Ngai Yàng Kơnràñ Guh Trồ

Bơta đăl dùl: Broă 1. 1-11

Dơ đăp mă gŏ bol khai dê, Kơnràñ guh trồ.

Sơntờm Sră Ală Broă Bol Dờp-pơyoa dê.

Ơ Theophile, tam păng sră dùl, añ neh yăl wơl jơh ală bơta Kơnràñ Jesu neh sơntờm lơh mơ yăl-bơto, jơl tŭs ngai Khai guh trồ, tơnơ̆ mơ tŭ bơtăp-bơtăn bol Dờp-pơyoa, bol cau mơ Khai neh săc-rơwăh hơ đơm bơta pơlăm Yàng Nhơm dê. Tơnơ̆ mơ bơta jê-yăn, Khai neh sơnđio bol khai in gŏ Khai găm kĭs, bal mơ rà bơta cơng. Tam pơgăp poăn jơ̆t ngai, Khai neh tơlĭk să mơ bol khai mơ cri-bơyai gơrềng bơh Lơgăr Yàng. Mơ tam dùl dơ̆ sào, Khai neh sồr bol hơ̆ bañ lĭk bơh Jerusalem, mơya kơ̆p-càng tĕ bơta Yàng Bàp neh pơrgon. Khai đơ̆s: Be bol kòn neh kơno bơh bơr tờm Añ đơ̆s be do: Joan neh pơnđum mơ dà, ai bol kòn, dŭt ngai tai, bol kòn rơ̆p dờp pơnđum tam Yàng Nhơm.

Be hơ̆, ală cau gŏ măt lùp Khai be do: Ơ Pôgru, di neh tŭs tŭ Đi lơh wơl lơgăr Israel sơl ờ ? Khai đơ̆s mơ bol hơ̆: Ờ di broă bol kòn gĭt-wă tơngai ngolah kơnhai mơ Bàp neh rơndăp bơh gơnoăr Khai dê. Mơya bol kòn rơ̆p dờp wơl bơta pràn Yàng Nhơm mù ơm hơ đăng bol kòn, mơ bol kòn rơ̆p gơ̆s cau cơng Añ in tam Jerusalem, tam jơh lơgăr Juđea mơ Samaria, mơ jơl tŭs lồi-dŭt plai ù. Neh lồc đơ̆s rau, Khai geh yờ-tơngguh dơ đăp măt bol khai, mơ dùl tŭp mhoal jơmgòm Khai ndơ̆p bơh măt bol khai. Tam tŭ bol khai găm tơngờ măt hơ trồ, rơmê jăt Kơnràñ hời-rơhời ngài, gen nisơna geh bàr nă cau soh ào bò ntào rềp bol khai mơ đơ̆s: Ơ cau Galile, ñchi gơlơh bol mê găm ntào rơmê hơ trồ be hơ̆ taih ? Kơnràñ Jesu, Bơtau pa lời bol đi mơ guh trồ, rơ̆p tŭs wơl ndrờm gùng be bol đi neh gŏ tŭ Khai guh trồ.

Hơ̆ jơnau đơ̆s Kơnràñ dê.

 

Nrĭ-nrềng: 46. 2-3, 6-7, 8-9

Hw: Yàng ơm-ăt tam gùl săp rơhờn, Khai ơm-ăt tam săp kơluờk mpong.

Ơ jơh ală làng-bol, tàp tê tĕ, driau gờm tĕ Yàng mơ săp driau chờhờp. Kơyoa Yàng gơ̆s Bơtau Dờng Rơlau Jơh, pal ngòt, Khai gơ̆s Bơtau Dờng Rơlau Jơh hơ đăng khŏp dunia. Hw

Yàng ơm-ăt tam gùl săp rơhờn, Khai ơm-ăt tam săp kơluờk mpong. Yàng ơm-ăt hơ đăng jơh ală lơgăr, Khai nggui tam sơbàn niămgoh Khai dê. Hw

 

Bơta đăl bàr: Ep 1. 17-23

Yàng bơtào Khai nggui đah ma he hơ đăng trồ.

