Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Am 7. 12-15
Lòt tĕ đơ̆s ala-bơr làng-bol Añ in.
Đăl tam sră Amos, cau ala-bơr dê.
Tam ală ngai hơ̆, Amasia (cau kơiơng-yàng tam Bethel) đơ̆s mơ Amos be do: Ơ cau ala-bơr, mê dô tĕ hơ ù Juđa, ơm kĭs mơ đơ̆s ala-bơr tam tềng hơ̆. Bañ pơnjăt đơ̆s ala-bơr tam Bethel tai, bơh hơ̆ lah gơlăng niămgoh bơtau dê mơ lah gơlăng duh-khoai lơgăr bơtau dê. Amos hơ mơ Amasia be do: Añ ờ di lah cau ala-bơr, krung ờ di lah kòn cau ala-bơr dê, mơya lah cau ê belàt, lòt pĭc plai tăptơ. Tŭ añ găm lòt jăt mpồl belàt, gen Kơnràñ lăm añ lòt mơ đơ̆s mơ añ be do: “Mê lòt tĕ đơ̆s ala-bơr làng-bol Israel Añ dê in.
Hơ̆ jơnau đơ̆s Kơnràñ dê.
Nrĭ-nrềng: 84. 9ab-10, 11-12,13-14
Hw: Ơ Kơnràñ, dăn sơnđio nùs tơpă-tơpài Đi dê hi in, mơ pà bơta tơngklàs hi in.
Añ rơ̆p iăt jơnau Yàng đơ̆s mơ añ, bơh Khai đơ̆s bơr ring-lơngai mơ làng-bol Khai. Di ngăn, bơta tơngklàs Kơnràñ dê ơm rềp mơ cau lơi duh-ngòt Khai, Mơ ù-dà he dê rơ̆p geh gơklŏ. Hw
Nùs tơpă tơpài mơ jơnau-ngăn rơ̆p tam tìp bal; Bơta song-dơpă mơ ring-lơngai rơ̆p tam cum bal. Jơnau-ngăn gơ lĭk gơ̆s bơh plai ù Mơ bơta song-dơpă bơh trồ jơnhoa wèt sền. Hw
Bơh Kơnràñ rơ̆p pơha nùs lùng-làng, mơ ù-dà he rơ̆p gơ lĭk bơkào tòt plai. Bơta song-dơpă lòt hơ đăp măt Khai, mơ pờ gùng cơnđoà jơng Khai dê in. Hw
Bơta đăl bàr: Ep 1. 3-14
Yàng neh rơwăh he tam Khai lài mơ tŭ crơnggơ̆s dunia.
Đăl tam sră Paulo, cau Dờp-pơyoa bơtoăh, pơyoa bol Epheso in.
Yălniăm Yàng gơ̆s Bàp Jesu Kristo, Kơnràñ he, Bơtau neh yălniăm he in mơ ală bơta yălniăm đah huềng hơ đăng trồ, tam Kơnràñ Kristo. Be Khai neh rơwăh he tam Khai lài mơ tŭ crơnggơ̆s dunia, làng he geh gơjềng niămgoh mơ ờ tềl bơ̆ dơ đăp măt Khai tam nùs gơboh. Khăt-gơjăt nùs niămgoh Khai, Khai neh rơndăp lài he in geh bơtoăh gơ̆s kòn kơnờm bơh Jesu Kristo, làng he jờngrơ bơta gơklŏ hànggoh Khai dê, mơ Khai neh pà he in tam Kòn kờñ-gơboh Khai dê. Tam Khai, he geh bơta tơwài kơnờm bơh mhàm Khai, geh bơta hồ tìs jăt bơta păsrơyŭ bơta hànggoh Khai dê. Bơta hànggoh do, Khai neh tŭh bềng-lìu hơ đăng he bal mơ jơh ală bơta ngăc-ngăr dờng-rơyŭ, lơh he in gĭt wơl bơta ndơ̆p-ndơr nùs kờñ Khai dê, jăt nùs Khai neh rơndăp gơrềng bơh Kơnràñ Jesu, làng bơsir tam tơngai wil-tơl, gen lah trơgùm wơl ală jơi-phan tam trồ tam tiah tam Kơnràñ Kristo. Krung tam Khai mơ hi geh hòi-jà gơ̆s cau pơdờn, geh rơndăp lài jăt nùs kờñ Khai dê, gơ̆s Bơtau crơnggơ̆s ală bơta jăt nùs niămgoh Khai, làng hi gơjềng bơr jờngrơ bơta gơklŏ Khai dê, hi gơ̆s bol cau gơn-kơnờm dơ Kơnràñ Kristo. Tam Khai, jơh oh mi sơl, tơnơ̆ mơ tŭ oh mi neh iăt bơr ngăn-ngồn, lah Jơnau Yălniăm tơngklàs oh mi, oh mi neh pindờn mơ geh lĭp-tềl Yàng Nhơm, be neh hơ. Khai gơ̆s cơng màng bơnah jơtài he dê, làng he geh bơta tơwài, mơ geh jờngrơ bơta gơklŏ Khai.
Hơ̆ jơnau đơ̆s Kơnràñ dê.
ALLELUIA: Jn 1. 14 mơ 12b
Alleluia. Alleluia. Jơnau Đơ̆s neh gơ̆s poăc-să mơ neh ơm tam gùl bol he. Ală cau lơi wă-dờp Khai, gen Khai pà bol khai in gơnoăr gơ̆s kòn Yàng dê. Alleluia.
Jơnau Yălniăm: Mk 6. 7-13
Kơnràñ Jesu sơntờm pơyoa bol khai lòt yăl-bơto
Đăl tam Jơnau Yălniăm niămgoh jăt Marko.
Tŭ hơ̆, Kơnràñ hòi bol Jơ̆t Bàr tŭs, mơ sơntờm pơyoa bol khai lòt bar nă bàr nă, mơ pà bol khai in gơnoăr hơ đăng ală huềng bơ̆-bơl; mơ bơtăn bol khai bañ cèng chi lơi tŭ lòt gùng, mìng gai jra lơm: ờ bañ, ờ kơldung, ờ priă-jền tam che bŭt, di cù khŏ-joă, mơ ờ di soh bàr blăh ào. Mơ Kơnràñ đơ̆s mơ bol khai: “Bŭlah tềng lơi, tŭ bol kòn mŭt tam hìu lơi, gen ơm tĕ tềng hơ̆, jơl tŭs tŭ bol kòn lĭk-lòt bơh tềng hơ̆. Tiah lơi ờ wă-rò bol kòn mơ ờ iăt bol kòn, gen tŭ lĭk bơh nhơ̆, rơtŭh tĕ thul bơh dơ jơng bol kòn làng gơ̆s cơng bol khai in.” Bol khai lĭk-lòt yălbơto, làng cau in ềng-màl; mơ bol khai bơtrơh rà cà, bŏng jiờu găl cau kòp-jê in mơ tơmbời bol khai.
Hơ̆ jơnau đơ̆s Kơnràñ dê.
