Ngai Yàng jơ̆t kàl Dăr Năm

Bơta đăl dùl: Crơnggơ̆s 3. 9-15

Añ rơ̆p tơnơn bơta ềng-gơjrañ tam gùl jơi-bơtiàn mê mơ jơi-bơtiàn cau ùr.

Đăl tam sră Crơnggơ̆s.

Yàng neh hòi Ađam mơ yăl-sồr khai be do: Ntềng đah mê ơm taih ? Khai neh hơ: Añ neh kơno săp Đi tam rơhàng niăm, mơya añ nrơ̆t-ngòt, bơh añ ơm kuh lời rồ mơ añ găm pồn-ndơ̆p. Kơnràñ yăl-sồr khai be do: Ñcau neh sơnđio mê in gĭt mê ơm kuh lời rồ, di ờ di tài bơh mê neh sa plai chi mơ Añ neh kơryăn mê ờ geh sa sơl ờ ? Ađam hơ wơl: Cau ùr mơ Đi neh ai lơh bau mơ añ, khai tờm neh ai añ in plai chi mơ añ neh sa. Mơ Yàng yăl-sờr cau ùr be do: Ñchi gơlơh ai neh lơh bơta hơ̆ taih ? Cau ùr hơ: Bơ̆s neh pơrlồm añ mơ añ neh sa. Yàng yălsồr bơ̆s be do: Tài bơh mê neh lơh bơta hơ̆, mê rơ̆p dồn-sa tam gùl ală jơi kĭs mơ ală phan jơi tam plai ù, mê rơ̆p wìn mơ ndul, mơ mê rơ̆p sa ù mbè pah ngai tam rài mê. Añ rơ̆p tơnơn bơta ềng-gơjrañ tam gùl mê mơ cau ùr, tam gùl jơibơtiàn mê mơ jơi-bơtiàn cau hơ̆, cau tam jơi-bơtiàn hơ̆ rơ̆p jă-ntrơm bồ mê, găm mê gen rơ̆p mòc cŏh kơndờl jơng khai. 

Hơ̆ jơnau đơ̆s Kơnràñ dê.

 

Nrĭ-nrềng: 129. 1-2, 3-4, 5-6ab, 6c-8

Hw: Kơyoa Kơnràñ pơha nùs tơpă-tơpài, mơ Khai păs-gơ̆s bơta tơngklàs.

Bơh thòng jrô, ơ Kơnràñ, añ nggà hòi Đi, ơ Kơnràñ, dăn iăt bơr añ hòi-dăn! Dăn Đi sơrkềng tồr, làng iăt săp khoai-dăn añ dê. Hw

Dilah Đi sề-sơwì tìs, ơ Kơnràñ, ñcau rơgơi ntào kơ̆ wơl taih ? Mơya Đi ờs pơha nùs hồ-lời, làng dunia in duh-khoai gơboh. Hw

Añ kơnờm oă ngăn dơ Kơnràñ, Sồp-soàn añ gơn-kơnờm dơ bơr Đi. Sồp-soàn añ kơ̆p-càng Kơnràñ añ, Rơlau mơ cau ling drơng kơ̆p trồ àng drim. Hw

Rơlau mơ ling drơng kơ̆p tŭ rìng àng, Israel găm kơ̆p-càng Kơnràñ añ: Kơyoa Kơnràñ pơha nùs tơpă-tơpài mơ Khai păs-gơ̆s bơta tơngklàs. Mơ Khai tờm rơ̆p tơngklàs Israel bơh ală bơta iơ̆h-bơsăk. Hw

 

Bơta đăl bàr: 2 Kr 4. 13 – 5. 1

Bol hi pindờn, gen bol hi đơ̆s

Đăl tam sră bàr Paulo, cau Dờp-pơyoa bơtoăh, pơyoa bol Korinto in.

