Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: 1 Bơtau 19. 4-8
Kơnờm bơh bơta pràn phan ròng hơ̆ dê, gen khai rơgơi lòt tŭs hơ bơnơm Yàng dê.
Đăl tam sră dùl Bol Bơtau.
Tam ală ngai hơ̆, Elia lòt gùng dùl ngai, mŭt tam tiah ngềt-ngơ̆t. Tŭ tŭs tiah ne, mơ ơm nggui hơ đơm tờm chi nho, khai dăn geh chơ̆t mơ đơ̆s: Ơ Kơnràñ, neh tơl rau, dăn tă tĕ să kĭs añ, bơh añ ờ geh chi lơi rơlau mơ ală pàng yau añ. Lồc gen khai bĭc lơhă hơ đơm mbur chi nho; mơ ndo, huềng-duh Kơnràñ dê pơrlai khai mơ đơ̆s be do: Guh tĕ mơ sa. Khai sền gŏ rềp bồ khai geh dùl nơm bañ bŭh mơ dùl nhồng dà, khai sa mơ hùc, mơ bĭc wơl. Huềng-duh Kơnràñ dê tŭs wơl pơrlai khai dơ̆ bàr mơ đơ̆s: Guh tĕ mơ sa, tài bơh gùng mê păl lòt găm ngài. Khai guh mơ, sa mơ hùc, mơ kơnờm bơh bơta pràn phan ròng hơ̆ dê, khai lòt poăn jơ̆t ngai poăn jơ̆t bơnăng, sòng tŭs Horeb, bơnơm Yàng dê.
Hơ̆ jơnau đơ̆s Kơnràñ dê.
Nrĭ-nrềng: 33. 2-3, 4-5, 6-7, 8-9
Hw: Oh mi lòng lơyăp mơ sền tĕ, làng gĭt Kơnràñ niăm gĭt-nđờ.
Añ yălniăm Kơnràñ tam tơl tŭ, bơr añ ờ dơh jờngrơ Khai. Tam Kơnràñ, sồp-soàn añ geh pơniờ, cau rơbah iăt tĕ mơ chờhờp tĕ. Hw
Oh mi bal mơ añ jờngrơ tĕ Kơnràñ, he bal bal yălniăm tĕ sơnđăn Khai. Añ khoai-dăn Kơnràñ, Khai neh dờp bơr, mơ Khai ne klàs añ bơh bơta kơlôi ngòt. Hw
Sền tĕ hơ Kơnràñ làng oh mi rơhờn, mơ oh mi ờ tai bàs măt bil-bơl. Ne, cau jê-yăn hòi-dăn mơ Kơnràñ neh iăt, Mơ Khai neh klàs bol khai bơh ală bơta rềs-àr. Hw
Huềng-duh Kơnràñ dê bơtào sàl ơm drơng, gùt dăr bol cau ngòt Kơnràñ mơ đơng-gàr bol khai. Oh mi lòng lơyăp mơ sền tĕ, làng gĭt Kơnràñ niăm gĭt-nđờ. Bơtoă cau lơi jòi sơnđìng dơ Kơnràñ. Hw
Bơta đăl bàr: Ep 4. 30 – 5. 2
Oh mi ơm kĭs tĕ tam nùs gơboh be Kơnràñ Kristo neh kĭs.
Đăl tam sră Paulo, cau Dờp-pơyoa bơtoăh, pơyoa bol Epheso in
Ơ oh mi kờñ-gơboh, oh mi bañ lơh ơniai Yàng Nhơm Yàng dê, bơh tam Khai, oh mi geh lĭp-tềl làng kơ̆p-càng ngai tơwài tŭs. Oh mi tă-tơlĭk tĕ bơh oh mi ală bơta rềt-ròt, hào gơjrañ, sơiăl nùs, ñjĕk bơr, srăt-rơma, bal mơ tơl bơta bĭhkhĭh. Oh mi ơm kĭs tĕ niăm-lơnhơn bal bal, nđàc-sơngĭt tĕ mơ hồ-lời tĕ bal bal, be Yàng neh hồ-lời oh mi in tam Kơnràñ Kristo. Gen tàng oh mi đòm jăt tĕ Yàng, be oh kòn boh-bài ngăn Khai dê: Ơm kĭs tĕ tam nùs gơboh, be Kơnràñ Kristo neh gơboh mơ he, mơ jào să gơ̆s phan pơdơng mơ lơh-yàng bô bơlhô lơngồt, pơdơng dơ Yàng bơh he.
Hơ̆ jơnau đơ̆s Kơnràñ dê.
ALLELUIA: Jn 15. 15b
Alleluia. Alleluia. Kơnràñ đơ̆s: Añ neh hòi bol kòn lah cau bơyô, bơh jơh ală bơta Añ neh kơno bơh Bàp Añ, gen Añ neh ai bol kòn in gĭt. Alleluia.
Jơnau Yălniăm: Jn 6. 41-51
Añ lah bañ kĭs sùm, neh mù bơh trồ.
Đăl tam Jơnau Yălniăm niămgoh jăt Joan.
Tŭ hơ̆, bol Juđe kơmrào gơrềng bơh Kơnràñ, bơh Khai neh đơ̆s: “Añ lah bañ neh mù bơh trồ”, mơ bol khai đơ̆s: “Cau do ờ di lah Jesu, kòn Joseph, mơ me bàp Khai he neh gĭt ơ ? Ñchi gơlơh tŭ do Khai đơ̆s: Añ neh mù bơh trồ ?” Kơnràñ Jesu hơ wơl mơ đơ̆s mơ bol khai: “Bol mê bañ kơmrào tam gùl bal. Ờ geh cau lơi rơgơi tŭs mơ Añ, dilah Bàp lah Bơtau neh pơyoa Añ, ờ hoài khai; mơ Añ, Añ rơ̆p ai khai kĭs wơl tam ngai lồi-dŭt. Neh geh cĭh tam sră bol ala-bơr: Jơh ală cau rơ̆p geh Yàng bơto. Jơh ală cau lơi neh iăt mơ bơsrăm bơh dơ Bàp, gen tŭs mơ Añ. Ờ di lah geh cau lơi neh gŏ Bàp, mơya mìng Bơtau bơh dơ Bàp, Bơtau do neh gŏ Bàp. Di ngăn, di ngăn, Añ đơ̆s mơ bol mê: Cau lơi pindờn, gen geh bơta kĭs rài rài. Añ lah bañ bơta kĭs. Ồng-pàng bol mê neh sa manna tam blàng bràs mơ neh chơ̆t. Do lah bañ mù bơh trồ, làng dilah cau lơi sa bañ do, gen ờ chơ̆t. Añ lah bañ kĭs sùm, neh mù bơh trồ. Dilah cau lơi sa bañ do, gen rơ̆p kĭs rài rài; mơ bañ Añ rơ̆p ai, lah poăc Añ bơh bơta kĭs dunia dê in.”
Hơ̆ jơnau đơ̆s Kơnràñ dê.
