Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Jr 23. 1-6
Añ rơ̆p tơrgùm bơnah găm wơl mpồl belàt Añ dê, mơ ai bol gơ in geh bol cau ê.
Đăl tam sră Jeremia , cau ala-bơr dê.
Kơnràñ đơ̆s: Dồn-sa ală cau ê lơh nrăh-nring mơ tơnchơ̆t mpồl belàt Añ. Bơh be hơ̆, Kơnràñ gơ̆s Yàng Israel đơ̆s mơ ală cau ê pơlăm làng-bol Añ be do: Bol mê neh lơh nrăh-nring, ting-bơtrơh mơ ờ sền-gàr mpồl belàt Añ. Kơnràñ đơ̆s tai: Gen, Añ rơ̆p căhrơña ală broă iơ̆h-bơsăk bol mê dê. Añ rơ̆p tơrgùm bơnah găm wơl mpồl belàt Añ dê, bơh làm ală lơgăr mơ Añ neh pơnrăh bol gơ, Añ rơ̆p wèng bol gơ rê hơ blàng ñhơ̆t, làng bol gơ dờng-gơ̆s mơ pơnrà mpồl. Añ rơ̆p ai bol gơ in geh ală cau tờm-ê làng pơlăm bol gơ. Bol gơ rơ̆p ờ găm ngòt-rơngơ̆t mơ bìr-ngơ̆ tai, mơ bol gơ ờ găm siơ̆u-siăr chi lơi tai. Kơnràñ găm đơ̆s be do: Ndo, neh tŭs ală ngai Añ sơntê Đavit in dùl bồ-măt sơntìl song-dơpă, bồ-măt sơntìl do rơ̆p gơ̆s bơtau ơm-ăt, rơ̆p gơ̆s cau ngăc-ngăr, lơh gơ̆s jơnau song mơ bơta songring hơ đăng ù-dà. Ală ngai hơ̆, Juđa rơ̆p geh tơngklàs, Israel rơ̆p geh ơm kĭs ring-lơngai, mơ bol khai rơ̆p hòi-sơnđăn khai lah Kơnràñ-song-ring-bol-he-dê.
Hơ̆ jơnau đơ̆s Kơnràñ dê.
Nrĭ-nrềng: 22. 1-3a, 3b-4, 5,6
Hw: Kơnràñ ê-ròng añ, añ ờ phơ̆t chi lơi.
Kơnràñ ê-ròng añ, añ ờ phơ̆t chi lơi, tam blàng ñhơ̆t tơlir, Khai ơn añ. Khai lăm añ tŭs hơ ñhòng dà rơlô-bòl. Sồp-soàn añ, Khai tơmpràn wơl. Hw
Khai tề-lăm añ tam gùng song-dơpă, bơh sơnđăn Khai dê. Bŭlah cơnđoà lòt tam thòng mbur chơ̆t, añ ờ ngòt bơta iơ̆h, kơyoa Đi ơm bal mơ añ. Gai wai mơ gai jra Đi dê lơh añ in răm nùs. Hw
Đi yờ sào dơ đăp măt añ, tam toh mơ bol lơh ơniai añ, dơ bồ añ, Đi bong bơñà, mơ coàn tơrnờm añ bềng-lìu. Hw
Nùs niăm-lơnhơn mơ nđàc-sơngĭt Kơnràñ dê jăt añ, jơh tơl ală ngai tam rài añ, mơ añ rơ̆p ơm tam hìu Kơnràñ dê, jŏ bơnòng, jòng bơnăng, kuăng tơngai. Hw
Bơta đăl bàr: Ep 2. 13-18
Khai tờm gơ̆s bơta ring-lơngai he dê, Khai neh lơh bàr đah gơjềng dùl.
Đăl tam sră Paulo, cau Dờp-pơyoa bơtoăh, pơyoa bol Epheso in.
Ơ oh mi kờñ-gơboh, yau òr oh mi gơ̆s bol cau ơm ngài, mơya tŭ do tam Kơnràñ Jesu Kristo, oh mi neh gơjềng rềp kơnờm bơh mhàm dờng-màng Khai dê. Khai tờm gơ̆s bơta ring-lơngai he dê, Khai neh lơh bàr đah gơjềng dùl, neh lơh tơrlah tơrñăng căh ĭs, tơnroh bơta ềng-gơjrañ tam să-jăn Khai dê, gen lah săng-sơrbì gùng-dà yau bal mơ ală bơta bơhiàn, làng bơtào jơh bàr gơjềng dùl cau pa, cèng wơl bơta ring-lơngai, ngui chikal tam bơsòr bàr jơinòi tam dùl să-jăn bal mơ Yàng. Tam Khai, kơrnoăt sò-tơ̆m neh kong tơnroh, mơ Khai neh tŭs yăltơnggĭt Jơnau Yălniăm ring-lơngai oh mi in lah bol cau ơm ngài, mơ bơta ringlơngai bol cau ơm rềp in. Mơ tờm bơh Khai mơ he bàr đah geh tŭs rềp Bàp tam dùl bal Huềng-nhơm.
Hơ̆ jơnau đơ̆s Kơnràñ dê.
ALLELUIA:Jn 8. 12
Alleluia. Alleluia. Kơnràñ đơ̆s: Añ lah bơta àng dunia dê; cau lơi jăt Añ, rơ̆p geh àng bơta kĭs dê. Alleluia.
Jơnau Yălniăm: Mk 6. 30-34
Bol khai be ală belàt ờ geh cau ê.
Đăl tam Jơnau Yălniăm niămgoh jăt Marko.
Tŭ hơ̆, bol dờp-pơyoa pơrjum bal mơ Kơnràñ Jesu, yăl wơl Kơnràñ in jơh ală bơta bol khai neh lơh mơ neh bơto. Kơnràñ đơ̆s mơ bol khai: “Tờm bol kòn pleh tĕ tam anih ngềt-ngơ̆t mơ ơm rơlô dŭt.” Kơyoa geh gal cau lòt-rê mơ bol khai ờ geh tŭ sào-sa. Kơnràñ Jesu mơ bol dờp-pơyoa hào ahò pleh tam tiah ngềt-ngơ̆t. Găl cau gŏ bol khai lòt gen gĭt-wă; mơ bơh jơh ală bòn dờng, cau lòt jơng ntoăt tŭs tềng hơ̆ mơ tŭs lài mơ bol khai. Lĭk bơh ahò, Kơnràñ gŏ mpồl làng bol găl, gen nđàc-sơngĭt bol khai, bơh bol khai be ală belàt ờ geh cau ê, mơ Kơnràñ sơntờm bơto bol khai rà jơnau.
Hơ̆ jơnau đơ̆s Kơnràñ dê.
