Ngai Yàng Kĭs Wơl

Bơta đăl dùl: Broă 10. 34a, 37-43

Hi neh sào sa mơ Khai, tơnơ̆ mơ tŭ Khai kĭs wơl bơh bơta chơ̆t.

Đăl tam Sră Ală Broă Bol Dờp-pơyoa dê.

Tam ală ngai hơ̆, Petro tơlĭk săp đơ̆s be do: “Be oh mi gĭt bơta neh gơlĭk gơ̆s làm lơgăr Juđea, sơntờm bơh Galilea, tơnơ̆ mơ tŭ Joan yăl-bơto tềl pơnđum: Hơ̆ lah Kơnràñ Jesu bòn Nazareth. Yàng neh nggui Yàng Nhơm mơ gơnăpgơnoăr làng bong jiờu Khai in. Khai lòt làm brê làm dà, yăl-tơnggĭt bơta niăm mơ tơmbời ală cau kong cà ngui, bơh Yàng ơm bal mơ Khai. Mơ hi, hi gơ̆s cau cơng jơh ală chi lơi Khai neh lơh tam lơgăr Juđea mơ tam Jerusalem, Khai gơ̆s Bơtau mơ cau neh tơnchơ̆t mơ yồng Khai hơ đăng chikal. Mơya ngai pe, Yàng eh ai Khai in kĭs wơl, mơ tơnggŏ să ờ di bal mơ jơh làng-bol, mơya lah bal mơ hi, lah cau cơng Yàng neh săc-rơwăh lài, hi tờm neh sào sa bal mơ Khai tơnơ̆ mơ tŭ Khai kĭs wơl bơh bơta chơ̆t. Mơ Khai neh sồr hi lòt yăl-bơto jơh mơ làng-bol in, mơ lơh cơng lah Khai tờm neh geh Yàng bơtào gơ̆s kuăng cahrơña cau kĭs mơ cau chơ̆t. Ală cau ala-bơr krung lơh cơng gơrềng bơh Khai lơm be do: Jơh ală cau lơi pindờn dơ Khai, gen kơnờm bơh sơnđăn Khai mơ geh hồ tìs.

Hơ̆ jơnau đơ̆s Kơnràñ dê.

 

Nrĭ-nrềng: 117. 1-2, 16ab mơ 17, 22-23

Hw: Do gơ̆s ngai Kơnràñ neh bơtào gơ̆s, he chờhờp ĭh tam ngai hơ̆.

Ưn-ngài tĕ Kơnràñ, bơh Khai sơrmah nùs, bơh bơta tơpă-tơpài Khai dê gơ̆s sùm. Ơ hìu Israel, yăl-tơlĭk tĕ, bơh bơta tơpă-tơpài Khai dê gơ̆s sùm. Hw

Tê ma Kơnràñ dê neh lơh-lòt pràn-kơldăng, tê ma Khai neh yờ-tơngguh añ. Añ ờ chơ̆t, mơya añ rơ̆p kĭs, mơ añ rơ̆p yăl-pơnrơ broă-lơh Khai dê. Hw

Pơnai lŭ mơ ală cau băc săng-sơrbì, neh gơjềng gơ̆s pơnai lŭ mum tơrñăng. Broă hơ̆ neh bơh tê Kơnràñ lơh gơlĭk, broă hơ̆ krơi-sơrbơi dơ đăp măt hi. Hw

 

Bơta đăl bàr: Kl 3. 1-4

Oh mi jòi tĕ ală bơta hơ đăng trồ, tiah Kristo ơm.

Đăl tam sră Paulo, cau Dờp-pơyoa bơtoăh, pơyoa bol Kolosse in

Ơ oh mi kờñ-gơboh, dilah oh mi neh kĭs wơl bal mơ Kristo, oh mi jòi tĕ ală bơta hơ đăng trồ, tiah Kristo nggui đah ma Yàng. Oh mi kơlôi tĕ ală bơta hơ đăng trồ, bañ kơlôi ală bơta tam ù-tiah. Bơh oh mi neh chơ̆t, mơ bơta kĭs oh mi geh pồn ndơ̆p bal mơ Kristo tam Yàng. Tŭ Kristo gơ̆s bơta kĭs oh mi tơlĭk să, tŭ hơ̆ oh mi rơ̆p tơlĭk să bal mơ Khai tam bơta gơklŏ.

