Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Job 38. 1, 8-11
Rơyah dà mê dê di ơm wơl tềng do.
Đăl tam sră Job.
Tŭ hơ̆, bơh tam bơta ngòñ-sìng, Kơnràñ hơ wơl mơ Job be do: Tŭ dà gơ hòr pràn lơh tơrlăh àr be deh-dùh bơh ndul mè, ñcau mơ neh ai mpồng làng kơryăn wơl gơ, tŭ añ ai mhoăl lơh ào gòm gơ, mơ ai klăm-jơngo jơm-ndơ̆p gơ be pơnồ klơm oh nga taih ? Añ neh trĕh nhàr gùt-dăr gơ, neh ơn dơm mpồng mơ kơrnăl mơ đơ̆s be do: Mê hòr tŭs ndo lơm, ờ geh hòr ngài tai, mơ rơyah dà krung di ơm wơl tềng do sơl.
Hơ̆ jơnau đơ̆s Kơnràñ dê.
Nrĭ-nrềng: 106. 23-24, 25-26, 28-29, 30-31
Hw: Yălniăm tĕ Kơnràñ, bơh nùs tơpă-tơpài Khai dê găm sùm ală rài.
Ală cau hào ahò tiă dà-lềng, lòt kă-bro hơ đăng dà, bol khai neh sền gŏ ală broă krơi-sơrbơi Khai dê tam tiah ndơ̆p-rơyŭ. Hw
Kơnràñ tơlĭk săp, mơ Khai neh sồr càl-rơbŭt druh-khồm, Khai neh lơh ñsừc dà-lềng hào jơnhoa. Bol cau hơ̆ guh tŭs trồ tơlir, mù tam kơlàng dà-lềng hŭt-hung, nhơm-nùs bol khai gơlơng rơm ngòt tam bơta cŭ-cua. Hw
Bol khai neh hòi-dăn Kơnràñ tam bơta kòl-yăn kal-ke, mơ Khai neh tơngklàs bol khai bơh bơta moăt-kơnòl. Khai tam gơl ngòñ-sìng gơjềng càl khồm liu-hiu, mơ gĭt-nđờ rơyah dà-lềng ơm thĭt-ngềt. Hw
Bol khai chờhờp bơh gŏ rơyah dà-lềng ơm thĭt-ngềt, mơ Kơnràñ neh lăm bol khai tŭs gah dà kơ̆p-kờñ. Bol cau hơ̆ ưn-ngài tĕ Kơnràñ bơh nùs sơrmah-sơrmài, mơ ală bơta krơi-sơrbơi Khai dê bal mơ kòn-dunia. Hw
Bơta đăl bàr: 2 Kr 5. 14-17
Do, ală bơta pa neh geh crơnggơ̆s.
Đăl tam sră bàr Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, nùs gơboh Kơnràñ Kristo dê bơchồl he, he pindờn ngăn jơnau do, lah dùl nă neh chơ̆t bơh tơl nă, gen ală cau neh chơ̆t lơm. Mơ Kơnràñ Kristo neh chơ̆t ala ală cau in, làng bol cau lơi găm kĭs, gen ờ găm kĭs he in tai, mơ lah kĭs ya Bơtau neh chơ̆t mơ kĭs wơl bơh bol khai in. Gen tàng, bơh ndo, he ờ găm gĭt cau lơi jăt poăc-să tai. Bŭlah di he neh gĭt Kơnràñ kristo jăt poăc-să, gen tŭ do he ờ găm gĭt Khai be hơ̆ tai. Be hơ̆, dilah cau lơi neh gơjềng dùl jơi crơnggơ̆s pa tam Kơnràñ Kristo, gen ală chi lơi yau neh găn bloh, bơh ndo, ală bơta gơlĭk gơ̆s pa lơm.
Hơ̆ jơnau đơ̆s Kơnràñ dê.
ALLELUIA: Jn 1. 14 mơ 12b
Alleluia. Alleluia. Jơnau Đơ̆s neh gơ̆s poăc-să, mơ neh ơm tam gùl bol he. Bol cau lơi neh dờp Khai, gen Khai pà bol khai in gơnoăr gơ̆s Kòn Yàng dê. Alleluia.
Jơnau Yălniăm: Mk 4. 35-41
Cau do lah ñcau, mơ rơbŭt mơ dà-lềng krung dờn bơr Khai taih ?
Đăl tam Jơnau Yălniăm niămgoh jăt Marko.
Ngai hơ̆, tŭ mho tŭs, Kơnràñ đơ̆s mơ bol jăt-dờn: “Bol he tiă lă đah bơtĭ ne.” Lời mpồl làng-bol, bol jăt-dờn pơdiăng Kơnràñ lòt, bơh Khai neh ơm tam ahò rau; mơ jơh ală ahò ndai lòt bal mơ Khai. Mơ gơlĭk càl-rơbŭt dờng, dà ñsừc mŭt tam ahò, tiăn tŭs ahò bềng dà. Mơya Kơnràñ găm ơm dơ tiah trơwơl ahò dê, kờl bồ dơ kơrnờl mơ bĭc; bol jăt-dờn pơrlai Khai mơ đơ̆s mơ Khai: “Ơ Pôgru, Đi ờ kơlôi bol he chơ̆t ơ ?” Kơnràñ guh bĭc, lah-pơrhơng rơbŭt mơ đơ̆s mơ dà-lềng: “Ngềt tĕ, ơm momŏ tĕ!” Rơbŭt ơm thĭt, mơ gơlĭk gơ̆s ring-drĭk ngăn. Kơnràñ đơ̆s mơ bol khai: “Ñchi gơlơh bol kòn bìr-ngòt ? Bol kòn ờ hềt geh nùs pindờn ơ ?” Bol khai rơngòt-rơngơ̆t ngăn mơ đơ̆s bal: “Be hơ̆, cau lah ñcau, mơ rơbŭt mơ dà- lềng krung dờn bơr Khai taih ?”
Hơ̆ jơnau đơ̆s Kơnràñ dê.
