Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Jer 33. 14-16
Añ rơ̆p lơh gơ căt Đavit in dùl sơnoăn song-dơpă.
Đăl tam sră Jeremia, cau ala-bơr dê.
Do jơnau Kơnràñ đơ̆s: Neh tŭs ngai añ rơ̆p lơh gơ̆s jơnau yălniăm añ neh yăl-pơnrơ bơh hìu Israel mơ hìu Juđa. Tam ală ngai hơ̆ mơ tam tơngai hơ̆, Añ rơ̆p lơh gơ căt Đavit in dùl sơnoăn song-dơpă, Khai rơ̆p cahrơña mơ lơh jơnau song tam bòn-lơgăr. Tam ală ngai hơ̆, Juđa rơ̆p geh tơngklàs, Jerusalem rơ̆p kĭs ringlơngai. Mơ do gơ̆s sơnđăn cau rơ̆p hòi Khai “Yàng, bơtau song-dơpă hi dê”.
Hơ̆ jơnau đơ̆s Kơnràñ dê.
Nrĭ-nrềng: Nn 24. 14bc-5ab, 8-9, 10 mơ 11
Hw: Ơ Kơnràñ, dăn tơnwèt nùs añ tŭs hơ Đi.
Ơ Kơnràñ dăn sơnđio añ in gĭt gùng-dà Đi dê mơ bơto añ gĭt ală jơnau rơndăp Đi dê. Dăn pơlăm añ lòt hơ đăng gùng jơnau-ngăn Đi dê mơ bơto añ, bơh Đi gơ̆s Yàng, Bơtau Tơwài añ. Hw
Đi gơ̆s Bơtau niăm-lơnhơn mơ song-dơpă, bơh be hơ̆ Đi tề cau tìs-glài mŭt gùng ngăn. Đi pơlăm cau pơndêt-să lòt tam jơnau song, mơ bơto bol khi lòt tam gùng Đi dê. Hw
Jơh ală gùng-dà Đi dê lah tơpă-tơpài mơ niăm-song lơm, bol cau lơi in prăp bơr tam bơrkoăt jơnau-sồr Đi dê. Đi kĭs nđềt-mềr mơ bol cau lơi duh-ngòt Đi, mơ ràng-tơlĭk bol khai in gĭt bơta tam bơrkoăt Đi dê. Hw
Bơta đăl bàr: 1 Thess 3. 12 – 4. 2
Dăn Kơnràñ lơh nùs oh mi in gơ̆s tơ̆t-khin tŭ Kơnràñ Kristo tŭs.
Đăl tam sră dùl Paulo, cau Dờp-pơyoa bơtoăh, pơyoa bol Thessalonika in.
Ơ oh mi kờñ-gơboh, dăn Kơnràñ ai tai mơ pà oh mi in bềng-lìu nùs tam gơboh bal, mơ gơboh mơ ală cau be hi mơ oh mi, làng nùs oh mi geh kơ̆-nhăp hơ đăng gùng niămgoh, ờ gŏ geh chi lơi pal lah-pơrhơng hơ đăp măt Yàng gơ̆s bàp he, tam ngai Jesu Kristo Kơnràñ he mù-tŭs bal mơ jơh tơl ală cau niămgoh. Amen. Ơ oh mi kờñ gơboh, mơ tai, añ găm khoai dăn oh mi tam Kơnràñ Jesu bơta do lah, be oh mi geh hi bơto gĭt pal ơm-kĭs be lơi làng niăm nùs Kơnràñ, oh mi găm kĭs be hơ̆, dăn oh mi lòt guh pơnjăt tai. Bơh oh mi gĭt loh jơnau-sồr mơ hi bơh sơnđăn Kơnràñ Jesu neh pà oh mi in.
Hơ̆ jơnau đơ̆s Kơnràñ dê.
ALLELUIA: Nn 84.7
Alleluia,alleluia. Ơ Kơnràñ dăn sơnđio nùs tơpă-tơpài Đi dê hi in,mơ pà bơta tơngklàs hi in. Alleluia.
Jơnau Yălniăm: Lk 21. 25 -28, 34-36.
Bơta tơwài bol kòn dê tŭs rềp rau.
Đăl tam Jơnau Yălniăm niămgoh jăt Luka.
Tŭ hơ̆, Kơnràñ Jesu đơ̆s mơ bol jăt-dờn be do: Rơ̆p geh ală tềl tam măttơngai, àng-kơnhai, ală sơrmañ; mơ hơ đăng ù-tiah, ală làng-bol rơ̆p kơlôi-kơnòl tài bơh dà-lềng gơ pồt nggồr-nggàc, cau ơm ro-ñro tài bơh rơngòt mơ kơ̆p-gơn ală bơta rơ̆p tŭs tam plai ù, kơyoa ală pràn gơnoăr ală kơloàng trồ dê rơ̆p kong ơwăñ. Tŭ hơ̆, cau rơ̆p gŏ Kòn kòn-bơnŭs tŭs tam mhoal bal mơ gơnoăr mơ bơta gơklŏ dờng. Tŭ ală bơta hơ̆ sơntờm gơlĭk gơ̆s, gen bol kòn ntào tĕ song mơ pờ bồ, bơh bơta tơwài bol kòn dê tŭs rềp rau. Bol kòn sền ngăc tĕ, mbài nùs bol kòn gơ̆s kơnjơ̆ bơh bơta ñô-sa oă ir, bơta bơñul-lơmbè mơ ală bơta kơlôi-rơcăng rài do dê, mơ ngai hơ̆ nisơna tŭs hơ đăng bol kòn; kơyoa be jàl gơ tŭs hơ đăng jơh ală cau ơm hơ đăng làm jơh plai ù. Be hơ̆, bol kòn drơng-kơ̆p tĕ mơ răc dăn tam tơl tŭ, làng rơgơi klàs bơh jơh ală bơta rơ̆p tŭs hơ̆, mơ ơm ntào dơ đăp Kòn kòn-bơnŭs.
Hơ̆ jơnau đơ̆s Kơnràñ dê.