Hơ̆ jơnau đơ̆s Kơràñ dê.

 

Bơta đơ̆scrĭh tam jăt bal:

Ơ bol pindờn, pồ-pơdơng tĕ bơr jờngrơ phan gơsơ̆t lơh-yàng Lòt Găn. Belàt kòn neh tơngklàs mpồl belàt me. Kơnràñ Kristo ờ tìs neh tam bơsòr cau tìs mơ Yàng Bàp. Bơta kĭs mơ bơta chơ̆t, bàr đah tam lơh bal krơi-sơrbơi. Bơtau ăt-bồ bơta kĭs neh chơ̆t rau, mơya găn kĭs mơ ơm-ăt. Ơ Maria, yăl tĕ hi in klo ñchi ai neh gŏ tam gùng lòt taih ? Añ neh gŏ bơtô bồc Kơnràñ Kristo găm kĭs, mơ bơta gơklŏ Bơtau kĭs wơl dê. Gŏ bol huềng-duh lơh cơng, gŏ biài pò mơ ồi ào. Kơnràñ Kristo gơ̆s bơta kơnờm añ dê neh kĭs wơl, Khai tŭs hơ lơgăr Galilea lài mơ bol đi. Hi gĭt Kơnràñ Krĭsto neh kĭs wơl ngăn bơh bơta chơ̆t. Ơ Kơnràñ, Bơtau phalin, dăn nđàc-sơngĭt hi.

 

ALLELUIA: 1 Kr 5. 7b-8a

Alleluia, Alleluia! Lèh Lòt Găn ge dê gơ̆s Kơnràñ Kristo neh gơsơ̆t pơdơng; gen he gờm tĕ lèh tam Kơnràñ. Alleluia.

Jơnau Yălniăm: Jn 20. 1-9

Khai pal kĭs wơl bơh bơta chơ̆t.

Đăl tam Jơnau Yălniăm niămgoh jăt Joan.

Ngai sơnrờp tam poh, Maria Magdala tŭs hơ bơtô bồc bơh rìng-àng, tŭ trồ găm jơngo, mơ gŏ pơnai lŭ neh pơrlă bơh bơtô bồc. Be hơ̆, khai ntoăt tŭs hơ Simon Petro mơ cau jăt-dờn ndai Kơnràñ Jesu gơboh, mơ đơ̆s mơ bol khai: “Cau neh tă-tơlĭk Kơnràñ bơh bơtô bồc, mơ bol hi ờ gĭt cau neh ơn Kơnràñ tềng lơi!” Be hơ̆, Petro mơ cau jăt-dờn ndai ne lĭk-lòt mơ tŭs hơ bơtô bồc. Bàr nă ntoăt bal, mơ cau jăt-dờn ndai ne ntoăt mhăr rơlau mơ Petro, mơ tŭs hơ bơtô bồc lài; mơ tŭ kun să, khai gŏ biài che dơmai lơbơn ơn tềng hơ̆, mơya khai ờ mŭt. Simon Petro jăt khai krung tŭs mơ mŭt tam bơtô bồc; khai gŏ biài che dơmai lơbơn ơn tềng hơ̆ mơ chèo hơ đăng bồ Kơnràñ dê, gơ ờ ơn bal mơ biài che dơmai, mơya pồt ơn ĭs tam dùl bă. Tŭ hơ̆, cau jăt-dờn ndai ne neh tŭs hơ bơtô bồc lài, krung mŭt, khai gŏ mơ khai pindờn. Kơyoa bol khai ờ hềt gĭt Sră Goh lah Kơnràñ pal guh wơl bơh bol cau chơ̆t.

Hơ̆ jơnau đơ̆s Kơnràñ dê.