Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Năm B
Bơta đăl dùl: Cr 9. 8-15
Bơta tam bơrkoăt Yàng mơ Noe, tơnơ̆ mơ tŭ khai neh geh klàs bơh dà-kŏ bŏ-lơ.
Đăl tam Sră Crơnggơ̆s.
Do Yàng dơ̆s mơ Noe mơ oh kòn khai be do: “Do Añ cĭh bơta tam bơrkoăt Añ dê mơ bol mê mơ kòn sau bol mê, mơ jơh ală jơi-kĭs găm ơm bal mơ bol mê, be sềm-răc, jơi ròng, jơh ală phan jơi găm kĭs hơ đăng măt ù bal mơ bol mê, jơh ală chi lơi lĭk bơh ahò mơ jơh ală phan jơi hơ đăng măt ù. Añ cĭh bơta tam bơrkoăt Añ dê mơ bol mê: Dà-kŏ bŏ-lơ ờ tai tơnroh jơh ală phan jơi, krung ờ tŭ lơi geh tai dà-kŏ bŏ-lơ tơnlề plai ù.” Mơ Yàng đơ̆s: “Do gơ̆s tềl sơnđio bơta tam bơrkoăt cĭh dơ gùl Añ mơ bol mê, mơ jơh ală phan jơi găm ơm bal mơ bol mê, jơl sùm hìngnau. Añ rơ̆p tơnơn hơ đăng trồ dùl nơm bơrlăng-kăng, mơ gơ rơ̆p gơ̆s tềl sơnđio bơta tam bơrkoăt dơ gùl Añ mơ plai ù. Tŭ Añ trơgùm wơl mhoal trồ, gen bơrlăng-kăng rơ̆p gơlĭk hơ đăng mhoal, mơ añ rơ̆p kah wơl bơta tam bơrkoăt neh cĭh dơ gùl añ mơ bol mê mơ ală phan jơi, mơ ờ tŭ lơi dà-kŏ bŏ-lơ tơnroh ală jơi phan be hơ̆ tai.”
Hơ̆ jơnau đơ̆s Kơnràñ dê.
Nrĭ-nrềng: 24. 4-5a, 6-7bc, 8-9
Hw: Ală gùng-dà Kơnràñ dê gơ̆s bơta tơpă-tơpài mơ dờn-song lơm, ală cau lơi in prăp bơta tam bơrkoăt mơ ală jơnau-sồr Khai dê. Ơ Kơnràñ, dăn sơnđio añ in gĭt gùng-dà Đi dê, mơ bơto añ gĭt ală jơnau rơndăp Đi dê. Dăn pơlăm añ lòt hơ đăng gùng jơnau-ngăn Đi dê mơ bơto añ, bơh Đi gơ̆s Yàng, Bơtau Tơwài añ. Hw
Ơ Kơnràñ, dăn kah wơl nùs sơrmah-sơrmài mơ tơpă-tơpài Đi dê jơl rài rài. Ơ Kơnràñ, dăn kah añ jăt nùs tơpă-tơpài Đi dê, bơh nùs niăm-lơnhơn Đi dê, ơ Kơnràñ. Hw
Kơnràñ gơ̆s Bơtau niăm-lơnhơn mơ song-dơpă, bơh be hơ̆ Khai lăm cau tìs-glài mŭt gùng song. Kơnràñ tề-lăm cau pơndêt-să lòt tam jơnau song, mơ bơtê-bơto bol khai lòt tam gùng Khai dê. Hw
Bơta đăl bàr: 1 Pr 3. 18-22
Tŭ do tềl pơnđum krung tơngklàs oh mi ndrờm be hơ̆.
Đăl tam sră dùl Petro, cau Dờp-pơyoa bơtoăh dê.
Ơ oh mi kờñ-gơboh, Kơnràñ Kristo neh chơ̆t dùl dơ̆ tìs-glài he in, Khai gơ̆s Bơtau song-dơpă ala cau ờ song-dơpă in, làng pồ-pơdơng he Yàng in; ngăn lah Khai neh chơ̆t jăt poăc-să, mơya neh kơnờm bơhYàng Nhơm mơ kĭs wơl. Bal mơ Yàng Nhơm, Khai neh tŭs yăl-bơto ală nhơm-nùs kong jàm in, ală cau lài òr geh tŭ ờ pindờn in, tam tŭ nùs sơrmah-sơrmài Kơnràñ dê găm pơha tŭ Noe lơh ahò, kơnờm bơta hơ̆, geh dŭt cau, phàm nă lơm, geh klàs bơh dà-kŏ bŏ-lơ. Mơ tŭ do, tềl pơnđum krung tơngklàs oh mi ndrờm be hơ̆ sơl, bơh tềl hơ̆ ờ di mìng rào kloh55 să-jăn, mơ gen lah bơr răc-dăn Yàng pà dùl nùs-tồr song-ring, kơnờm dơ bơta kĭs wơl Kơnràñ Jesu Kristo dê, Bơtau nggui đah maYàng, tơnơ̆ mơ tŭ rê hơ trồ, neh kŭp bol huềng-duh, bol huềng gơnoăr, mơ ală mpồl pràn dờn-duh Khai.
Hơ̆ jơnau đơ̆s Kơnràñ dê.
Jơnau đăl lài Jơnau Yălniăm: Mt 4. 4b
Cau kĭs ờ di mìng bơh bañ lơm, mơya bơh ală jơnau bơh bơr Yàng yăl-tơlĭk. Jơnau Yălniăm: Mk 1. 12-15
Kơnràñ kong Satan tơlòng, mơ bol huềng-duh duh-broă Khai.
Đăl tam Jơnau Yălniăm niămgoh jăt Marko.
Tŭ hơ̆ mơ, Nhơm bơchồl Kơnràñ Jesu tŭs tam blàng bràs. Khai ơm tam blàng bràs poăn jơ̆t ngai mơ kong Satan tơlòng; Khai ơm bal mơ ală phan-jơi, mơ bol huềng-duh duh-broă Khai. Tơnơ̆ mơ tŭ Joan kong jàm, Kơnràñ Jesu tŭs tam Galilea, yăl-bơto Jơnau Yălniăm Yàng dê mơ đơ̆s: “Tơngai neh sir-tơl, mơ lơgăr Yàng neh tŭs rềp; bol mê ềng-màl tĕ mơ pindờn tĕ dơ Jơnau Yălniăm.”
Hơ̆ jơnau đơ̆s Kơnràñ dê.