Ơ oh mi kờñ-gơboh, oh mi geh tĕ bal dùl nhơm-nùs pindờn, be neh cĭh: Añ neh pindờn, gen añ neh đơ̆s; mơ bol hi pindờn, gen bol hi đơ̆s, bơh bol hi gĭt Bơtau neh lơh Kơnràñ Jesu in kĭs wơl, krung rơ̆p lơh bol hi in kĭs wơl bal mơ Kơnràñ Jesu, mơ rơ̆p tơnơn bol hi hơ gah Khai lơh dùl bal mơ oh mi. Kơyoa bơh ală bơta mìng bơh oh mi lơm, làng bơta hànggoh sơlơ bềng-lìu, bơh oă-rà cau ưnngài, gen sơlơ tơngguh bơta gơklŏ Yàng. Bơh be hơ̆, bol hi ờ dil nùs; sơlơ̆u wơl, bŭlah să bơnŭs bơdìh bol he dê kong tơnroh, mơya să bơnŭs dơlăm bol he dê sơlơ ngai geh tơnpa wơl. Kơyoa bơta cŭ-cua dùl thoa lơm mơ nggờc bol he dê tŭ do, răk-rơcăng bol he in dùl gơnru ờ jai kờp bềng bơta gơklŏ rài rài. Bol hi sền rơmê ờ di ală bơta rơgơi gŏ, mơya lah ală bơta ờ rơgơi gŏ; bơh ală bơta rơgơi gŏ mìng ing lơm, găm ală bơta ờ rơgơi gŏ gen gơ̆s sùm. Kơyoa bol he gĭt, dilah nơm hìu bol he ơm kĭs tam dunia do kong tơnroh, gen bol he geh dùl bă tiah ơm kĭs sùm hơ đăng trồ, bơh dơ Yàng bơtào gơ̆s, ờ di bơh tê kòn-bơnŭs lơh gơ̆s.

Hơ̆ jơnau đơ̆s Kơnràñ dê.

 

ALLELUIA: Sm 3. 9

Alleluia. Alleluia. Ơ Kơnràñ, dăn đơ̆s tĕ, bơh cau duh-broă Đi dê găm iăt, Đi geh bơr pà bơta kĭs rài rài. Alleluia.

Jơnau Yălniăm: Mk 3. 20-35

Satan di tơnroh.

Đăl tam Jơnau Yălniăm niămgoh jăt Marko.

Tŭ hơ̆, Kơnràñ Jesu bal mơ bol jăt-dờn rê wơl tŭs hìu, mơ mpồl làng-bol pơrjum bal tai, tiăn tŭs bol khai ờ rơgơi sào-sa. Bol jơi-bơtiàn Kơnră kơno be hơ̆, gen lĭk-lòt kŭp Khai; bơh bol khai đơ̆s: “Khai neh mòs-sơnrăng.” Ai bol gơnoăr-cĭh mù bơh Jerusalem, gen đơ̆s: “Khai kong cà Beelzebul lơh” mơ: “Khai kơnờm dơ bơtau ală cà làng bơtrơh ală cà.” Kơnràñ hòi bol khai tŭs mơ ngui ală jơnau pơniơu đơ̆s mơ bol khai: “Mbe lơh Satan rơgơi bơtrơh Satan taih ? Dilah lơgăr lơi tam căh ĭs gơ dê, gen lơgăr hơ̆ ờ rơgơi ntào kơ̆; dilah hìu lơi tam căh ĭs gơ dê, gen hìu hơ̆ ờ rơgơi ntào kơ̆. Dilah Satan ntào tam dră ndring gơ mơ tam căh ĭs gơ dê, gen gơ ờ rơgơi ntào kơ̆, mơya neh dŭt-lồi rau. Ờ geh cau lơi rơgơi mŭt tam hìu cau pràn-kơldăng mơ pìt-phà phan-bơna khai dê, dilah ờ lài kơ̆t-căp cau pràn-kơldăng; tŭ hơ̆ sòng pìt-phà hìu khai dê. Di ngăn, Añ đơ̆s mơ bol mê: Jơh ală jơnau tìs rơ̆p geh hồ kòn sau kòn-bơnŭs in, mơ jơh ală jơnau tràl-sơrbil bol khai neh đơ̆s krung be hơ̆ sơl; ai cau lơi đơ̆s tràl-sơrbil dơ Yàng Nhơm, gen jơl rài rài ờ geh hồ, mơya cau hơ̆ kòl tìs rài rài.” Tài bơh bol khai neh đơ̆s: “Khai kong huềng bơ̆-bơl lơh.”

Mè mơ ală oh mi Kơnràñ dê tŭs, ntào hơ bơdìh, sồr cau hòi Khai. Mpồl làng-bol nggui gùt-dăr Khai, mơ geh cau yăl mơ Khai: “Ne, mè Đi mơ ală oh mi ruh lŏ Đi găm hơ bơdìh jòi Đi.” Hơ wơl, Kơnràñ đơ̆s mơ bol khai: “Ñcau lah mè Añ mơ ală oh mi Añ taih ?” Mơ sền làm ală cau nggui gùt-dăr Khai, Khai đơ̆s: “Do lah mè Añ mơ ală oh mi Añ. Kơyoa cau lơi lơh jăt nùs kờñ Yàng dê, gen cau hơ̆ lah oh mi ruh lŏ Añ mơ mè Añ.”

Hơ̆ jơnau đơ̆s Kơnràñ dê.