Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Broă 4. 32-35
Bol khai dùl nùs dùl tồr.
Đăl tam Sră Ală Broă Bol Dờp-pơyoa dê.
Tŭ hơ,ê jơh ală mpồl bol pindờn găl ngăn gơsê dùl nùs dùl tồr lơm. Ờ gơsê cau lơi kờp phan lơi he geh lah phan ĭs he dê, mơya ơn-kờp ală phan gơ̆s phan bal. Bol Dờp-pơyoa ngui bơta gơnăp-gơnoăr dờng-rơyŭ mơ lơh cơng broă Jesu Kristo, Kơnràñ he, kĭs wơl. Jơh tơl nă geh gơboh-gơbài lơm. Bơh be hơ,ê tam bol pindờn, ờ gŏ geh cau lơi kong rơbah. Bơh ală cau geh kuil-bŏ-lŏ-sre ngolah hìu đăm, gen tăc jơh, mơ geh nđờ priă, gen cèng ơn hơ đơm jơng bol Dờp-pơyoa dê. Mơ cau tam pà kờp nă cau in khăt gơ jăt bơta di ngui bol khai dê.
Hơ̆ jơnau đơ̆s Kơnràñ dê.
Nrĭ-nrềng: 117. 2-4, 16ab mơ 17-18, 22-24
Hw: Ưn-ngài tĕ Kơnràñ, bơh Khai pơha nùs, bơh bơta tơpă-tơpài Khai dê gơ̆s sùm.
Ơ hìu Israel, yăl-tơlĭk tĕ: bơta tơpă-tơpài Khai dê gơ̆s sùm. Ơ hìu Aaron, yăl-tơlĭk tĕ: bơta tơpă-tơpài Khai dê gơ̆s sùm. Ơ ală cau duh-ngòt Kơnràñ, yăl-tơlĭk tĕ: bơta tơpă-tơpài Khai dê gơ̆s sùm. Hw
Tê ma Kơnràñ neh lơh-lòt pràn-gơnoăr, tê ma Khai dê neh yờ-tơngguh añ. Añ ờ chơ̆t, mơya añ rơ̆p kĭs, mơ añ rơ̆p yăl-pơnrơ broă-lơh Khai dê. Kơnràñ bơto-tơmàl, Kơnràñ bơt-tơmàl añ, mơya Khai ờ jào añ huềng chơ̆t in. Hw
Pơnai lŭ mơ ală cau băc săng-lời, neh gơ gơ̆s pơnai lŭ mum tơrñăng. Broă hơ̆ neh bơh Kơnràñ lơh gơ̆s, broă hơ̆ krơi-sơrbơi dơ đăp măt he. Do gơ̆s ngai Kơnràñ neh bơtào gơ̆s, gen he chờhờp-chờchờr tĕ tam ngai hơ̆. Hw
Bơta đăl bàr: 1 Jn 5. 1-6
Ală chi lơi lĭk bơh Yàng, gen phalin dunia lơm.
Đăl tam sră dùl Joan, cau Dờp-pơyoa bơtoăh dê.
Ơ oh mi kờñ-gơboh, cau lơi pindờn Jesu gơ̆s Kristo, gen cau hơ̆ deh bơh Yàng, mơ cau lơi gơboh mơ Bơtau deh-dùh, gen krung gơboh mơ cau deh-dùh bơh Bơtau hơ̆. Jăt tềl do he đăl-gĭt lah he gơboh mơ oh kòn Yàng, lah tŭ he gơboh mơ Yàng mơ lơh jăt ală jơnau-sồr Khai dê. Kơyoa nùs gơboh mơ Yàng lah he dờn prăp jơnau-sồr Khai dê, mơ jơnau-sồr Khai dê ờ gŏ kơnjơ̆.
Bơh ală chi lơi lĭk bơh Yàng, gen phalin dunia lơm, mơ do lah bơta phalin dunia, lah tờm bơta pindờn he dê. Ñcau gơ̆s cau phalin dunia, di ờ di lah cau pindờn Kơnràñ Jesu gơ̆s kòn Yàng sơl ờ ? Bơtau neh tŭs bơh dà mơ mhàm, tờm gơ̆s Jesu Kristo, ờ di mìng tam dà lơm, mơya tam dà mơ tam mhàm tai, geh Yàng Nhơm lơh cơng Kơnràñ Kristo gơ̆s bơta ngăn.
