Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Bar 5. 1-9
Kơnràñ rơ̆p sơnđio tơlĭk bơta gơklŏ Khai dê tam mê.
Đăl tam sră Baruk, cau ala-bơr dê.
Ơ Jerusalem, hồ tĕ ào jê-chơ̆t mơ moăt-yăn mê dê, soh tĕ bơta àng-gơcrà mơ gơklŏ rài rài Kơnràñ dê mơ Khai pà mê in. Khai rơ̆p bơnsoh mê in ào jơnausong, mơ tơndau sơgơn bơtau gơ̆s sùm hơ đăng bồ mê. Kơyoa, Kơnràñ rơ̆p sơnđio tơlĭk bơta gơklŏ Khai dê tam mê ală cau dunia in. Bơh Yàng rơ̆p rài rài hòi sơnđăn mê lah Ring-lơngai tam jơnau song, mơ bơnàng-bò tam đào-mềr. Ơ Jerusalem, guh bĭc tĕ, ntào hơ tiah jơnhoa, mơ rơmê sền đah Đăng. Sền tĕ oh kòn mê bơh đah Đăng tŭs đah Đơm tơrgùm wơl jăt jơnau-sồr Bơtau Niămgoh dê, bol khai rơhờn gŏ Kơnràñ kah bol khai. Bol khai kong bol sò-tơ̆m lăm lòt ngài bơh mê, mơya Kơnràñ neh cèng bol khai rê mê in tam bơta bơnàng-bò be ală cau kòn bơtau dê. Bơh Kơnràñ neh sồr tơnlề ală bơnơm jơnhoa mơ ală dòr bơh yau òr, bồr bềng ală tơrluh jrô, làng plai ù geh ring tre, làng Israel kơ̆ kơljăp cơnđuà lòt yăl pơnrơ bơta gơkŏ Yàng. jăt jơnau-sồr Kơnràñ dê, ală brê-dơr, ală chi geh bô bơkah neh ai Israel in ơm prŭ, bơh Kơnràñ rơ̆p rơhờn ai nùs tơpă-tơpài mơ song-ring Khai dê tề lăm Israel tŭs bơta àng gơklŏ.
Hơ̆ jơnau đơ̆s Kơnràñ dê.
Nrĭ-nrềng: 125. 1-2ab, 2cd-3, 4-5, 6
Hw: Kơnràñ neh pơha nùs mơ hi, gen hi chờhờp-chờchờr.
Tŭ kơnràñ cèng ală cau Sion kong kŭp rê wơl, hi gơ lơh be cau găm mpau, tŭ hơ̆ bơr hi ñŏ chờ, lơmpiăt hi tơlĭk ală săp hờnchờ. Hw
Tŭ hơ̆ làng-bol dunia tam đơ̆s bal bal be do: Kơnràñ neh pơha nùs mơ bol khai. Yàng neh pơha nùs mơ hi, gen hi chờhờp-chờchờr. Hw
Ơ Kơnràñ dăn tam gơl tĕ rài kĭs hi, be ală croh dà đah Jum. Cau lơi sĭh tam moăt-jrùng, rơ̆p tơwès tam hờnchờ. Hw
Cau lòt ndăng ñìm ndăng, tê cèng kòi lòt sĭh; Bol khai rê wơl tam hờnchờ, pơnì tui ală tơrnoăn kòi. Hw
Bơta đăl bàr: Pl 1. 4-6, 8-11
Oh mi ơm kĭs tĕ sàng-goh mơ ờ pal lah-pơrhơng jơl tŭs ngai Kơñràñ Kristo dê.
Đăl tam sră Paulo, cau Dờp-pơyoa bơtoăh, pơyoa bol Philip in.
Ơ oh mi kờñ-gơboh, añ sùm chờhờp pah dơ̆ răc-dăn oh mi in tơl jơh, bơh oh mi neh geh bơnah bal tam broă yăl-bơto Jơnau Yălniăm bơh ngai sơnrờp jơl tŭs ngai do. Añ pindờn lah Bơtau neh sơntờm broă niăm hơ̆ tam oh mi, krung rơ̆p pơnsir jơl tŭs ngai Kơnràñ Jesu Kristo dê. Kơyoa Yàng neh lơh cơng añ in be do: Añ gơboh mơ jơh ală oh mi bal mơ nhơm-nùs Kơnràñ Jesu Kristo dê. Bơta añ răc-dăn tŭ do lah nùs gơboh oh mi dê sơlơ ngai sơlơ tơngguh tam jơnau gŏ-gĭt mơ wă-wờng, làng oh mi đăl-gĭt ală bơta dờng-màng rơlau, làng oh mi geh sànggoh mơ ờ pal lah-pơrhơng jơl tŭs ngai Kơnràñ Kristo dê, oh mi geh Kơnràñ Jesu Kristo pà bềng-lìu cồng-nha song-dơpă, làng tơngklŏ mơ jờngrơ Yàng.
Hơ̆ jơnau đơ̆s Kơnràñ dê.
ALLELUIA: Lk 3. 4-6
Alleluia, alleluia. Rơcăng tĕ gùng Kơnràñ, bơsong tĕ ală gùng-dà Khai dê; mơ jơh tơl poăc-să rơ̆p gŏ bơta tơngklàs Yàng dê. Alleluia.
Jơnau Yălniăm: Lk 3. 1-6
Jơh tơl poăc-să rơpê gŏ bơta tơngklàs Yàng dê.
Đăl tam Jơnau Yălniăm niămgoh jăt Luka.
Sơnăm jơ̆t prăm rài bơtau Tiberio Sesare, Ponsio Pilato gơ̆s kuăng dờng Juđea, Herođe gơ̆s pô kơnhoàl Galilea, Philippe, oh khai dê, gơ̆s pô kơnhoàl Iturea mơ Trakonitiđe, Lysania gơ̆s pô kơnhoàl Abilina, Anna mơ Kaipha gơ̆s cau ăt-bồ lơh-yàng, geh jơnau Yàng dê đơ̆s mơ Joan, kòn Zakaria dê, tam blàng bràs. Khai tŭs tam jơh kơnhoàl gùt-dăr Jorđano, yăl-bơto bơta pơnđum sơnđio nùs ềng-màl, làng geh hồ ală jơnau tìs, be neh cĭh tam sră ală jơnau đơ̆s Isaia, cau ala-bơr dê: “Geh săp cau hòi-nggà tam blàng bràs: Rơcăng tĕ gùng Kơnràñ, bơsong tĕ ală gùng-dà Khai dê. Jơh tơl thòng rơ̆p geh tơmbềng, mơ jơh tơl dòr bơnơm rơ̆p geh tơmù; ală gùng kuĕt-rơkue rơ̆p gơjềng song-năng, mơ ală gùng lŭ-rơlun rơ̆p gơjềng ring-tre: mơ jơh tơl poăc-să rơ̆p gŏ bơta tơngklàs Yàng dê.”
Hơ̆ jơnau đơ̆s Kơnràñ dê.
