cau ntào gùt-dăr kơno gen đơ̆s: dn: “Ne, Khai hòi Elia.” cy: Geh dùl nă ntoăt iŭ phan-nsồp bềng mơ dà sràt, pùt dơ gai proh, ai Kơnràñ hùc mơ đơ̆s: dn: “Lời tĕ lòng sền geh Elia tŭs tă-tơmù Khai sơl ờ.” cy:Kơnràñ Jesu nggà dùl săp dờng mơ tăc nhơm.

(Cùn kơltăng, ơm momŏ tam dùl thoa.)

Biài kơrnìng hìu duh-khoai dê gơcrè gơ̆s bàr bơh hơ đăng tŭs hơ đơm. Cau kuăng ăt-rơhiăng, ntào tam toh mơ Kơnràñ, gŏ Kơnràñ hòi mơ tăc nhơm be hơ̆, gen đơ̆s: dn: “Ngăn, cau do lah Kòn Yàng dê!” cy:Krung geh ală cau ùr ơm sền bơh ngài, tam bol khai geh Maria Magdala, Maria mè Jakobe-oh mơ Jose dê, mơ Salome. Bol ùr do, tŭ Kơnràñ ơm tam Galilea, neh jăt mơ dong-broă Khai; mơ krung geh gal cau ùr ndai, lah bol neh guh hơ Jerusalem bal mơ Kơnràñ. Mho tŭs, tài bơh lah Ngai Rơcăng Lèh, hơ̆ lah ngai lài mơ ngai sabbat, geh Joseph, cau Arimathea, lah kuăng tơrña tiơng-pơnrơ, tŭs; tờm khai krung lah cau kơ̆p-gơn lơgăr Yàng; khai neh khin-cha mŭt mơ Pilato mơ dăn bồc Kơnràñ Jesu. Pilato ai lơh krơi lah Kơnràñ neh chơ̆t rau, khai sồr hòi cau kuăng ăt-rơhiăng tŭs, lùp khai Kơnràñ neh chơ̆t lah ờ, mơ tŭ neh gĭt bơh cau kuăng ăt-rơhiăng, khai ai bồc Joseph in. Ồng do blơi biài che dơmai, tă bồc Kơnràñ, pò mơ biài che dơmai, ơn bồc tam bơtô bồc neh phàt tam lŭ, mơ pơrlă pơnai lŭ dơ mpồng bơtô bồc. Maria Magdala mơ Maria mè Jose dê sền tiah cau ơn Kơnràñ.

Hơ̆ jơnau đơ̆s Kơràñ dê.