Đăl tam sră Paulo, cau Dờp-pơyoa bơtoah, pơyoa bol Epheso in.

Ơ oh mi kờñ-gơboh, dăn Yàng Jesu Kristo, Kơnràñ he dê, gơ̆s Bàp gơklŏ, pà oh mi in nhơm-nùs ngăc-ngăr mơ geh pờ-tơlĭk, làng đăl-gĭt Khai; dăn măt bồ- tồr oh mi dê in geh sàng-goh, làng oh mi in gĭt mbe lah bơta kơ̆p-kơnờm dơ bơta Khai hòi-jà, mbe lah bơta păs-gơ̆s jơtài gơklŏ tam bol niămgoh, mơ mbe lah bơta gơnoăr dờng-rơyŭ gĭt-nđờ Khai dê gơ wèt mơ he, gơ̆s ală cau pindờn, khăt gơjăt broă-lơh bơta pràn-kơldăng gơnoăr Khai dê, broă-lơh mơ Khai lơh gơ̆s tam Kơnràñ Kristo, gen lah lơh Khai in kĭs wơl bơh bơta chơ̆t, mơ bơtào Khai nggui đah ma he hơ đăng trồ, lèt hơ đăng ală bơta rơndăp-tăp-sèng, ală huềng ăt-bồ, huềng-gơnoăr, huềng-pràn, huềng-sềngàr, lèt hơ đăng ală sơnđăn-să geh hòi tam rài do mơ rài tơnơ̆. Yàng lơh ală bơta bĭc dŭp hơ đơm jơng Khai, mơ bơtào Khai gơ̆s bồ jơh mơ Pơrjum-niăm gơ̆s să-jăn Khai dê, mơ gơ̆s bơta păs-pràn Bơtau bơsir ală bơta tam ală cau.

Hơ̆ jơnau đơ̆s Kơnràñ dê.

 

ALLELUIA: Mt 28. 19a, 20b

Alleluia, Alleluia. Kơnràñ đơ̆s: Bol kòn lòt bơto tĕ jơh ală làng-bol. Añ rơ̆p ơm bal mơ bol kòn jơh ală ngai tŭs lồi-dŭt dunia. Alleluia.

Jơnau Yălniăm B: Mk 16. 15-20

Khai guh trồ, nggui đah ma Yàng.

Bơta pơndŭt Jơnau Yălniăm niămgoh jăt Marko.

Tŭ hơ̆, Kơnràñ neh tơnggŏ măt mơ bol Jơ̆t Dùl mơ đơ̆s: “Bol kòn lòt tĕ làm khŏp dunia, yăl-pơnrơ Jơnau Yălniăm jơh jơi crơnggơ̆s in. Cau lơi pindờn mơ geh pơnđum, gen geh tơngklàs; cau lơi ờ pindờn, gen kong kŭp glài. Ală tềl do rơ̆p jăt ală cau pindờn: bơh sơnđăn Añ, bol khai rơ̆p bơtrơh ală cà, rơ̆p đơ̆s ală dà pa; bol khai rơ̆p ăt bơ̆s, mơ dilah bol khai hùc chi lơi khih, gen gơ krung ờ lơh ơniai bol khai; bol khai rơ̆p ơn tê hơ đăng bol kòp-jê, mơ bol hơ̆ rơ̆p geh prànkơldăng.” Neh đơ̆s mơ bol khai rau, Kơnràñ Jesu geh tơngguh hơ đăng trồ mơ nggui đah ma Bàp. Bol khai lĭk-lòt yăl-pơnrơ làm ù làm tiah; geh Kơnràñ lơh broă bal, mơ ai ală tềl tam jăt làng lơh kơnhăp jơnau yăl.

Hơ̆ jơnau đơ̆s Kơnràñ dê.