Ngai Yàng bàr kàl Dăr Năm C

Bơta đăl dùl: Is 62. 1-5

Bơklau rơ̆p chờhờp bơh bơùr.

Đăl tam sră Isaia, cau ala bơr dê.

Bơh Sion, añ rơ̆p ờ dơh bơr, mơ bơh Jerusalem, añ rơ̆p ờ ơm rơlô, jơl tŭs tŭ Bơtau song-dơpă tơnggŏ să be àng-sơrdah, Bơtau Tơngklàs Sion tŭs be cồng ồs sơmpòl àng-gơcrà. Ală làng-bol rơ̆p gŏ Khai lah Bơtau song-dơpă mê dê, mơ ală bơtau rơ̆p gŏ bơta gơklŏ Khai dê. Yàng tờm rơ̆p tơmoh mê in dùl sơnđăn pa. Mê rơ̆p gơ̆s sơgơn gơklŏ tam tê Kơnràñ, mơ sơgơn bơtau gơnoăr tam tê Yàng mê dê. Mê rơ̆p ờ găm hòi tai lah cau kong săng-lời, mơ ù mê rơ̆p ờ găm hòi tai lah anih bơlơu. Mê rơ̆p geh hòi lah “cau Añ boh-bài”, mơ ù mê rơ̆p geh hòi lah ù geh làngbol ơm, bơh mê niăm nùs Yàng. Cau pơnu rơ̆p ơm bal mơ cau aruh, mơ oh kòn mê rơ̆p ơm tam Khai. Bơklau rơ̆p chờhờp bơh bơùr, Yàng mê rơ̆p chờhờp bơh mê.

Hơ̆ jơnau đơ̆s Kơnràñ dê.

 

Nrĭ-nrềng: 95 1-2a, 2b-3, 7-8a, 9-10a mơ 10c

Hw: Yăl-pơnrơ tĕ ală broă krơi-sơrbơi Kơnràñ dê tam gùl ală làng-bol.

Jờngrơ tĕ Kơnràñ mơ dùl jơnau đơ̆scrĭh pa, ơ jơh trồ tiah, jờngrơ tĕ Kơnràñ, jờngrơ tĕ Kơnràñ, tơngklŏ sơnđăn niămgoh Khai dê. Hw

Ngai pah ngai, yăl-pơnrơ tĕ bơta tơngklàs Khai dê, yăl-pơnrơ tĕ bơta gơklŏ Khai tam gùl ală lơgăr, mơ ală broă gơnrơh Khai dê tam gùl ală làng-bol. Hw

Pơdơng dơ Kơnràñ, ơ ală bòn-lơgăr, Pơdơng dơ Kơnràñ gơnoăr mơ gơklŏ, pơdơng dơ Kơnràñ bơta gơklŏ di pal mơ sơnđăn Khai. Hw

Duh-khoai tĕ Kơnràñ niămgoh rơyŭ-rơyùm, jơh mơ plai ù, rơm ngòt tĕ dơ đăp măt niămgoh. Đơ̆s tĕ mơ ală làng-bol: Kơnràñ gơ̆s Bơtau ơm-ăt, Khai căhrơña ală lơgăr jăt gùng song-ring. Hw

 

Bơta đăl bàr: 1 Kr 12. 4-11

Bal mơ dùl Yàng Nhơm pà bơta niăm ĭs dơ tơl nă cau, khăt gơ jăt be Khai rơndăp-ơn.

Đăl tam sră dùl Paulo, cau Dờp-pơyoa bơtoah, pơyoa bol Korinto in.

