Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ej 17. 22-24
Añ ai chi lơyăh in gơ hòn.
Đăl tam sră Ejekiel, cau ala-bơr dê.
Do Kơnràñ gơ̆s Yàng đơ̆s: Añ tờm rơ̆p koh cồng jơnhoa rơlau jơh chi kơloàng dê, Añ rơ̆p pĕt dùl nơm ngkur bơnung gơ căt bơh cồng, mơ rơ̆p cèng gơ tăm hơ đăng bơnơm jơnhoa rĭs. Añ rơ̆p tăm gơ hơ đăng bồ bơnơm Israel dê, gơ rơ̆p lĭk ngkur, tòt plai, mơ gơjềng chi kơloàng dờng ngăn; ală jơi sềm trồ tŭs lơm ơm prŭ hơ đơm tờm chi mơ lơh rơsòn hơ đơm mbur gơ dê. Jơh ală chi-che tam brê-dơr gĭt lơm Añ gơ̆s Yàng, Añ neh kơl tờm chi jơnhoa mơ ai chi lơyăh gơ hòn. Añ neh lơh tờm chi tơlir gơ lĭk ñòp-ro, mơ lơh tờm chi ro gơjềng tơlir crư. Añ gơ̆s Kơnràñ, Añ neh đơ̆s mơ neh lơh.
Hơ̆ jơnau đơ̆s Kơnràñ dê.
Nrĭ-nrềng: 91. 2-3, 13-14, 15-16
Hw: Ơ Kơnràñ, niăm ngăn broă jờngrơ Đi.
Niăm ngăn broă jờngrơ Kơnràñ, mơ pĕ kơlñi gờm sơnđăn Khai, ơ Bơtau Dờng Rơlau Jơh, làng yăl-pơnrơ nùs gơboh Khai dê tŭ trồ drim, mơ nùs dờn-song Khai dê tŭ trồ măng. Hw
Cau niăm-đào be tờm chà-là lĭk bơkào hàng-niăm, dờng-gơ̆s be chi kơloàng tiah Li-băng. Bol khai geh tăm tam hìu Kơnràñ, tam rơng hìu Yàng gơlĭk bơkào. Hw
Ràm-ro rau, găm gơlĭk bơkào tòt plai, bol khai bềng bơsơ̆t-kĭs mơ bol khai kĭs tơlir-crư, làng yăl-pơnrơ Kơnràñ song-dơpă gĭt-nđờ, Kơnràñ gơ̆s lŭ-klềr añ dê, tam Khai ờ gŏ geh bơta thừ-blơ̆. Hw
Bơta đăl bàr: 2 Kr 5. 6-10
Bŭlah lĭk-lòt ngo lah ơm wơl tam să-jăn, he ơm kĭs tĕ niăm nùs Kơnràñ.
Đăl tam sră bàr Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, he sùm khĭn-cha, bơh gĭt rau tŭ lơi găm ơm kĭs tam să-jăn do, lah he ơm nrah ngài bơh Kơnràñ, – Kơyoa kơnờm bơh bơta pindờn, ờ di bơh neh gŏ mơ he cơnđoà lòt, – He krung khĭ-cha mơ wờl-kờñ tiăn nrah ngài bơh să-jăn làng ơm bal mơ Kơnràñ. Mơ bơh be hơ̆, bŭlah ơm kĭs tam să-jăn ngolah lĭk bơh să-jăn, he lơh ngăn làng ơm kĭs niăm nùs Kơnràñ. Bơh jơh ală he di ràng-tơlĭk lơm dơ đăp sơbàn căhrơña Bơtau Kristo dê, làng kờp nă dờp wơl cồng nha broă rài kĭs he dê, khăt gơ jăt he neh lơh niăm ngolah lơh iơ̆h.
Hơ̆ jơnau đơ̆s Kơnràñ dê.
ALLELUIA: Jn 8. 12
Alleluia. Alleluia. Kơnràñ đơ̆s: Añ lah bơta àng dunia dê; cau lơi jăt Añ, rơ̆p geh àng bơta kĭs dê. Alleluia.
Jơnau Yălniăm: Mk 4. 26-34
Găr sơbê gơ dêt-rơhền rơlau mơ jơh ală găr sơntìl tam ù; mơya gơ guh mơ gơ gơ̆s dờng rơlau mơ jơh ală biăp.
Đăl tam sră Jơnau Yălniăm niămgoh jăt Marko.
Tŭ hơ̆, Kơnràñ Jesu đơ̆s mơ làng-bol be do: “Lơgăr Yàng krung be dùl nă cau sĭh găr sơntìl tam ù, măng mơ ngai, cau hơ̆ bĭc ngolah kăh, gen găr sơntìl gơ căt bồ mơ gơ hòn, tam tŭ cau hơ̆ ờ gĭt. Ù gơlĭk cồng-nha gơ dê, lài jơh tờm kòi, lồc gen nting kòi, lồc gen găr kòi bềng nting. Mơ tŭ cồng-nha neh gơlĭk gơ̆s rau, gen tŭ hơ̆ mơ, cau ai mơ̆, bơh kàl tơwès neh tŭs.” Kơnràñ đơ̆s: “Bol he pơndrờm lơgăr Yàng mơ bơta lơi, ngolah ai jơnau pơniơu lơi làng yăl-tơlĭk gơ taih ? Gơ krung be găr sơbê, tŭ sĭh tam ù, gơ dêt-rơhền rơlau mơ jơh ală găr sơntìl tam ù; mơya dơ̆ neh sĭh rau, gen gơguh mơ gơ gơ̆s dờng rơlau mơ jơh ală biăp, mơ gơ căt ală ntê dờng, tiăn tŭs sềm tam trồ rơgơ ơm hơ đơm mbur gơ.” Kơnràñ ngui rà jơnau pơniơu be hơ̆ làng yăl jơnau đơ̆s bol khai in, jăt be bol khai rơgơi iăt; Kơnràñ ờ đơ̆s chi lơi mơ bol khai mơ ờ ngui jơnau pơniơu. Mơya tŭ ơm ĭs, Khai yăl-mblàng jơh ală jơnau bol jăt-dờn Khai dê in.
Hơ̆ jơnau đơ̆s Kơnràñ dê.
