Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ngăc-ngăr: 1. 13-15; 2. 23-24
Bơh cà ềng-boăh, gen huềng chơ̆t blŏng mŭt tam dunia.
Đăl tam sră Ngăc-ngăr.
Yàng ờ crơnggơ̆s bơta chơ̆t, ờ chờhờp tŭ cau kĭs di chơ̆t. Khai crơnggơ̆s ală bơta làng gơ gŏ gơ̆s. Khai klăc-mòn ală cau hơ đăng măt ù pràn-niăm lơm, bol khai ờ gŏ geh dà rai bơta chơ̆t, mơ ờ gŏ geh ồs-yăn-sùm tam dunia. Kơyoa, bơta song-dơpă gen gơ̆s sùm mơ ờ gŏ chơ̆t. Yàng neh klăc-mòn kòn-bơnŭs ndrờm be rùp-rài Khai làng kĭs sùm. Mơya bơh cà ềng-boăh, gen huềng chơ̆t blŏng mŭt tam dunia: Cau lơi gơrê mơ gơ gen đòm jăt gơ.
Hơ̆ jơnau đơ̆s Kơnràñ dê.
Nrĭ-nrềng: 29. 2 mơ 4, 5-6, 11 mơ 12a mơ 13b
Hw: Ơ Kơnràñ, añ jờngrơ Đi bơh Đi neh tơngklàs añ.
Ơ Kơnràñ, añ jờngrơ Đi bơh Đi neh tơngklàs añ, mơ ờ lời bol sò-tơ̆m chờhờp bơh añ. Ơ Kơnràñ, Đi neh lăm sồp-soàn añ klàs ngài bơh làng-bồc, Đi neh klàs añ bơh mpồl cau mù tam làng-bồc. Hw
Ơ ală cau pindờn Kơnràñ dê, pĕ kơlñi đơ̆scrĭh gờm Kơnràñ, mơ ưn-ngài tĕ sơnđăn niămgoh Khai. Bơh bơta gơjrañ Khai dê mìng dŭt lơm, mơya nùs niăm-lơnhơn Khai dê găm gŏ jơl sùm. Mho tìp bơta moăt-yăn, mơya drim hìng geh wơl chờhờp-chờchờr. Hw
Ơ Kơnràñ, dăn dờp bơr mơ nđàc-sơngĭt añ, ơ Kơnràñ, dăn ai tai bơta dong-kờl añ. Đi neh tam gơl bơr ñìm-răc gơlĭk gơ̆s bơta đơ̆s-chờ añ in. Ơ Kơnràñ gơ̆s Yàng añ, añ rơ̆p yălniăm Đi jơl jơh ală rài. Hw
Bơta đăl bàr: 2 Kr 8. 7, 9, 13-15
Jơnau jơngkăh oh mi dê bơtơl wơl bơta siơ̆u-siăr ală oh mi rơbah-rơbừp dê.
Đăl tam sră bàr Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, krung be oh mi lin rơlau bơh tơl đah: Bơh nùs pindờn, bơh bơta chài đơ̆s, bơh bơta wă-wờng, bơh ală gùng mềr-duh, krung be bơh nùs gơboh oh mi dê, gen oh mi krung di lin rơlau tam broă niăm-nđàc do tai. Bơh oh mi gĭt nùs pơha Jesu Kristo, Kơnràñ he dê, bŭlah păs-gơ̆s, Khai neh gơjềng să kĭs rơbah, làng kơnờm bơh bơta rơbah Khai dê, oh mi gơjềng păs-gơ̆s. Mơya ờ di wơl lah lời cau ndai in geh lơngăp-lơngai, mơ oh mi kong siơ̆u-siăr, mơya păl lơh be lơi làng gơ ring bal. Tam tŭ-bơta tŭ do, jơnau jơngkăh oh mi dê bơtơl wơl bơta siơ̆u-siăr bol khai dê, làng bơta jơngkăh bol khai dê bơtơl wơl bơta siơ̆u-siăr oh mi dê, làng geh bơta ring bal be bơr neh cĭh be do: Cau geh oă-rà, gen krung ờ jơngkăh, mơ cau geh dŭt, gen krung ờ siơ̆u-siăr.
Hơ̆ jơnau đơ̆s Kơnràñ dê.
ALLELUIA: Jn 6. 64b mơ 69b
Alleluia. Alleluia. Ơ Kơnràñ, bơr Đi lah Nhơm mơ lah bơta kĭs; Đi geh ală jơnau đơ̆s bơta kĭs rài rài dê. Alleluia.
Jơnau Yălniăm: Mk 5. 21-43
Ơ oh ùr, Añ đơ̆s mơ ai: Guh tĕ!
Đăl Tam Jơnau Yălniăm niămgoh jăt Marko.