Hơ̆ jơnau đơ̆s Kơnràñ dê.
ALLELUIA: Jn 20. 29
Alleluia, Alleluia. Ơ Toma, tài bơh kòn neh gŏ Añ, tàng kòn pindờn. Bơtoăh bol cau ờ gŏ mơ pindờn. Alleluia.
Jơnau Yălniăm: Jn 20. 19-31
Phàm ngai tơnơ̆, Kơnràñ Jesu tŭs.
Đăl tam Jơnau Yălniăm niămgoh jăt Joan.
Tam mho ngai hơ̆, ngai sơnrờp tam poh, tŭ ală mpồng tam tiah bol jăt-dờn ơm neh til bơh ngòt bol Juđe, gen Kơnràñ Jesu tŭs, ntào tam gùl mơ đơ̆s mơ bol khai: “Ring-lơngai bol kòn in!” Tŭ neh đơ̆s jơnau hơ̆, Kơnràñ sơnđio bol khai in tê mơ wĕ. Bol jăt-dờn chờhờp bơh gŏ Kơnràñ. Kơnràñ đơ̆s tai mơ bol khai: “Ring-lơngai bol kòn in! Be Bàp neh pơyoa Añ, gen Añ krung pơyoa bol kòn.” Mơ tŭ neh đơ̆s jơnau hơ̆, Khai khồm nhơm mơ đơ̆s mơ bol khai: “Bol kòn dờp tĕ Yàng Nhơm. Bol kòn hồ tìs ală cau lơi, gen gơ geh hồ ală cau hơ̆ in; bol kòn kơ̆t wơl tìs ală cau lơi, gen gơ kong kơ̆t wơl.” Mơya Toma, dùl nă tam bol Jơ̆t Bàr, hòi lah Đidymo, ờ ơm bal mơ bol khai tŭ Kơnràñ Jesu tŭs. Be hơ̆, bol jăt-dờn ndai đơ̆s mơ Khai: “Bol hi neh gŏ Kơnràñ!” Mơya khai đơ̆s mơ bol khai: “Dilah añ ờ gŏ tềl tơrnơ̆s tam tê Kơnràñ, ờ cŏk nau tê añ tam tềl tơrnơ̆s, mơ ờ ơn tê añ tam wĕ Khai, gen añ ờ pindờn.”
Phàm ngai tơnơ̆, bol jăt-dờn Kơnràñ dê ơm tai tềng hơ̆, geh Toma bal mơ bol khai. Ală mpồng găm til, Kơnràñ Jesu tŭs, ntào tam gùl mơ đơ̆s: “Ring-lơngai bol kòn in!” Lồc gen, Khai đơ̆s mơ Toma: “Tơmŭt tĕ nau tê mê tềng do mơ sền tĕ tê Añ, tơlĭk tĕ tê mê mơ ơn tĕ tam wĕ Añ, bañ kơldăng nùs tai, mơya pindờn tĕ!” Toma hơ wơl mơ đơ̆s mơ Kơnràñ: “Ơ Kơnràñ kòn dê mơ Yàng kòn dê!” Kơnràñ Jesu đơ̆s mơ khai: “Tài bơh kòn neh gŏ Añ, tàng kòn pindờn. Bơtoah bol cau ờ gŏ mơ pindờn!”
Kơnràñ Jesu krung neh lơh rà tềl krơi ndai dơ đăp măt bol jăt-dờn Khai dê, gơ ờ geh cĭh tam sră do; mơya ală jơnau neh geh cĭh, làng bol kòn pindờn Kơnràñ Jesu lah Bơtau Kristo, Kòn Yàng dê, mơ làng tŭ pindờn, bol kòn geh bơta kĭs bơh sơnđăn Khai.
Hơ̆ jơnau đơ̆s Kơnràñ dê.
