Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ez 2. 2-5
Do gơ̆s hìu pơrlơ̆-dră, mơ bol khai rơ̆p gĭt tam gùl bol khai găm geh dùl nă cau ala-bơr.
Đăl tam sră Ezekiel, cau ala-bơr dê.
Tam ală ngai hơ̆, tơnơ̆ mơ tŭ đơ̆s mơ añ, huềng-yàng mŭt tam añ, mơ đơng añ ñă-ntào. Añ kơno Khai đơ̆s mơ añ be do: Ơ kòn-bơnŭs, Añ pơyoa mê tŭs mơ oh kòn Israel, tŭs mơ làng-bol pơrlơ̆-dră mơ Añ, bol khai mơ pàng yau bol khai tơntŭp dơ bơta tam bơrkoăt Añ dê jơl tŭs ngai do. Añ pơyoa mê tŭs làng đơ̆s mơ ală oh kòn dol muh dol măt be do: Kơnràñ gơ̆s Yàng yăl be hơ̆. Bol khai iăt ngolah ờ iăt, tài bơh do gơ̆s bol pơrlơ̆-dră, mơ bol khai rơ̆p gĭt tam gùl bol khai geh dùl nă cau ala-bơr.
Hơ̆ jơnau đơ̆s Kơnràñ dê.
Nrĭ-nrềng: 122. 1-2a, 2bcd, 3-4
Hw: Măt hi sền dơ Kơnràñ, jơl tŭs tŭ Khai nđàc-sơngĭt hi.
Añ tơngờ măt sền hơ Kơnràñ, Khai ơm-ăt tam tiah jơnhoa ngăn. Ne, be măt bol dĭ klau sền dơ tê cau pô-klau. Hw
Be măt bol dĭ ùr sền dơ tê cau pô-ùr. Măt hi krung sền dơ Kơnràñ gơ̆s Yàng hi dê be hơ̆, jơl tŭs tŭ Khai nđàc-sơngĭt hi. Hw
Dăn nđàc-sơngĭt, ơ Kơnràñ, dăn nđàc-sơngĭt, Tài bơh hi neh kong sền ờ sơ̆p, bàssìl oă ngăn! Sồp-soàn hi hờm-ngŏ ngăn bơr ñŏ-bơrsèl bol păs-gơ̆s dê, bơta joh-jăm bol pơnhừ să dê. Hw
Bơta đăl bàr: 2 Kr 12. 7-10
Añ chờhờp ngăn pơniờ să bơh ală bơta ờ diă ờ diơng añ dê, làng bơta pràn Kơnràñ Kristo dê ơm sùm tam añ.
Đăl tam sră bàr Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, làng ală bơta yăl-tơlĭk màng-rơyŭ ờ lơh añ in pơnhừ- pơnhài, gen dùl nơm mŭ gơ srơ̆p tam poăc añ, dùl huềng Satan dê pah măt añ. Bơh be hơ̆, neh pe dơ̆ rau añ khoai-dăn Kơnràñ, làng gơ pleh ngài bơh añ. Mơya Khai đơ̆s mơ añ: Bơta hàng-goh Añ dê neh tơl rau mê in, bơh bơta pràn Añ dê geh ràng-tơlĭk tam bơta lơbơn-lơñơ. Gen añ chờhờp ngăn pơniờ să bơh ală bơta ờ diă ờ diơng añ dê, làng bơta pràn Kơnràñ Kristo dê ơm sùm tam añ. Gen tàng, añ hờn-chờ ngăn tam bơta lơbơn-lơñơ añ dê, tam bơta tơmbàs, cŭ-cua, kŭpkuăn mơ rơbah-dồn bơh Kơnràñ Kristo: Tài bơh tŭ añ lơbơn-lơñơ, tờm lah tŭ añ pràn-kơldăng.
Hơ̆ jơnau đơ̆s Kơnràñ dê.
ALLELUIA: Lk 4. 18
Alleluia. Alleluia. Nhơm Kơnràñ dê hơ đăng añ, pơyoa añ yăl Jơnau Yălniăm bol rơbah in. Alleluia.
Jơnau Yălniăm: Mk 6. 1-6
Ờ geh cau ala-bơr lơi mơ ờ geh sền-màng, mìng tam bòn tờm khai dê.
Đăl tam Jơnau Yălniăm niămgoh jăt Marko.
Tŭ hơ̆, Kơnràñ lĭk-lòt bơh tềng hơ̆, tŭs tam bòn tờm Khai dê, mơ bol jătdờn Khai dê jăt Khai. Ngai sabbat tŭs, Kơnràñ sơntờm bơto tam hìu-pơrjum; mơ găl cau iăt gen ai lơh krơi mơ đơ̆s: “Mbơh mơ cau do geh ală bơta hơ̆ taih, mơ mbelah bơta jăk-chài geh pà Khai in, mơ ală broă pràn-gơnoăr be hơ̆ bơh tê Khai lơh ? Cau do ờ di lah cau lơh broă chi dê, kòn Maria dê, oh mi mơ Jakobe, Jose, Juđa mơ Simon ơ ? Mơ ruh-lŏ Khai dê ờ di lah bol cau ơm bal mơ bol hi ơ ?” Mơ bol khai gơtŭp tìs bơh Khai. Kơnràñ Jesu đơ̆s mơ bol khai: “Ờ geh cau ala-bơr lơi mơ ờ geh sền-màng, mìng tam bòn tờm Khai dê, tam gơ̆p-jơi Khai dê, mơ tam hìu Khai dê lah ờ lơm.” Tềng hơ̆, Kơnràñ ờ rơgơi lơh broă pràn-gơnoăr lơi, mìng ơn tê tơmbời dŭt cau kòp-jê lơm; mơ Khai ai lơh krơi tài bơh bol khai ờ pindờn. Khai lòt bơto làm ală bòn gùt-dăr.
Hơ̆ jơnau đơ̆s Kơnràñ dê.