Tŭ hơ̆, Kơnràñ Jesu hào ahò tai, tiă wơl đăh bơtĭ ne, geh mpồl làng-bol găl tŭs bal hơ Khai, mơ Khai ơm dơ găh dà-lềng. Geh dùl nă tam bol ăt-bồ hìupơrjum dê, sơnđăn lah Jairo, tŭs, dơ̆ gŏ Kơnràñ, khai blŭp să dơ jơng Kơnràñ, khoai dăn ngăn Kơnràñ mơ đơ̆s: “Kòn ùr dêt añ dê mờr chơ̆t rau; dăn Đi tŭs, ơn tê hơ đăng khai, làng khai geh bời mơ kĭs.” Kơnràñ lĭk-lòt bal mơ cau hơ̆. Geh mpồl làng-bol găl jăt Khai mơ ntềt Khai. Mơ geh dùl nă cau ùr kong gơ hùng mhàm neh jơ̆t bàr sơnăm, neh kong bòl-glăr oă ngăn mơ găl cau lơh sơnơm, roh jơh ală phan-bơna khai dê mơ krung ờ kuơ chi lơi, mơya sơlơ kơnjơ̆ rơlau, tŭ khai kơno bơh Kơnràñ Jesu, khai tŭs tam mpồl làng-bol, ơm bơh ngkời, mơ bư dơ ào Kơnràñ dê; kơyoa khai đơ̆s: “Dilah añ mìng bư dơ ào Kơnràñ dê, gen añ rơ̆p geh bời.” Tŭ hơ̆ mơ, mhàm khai rañ- rơsơ̆h, mơ khai gĭt să khai neh bời kòp-jê. Kơnràñ Jesu gĭt mơ tam să tờm geh pràn-gơnoăr lĭk bơh Khai, gen Khai wơlke hơ mpồl làng-bol mơ đơ̆s: “Ñcau neh bư dơ ào Añ ?” Bol jăt-dờn Khai dê đơ̆s mơ Khai: “Đi gŏ mpồl làng-bol ntềt Đi mơ Đi găm đơ̆s: “Ñcau neh bư dơ Añ ?” Kơnràñ sền gùt-dăr, gŏ cau ùr neh lơh bơta hơ. Cau ùr rơm-ngòt, gĭt bơta neh gơlĭk gơ̆s tam khai, gen khai tŭs cùnkhoai dơ đăp Kơnràñ, đơ̆s song mơ Khai jơh ală bơta. Kơnràñ đơ̆s mơ khai: “Ơ kòn ùr, nùs pindờn ai dê neh tơmbời ai. Lòt tĕ ring-lơngai mơ bời tĕ kòp ai dê.” Tam tŭ Kơnràñ găm đơ̆s, gen geh bol bơh hìu cau ăt-bồ hìu-pơrjum dê tŭs mơ đơ̆s: “Kòn ùr ồng neh chơ̆t; ñchi lơh tơmbòl Pôgru tai ?” Mơya Kơnràñ Jesu kơno jơnau cau đơ̆s hơ̆, gen đơ̆s mơ cau ăt-bồ hìu-pơrjum dê: “Bañ ngòt; mìng pindờn tĕ lơm!” Mơ Kơnràñ ờ ai cau lơi jăt Khai, mìng Petro, Jakobe mơ Joan lah oh Jakobe dê. Bol khai tŭs hơ hìu cau ăt-bồ hìu-pơrjum dê; mơ Kơnràñ gŏ bơta nggồr-nggàc mơ găl cau ñìm-nggà. Khai mŭt mơ đơ̆s mơ bol khai: “Ñchi lơh nggồr-nggàc mơ ñìm-nggà taih ? Oh ùr do ờ chơ̆t, mơya khai bĭc khai dê.” Bol khai ñŏ-tơnhiăl Kơnràñ. Mơya lồc tơlĭk jơh ală cau, Kơnràñ cèng bàp mơ mè oh ùr dê mơ ală cau ơm bal mơ Kơnràñ, mơ Kơnràñ mŭt tam anih oh ùr ơm; ăt dơ tê oh ùr dê, Kơnràñ đơ̆s mơ khai: “Talitha, qum!” – mblàng-tơlĭk lah: “Ơ oh ùr, Añ đơ̆s mơ ai: Guh tĕ!” – Tŭ hơ̆ mơ, oh ùr guh mơ cơnđoà lòt; bơh khai neh jơ̆t bàr sơnăm. Mơ bol khai ai lơh crih-crài oă ngăn. Kơnràñ bơtăn ngăn bol khai bañ ai cau lơi in gĭt bơta hơ̆, mơ sồr ai oh ùr in sa.
Hơ̆ jơnau đơ̆s Kơnràñ dê.
