Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: 2 Bơtau 4. 42-44
Bol khai sa rau mơ găm jơngkăh.
Đăl tam sră bàr Bol Bơtau.
Tam ală ngai hơ̆, gơ tìp bơta jơgloh-rung, geh dùl nă cau bơh Baal-salisa cèng tŭs tampồ cau Yàng dê in bañ bồ sơnăm, bàr jơ̆t nơm bañ lơh mơ kòi màch mơ mồ ơn tam rơnđò. Cau Yàng dê đơ̆s mơ: Dăn yờ làng-bol in sa. Cau duh broă khai dê hơ: Añ yờ mìng kàr hơ̆ dùl rơhiăng nă in sa sơl ờ ? Mơya cau Yàng dê sồr: Yờ tĕ làng-bol in sa, bơh Kơnràñ yăl be do: Cau sa rau mơ rơ̆p găm jơngkăh. Lồc gen cau yờ bol khai in sa mơ găm jơngkăh di be bơr Kơnràñ yăl.
Hơ̆ jơnau đơ̆s Kơnràñ dê.
Nrĭ-nrềng: 144. 10-11, 15-16, 17-18
Hw: Ơ Kơnràñ, Đi pờ ha mpàng tê, mơ lơh hi in hừh-hờm.
Ơ Kơnràñ ală broă Đi dê jờngrơ tĕ Đi, mơ ală cau niămgoh Đi dê yălniăm tĕ Đi. Cau dunia yăl tĕ bơta gơklŏ lơgăr Đi dê, mơ yờ-tơngguh tĕ bơta gơnăp-gơnoăr Đi dê. Hw
Ală phan-jơi wèt măt kơnờm dơ Kơnràñ, mơ Khai pà phan sa bol gơ in jăt tơl di tŭ. Kơnràñ pờ ha mpàng tê, mơ lơh ală jơi kĭs hừh-hờm. Hw
Kơnràñ song-ring tam ală gùng-dà Khai dê, mơ gơboh mơ ală broă gơnrơh Khai neh crơnggơ̆s. Kơnràñ ơm rềp mơ ală cau hòi-dăn Khai, ală cau hòi-dăn Khai mơ nùs ngăn-ngồn. Hw
Bơta đăl bàr: Ep 4. 1-6
Geh mìng dùl să-jăn, dùl Kơnràñ, dùl bơta pindờn, mơ dùl tềl pơnđum lơm.
Đăl tam sră Paulo, cau Dờp pơyoa bơtoăh, pơyoa bol Epheso in.
Ơ oh mi kờñ-gơboh, añ gơ̆s cau-jàm tam Kơnràñ, añ bơtăn oh mi ơm kĭs tĕ di păl mơ bơta hòi-jà oh mi neh wă-dờp. Oh mi jơh nùs tĕ pơndêt să, niăm-lơnhơn, kơ̆-nùs, ơ̆t-ơl bal tam bơta gơboh, răk tĕ gràng-gàr bơta tam klăc gơ̆s dùl đah gah nhơm nùs, ngui bơta ring-lơngai răm-sòr lơh che kơ̆t-pơnjăng. Geh mìng dùl să-jăn mơ dùl nùs-nhơm krung be oh mi neh geh hòi-jà tŭs tam dùl bơta kơnờm. Geh mìng dùl Kơnràñ, dùl bơta pindờn, dùl tềl pơnđum lơm. Geh mìng dùl Yàng gơ̆s Bàp jơh ală cau, Bơtau ơm hơ đăng jơh ală cau, lơh broă tam ală cau, mơ ơm tam ală cau.
Hơ̆ jơnau đơ̆s Kơnràñ dê.
ALLELUIA: Jn 15. 15b
Alleluia. Alleluia. Kơnràñ đơ̆s; Añ neh hòi bol kòn lah cau bơyô, bơh jơh ală bơta Añ neh kơno bơh Bàp Añ, gen Añ neh ai bol kòn in gĭt. Alleluia.
Jơnau Yălniăm: Jn 6.1-15
Kơnràñ tam pà bol cau nggui in… kàr lơi bol khai kờñ .
Đăl tam Jơnau Yălniăm niămgoh jăt Joan.
Tơnơ̆ hơ̆, Kơnràñ Jesu tiă đah ne dà-lềng Galilea, hơ̆ lah dà-lềng Tiberia. Geh mpồl làng-bol găl jăt Khai, tài bơh neh gŏ ală tềl krơi Khai neh lơh hơ đăng ală cau kòp-jê. Kơnràñ Jesu guh hơ đăng bơnơm mơ nggui tềng hơ̆ bal mơ bol jăt-dờn Khai dê. Lèh Lòt Găn, lah ngai lèh bol Juđe dê, neh rềp. Tŭ Kơnràñ Jesu tơngờ măt mơ gŏ mpồl làng-bol găl tŭs hơ Khai, gen đơs mơ Philippe: “Mbơh bol he blơi bañ làng bol do in sa taih ?” Kơnràñ đơs jơnau hơ̆ làng tơlòng khai, kơyoa tờm Kơnràñ neh gĭt ñchi Kơnràñ rơpê lơh. Philippe hơ wơl mơ Kơnràñ: “Bàr rơhiăng đŏng priă bañ krung ờ tơl bol khai in, làng kờp nă dờp dŭt!” Dùl nă tam bol jăt-dờn Kơnràñ dê, lah Andrea, oh Simon Petro dê, đơs mơ Kơnràñ: “Do geh dùl nă kòn klau geh prăm nơm bañ kòi mi mơ bàr nơm ka; mơya gen lah ñchi mơ găl cau kàr hơ̆ ?” Kơnràñ Jesu đơs: “Sồr tĕ cau nggui.” Tiah hơ̆ geh oă ñhơt. Gen cau nggui, khà cau klau pơgăp prăm rơbô nă. Kơnràñ Jesu dờp bañ, mơ lồc ưn-ngài, gen tam pà bol cau nggui in; mơ ka krung be hơ̆ sơl, kàr lơi bol khai kờñ. Tŭ bol khai neh hờm rau, Kơnràñ đơs mơ bol jăt dờn Khai dê: “Tơrgùm tĕ ală pĕt jơngkah, mbài roh chi lơi.” Gen bol khai tơrgùm mơ tơmbềng jơ̆t bàr bài pĕt jơngkah bơh prăm nơm bañ kòi mi bol khai neh sa. Ală cau hơ̆, tŭ gŏ tềl krơi Kơnràñ lơh, gen đơs: “Cau do ngăn lah cau ala-bơr, cau pal tŭs tam dunia!” Kơnràñ Jesu, tŭ gĭt lah bol khai rơpê tŭs làng kŭp-bơklơn Khai mơ bơtào Khai gơs bơtau, gen pleh tai tam bơnơm, mìng dùl nă Khai.
Hơ̆ jơnau đơs Kơnràñ dê.