Ơ oh mi kờñ-gơboh, geh ală bơta hàng-goh krơi-ĭs bal, mơya găm dùl Yàng Nhơm; geh rà gơnoăr-broă krơi-ĭs bal, mơya tờm gơ̆s dùl Kơnràñ; mơ geh ală bơta lơh-lòt krơi-ĭs bal, mơya tờm gơ̆s dùl Yàng, Khai lơh gơ̆s tơl bơta tam tơl nă cau. Bơta Yàng Nhơm pà tơl nă in tơl gùng ĭs, làng lơh gơlĭk kwơ bal. Cau bà geh Yàng Nhơm ai bơr ngăc-ngăr, cau bà tai geh bơr jăk-chài, jăt dùl bal Yàng Nhơm; cau ndai bà geh bơta pindờn, tam dùl bal Yàng Nhơm; cau ndai tai geh bơta tơmbời kòp, tam krung dùl Yàng Nhơm hơ̆; cau bà geh bơta niăm lơh tềl gơnrơh, cau bà geh bơta niăm đơ̆s ala-bơr, cau ndai bà geh bơta niăm cah ĭs ală nhơm-nùs; cau bà geh bơta niăm đơ̆s rà dà đơ̆s; cau ndai tai geh bơta niăm yălmblàng ală dà đơ̆s. Mơya bal mìng dùl Yàng Nhơm lơm lơh gơ̆s jơh ală bơta hơ̆. Khai tam pà bơta niăm ĭs tơl nă cau in jăt be Khai rơndăp-ơn.

Hơ̆ jơnau đơ̆s Kơnràñ dê.

 

ALLELUIA: Lk 19. 38

Alleluia. Alleluia. Yălniăm Bơtau tŭs bơh sơnđăn Kơnràñ! Ring-lơngai tam trồ, mơ gơklŏ tam ală kơloàng trồ! Alleluia.

Jơnau Yălniăm: Jo 2. 1-11

Kơnràñ Jesu neh lơh tềl sơnrờp do tam Kana, kơnhoàl Galilea.

Đăl tam Jơnau Yălniăm niămgoh jăt Joan.

Tŭ hơ̆, geh bơta ñô-bau tam Kana, kơnhoàl Galilea, mơ geh mè Kơnràñ Jesu tềng hơ̆; Kơnràñ Jesu mơ bol jăt-dờn Khai dê krung geh cau jà tŭs ñô-bau. Tŭ ờ tơl tơrnờm, mè Kơnràñ Jesu đơ̆s mơ Khai: “Cau ờ geh tơrnờm tai.” Kơnràñ Jesu đơ̆s mơ mè: “Ơ mò, ñchi jơnau mơ Añ, mơ ai taih ? Jiờ Añ ờ hềt tŭs.” Mè Khai đơ̆s mơ ală cau dong-broă: “Chi lơi lơi Khai đơ̆s mơ bol mê, gen lơh tĕ.” Tềng hơ̆ geh ơn prau nơm drăp lŭ làng ngui tam bơta ờs-mờng tơngkloh bol Jude dê, kờp nơm ơn bàr pe yăng dà. Kơnràñ Jesu đơ̆s mơ bol khai: “Tuh tĕ dà bềng ală drăp!” Bol khai tuh bềng tŭs dơ bơr. Mơ Kơnràñ Jesu đơ̆s mơ bol khai: “Tŭ do, bơ̆ tĕ cèng cau sền năc in!” Bol khai bơ̆ cèng. Tŭ cau sền năc tiăm dà neh gơ̆s tơrnờm mơ ờ gĭt mbơh lơi, mơya ală cau dong-broă neh bơ̆ dà gen gĭt, gen cau sền năc hòi cau bơrtơu mơ đơ̆s: “Cau lơi krung yờ tơrnờm bơkah lài, tŭ cau neh khum òng rau gen yờ tơrnờm dimơ, ai mê prăp tơrnờm bơkah jơl tŭs tŭ do.” Kơnràñ Jesu neh lơh tềl sơnrờp do tam Kana, kơnhoàl Galilea, sơnđio-tơlĭk bơta gơklŏ Khai dê, mơ bol jăt-dờn Khai dê neh pindờn dơ Khai.

Hơ̆ jơnau đơ̆s Kơnràñ dê.