Ngai Yàng bàr jơ̆t prau kàl Dăr Năm B

Bơta đăl dùl: Km 11. 25-29

Ñchi gơlơh mơ mê tam oàn dong añ taih ? Wờl-kờñ jơh mơ làng-bol geh đơ̆s ala-bơr.

Đăl tam sră Khà Măt Làng-bol.

Tam ală ngai hơ̆, Kơnràñ mù tŭs tam tŭp mhoăl, emơ đơ̆s mơ Moise, dùl dơ̆ lĕ ai nhơm-nùs tam Moise làng tam pà poh jơ̆t nă kuăng-kra in. Tŭ Huềng-yàng ơm hơ đăng bol khai bol khai đơ̆s mơ ala-bơr, mơ jơl hìngnau bol khai ờ roh jơnau niăm hơ̆. Gen, geh bàr nă ơm wơl tam mpồl sàl, dùl nă sơnđăn lah Elđat, mơ cau ne sơnđăn lah Međat. Huềng-yàng neh ơm hơ đăng bàr nă: Bơh bàr nă geh cĭh măt tam sră, mơya ờ tŭs ơm tam hìu-biài. Tŭ bàr nă đơ̆s ala-bơr tam mpồl sàl, gen geh dùl nă kơnòm dêt ntoăt tŭs yăl Moise in be do: Elđat mơ Međat găm đơ̆s ala-bơr tam mpồl sàl. Gen mơ, Josue, kòn ồng Nun dê, cau jăt-gròng Moise dê, mơ lah cau geh rơwăh tam mpồl găl cau, đơ̆s be do: Ơ ồng Moise, dăn kơryăn tĕ bol khai. Moise hơ wơl be do: Ñchi gơlơh mơ mê tam oàn dong añ taih ? Wờl-kờñ jơh mơ làng-bol geh đơ̆s ala-bơr, mơ Kơnràñ pà Huềng-nhơm Khai dê bol khai in.

Hơ̆ jơnau đơ̆s Kơnràñ dê.

 

Nrĭ-nrềng: 18B. 8, 10, 12-13, 14

Hw: Jơnau-sồr Kơnràñ song-dơpă, tơnchờ nùs-nhơm.

Gùng Kơnràñ dê niăm wil-tơl, tơmpràn nùs-nhơm. Jơnau-sồr Kơnràñ dê kơ̆ sùm, tơnroh bơta bơrngơl. Hw

Nùs duh-ngòt Kơnràñ niăm ngăn, găm sùm ală rài. Jơnau yăl-sồr Kơnràñ dê ngăn-ngồn, song-dơpă tơl jơh. Hw

Bŭlah cau duh-broă Kơnràñ wèt-nùs hơ ală gùng hơ̆, mơ jơh nùs dờn-prăp nền-nờn, mơya geh rà jơnau tìs gùng, ñcau mơ gĭt ? Dăn rào añ kloh ală tìs bìr ờ đăl-gŏ. Hw

 Dăn kơryăn cau duh-broă Kơnràñ bơh nùs pơnhừ, bañ lời nùs hơ̆ lơh pô tam să añ. Tŭ hơ̆ añ rơ̆p geh sàng-goh ờ tềl bơ̆, klàs bơh bơta tìs dờng. Hw

 

Bơta đăl bàr: Jk 5. 1-6

Phan-bơna bolmê dê kong ồm-lề.

Đăl tam sră Jakobe, cau Dờp-pơyoa bơtoăh dê.

Ndo, ơ ală cau păs-gơ̆s bol mê ñìm-nggà hòi-dăn tĕ, tài bơh ală bơta bơrniăng rơ̆p tơđùh hơ đăng bol mê. Phan-bơna bol mê dê kong ồm-lề, ồi ào bol mê dê neh kong mŏ-miăn sa rau. Piă-màh bol mê dê neh kong è-kăng sa, mơ è- kăng hơ̆ rơ̆p gơ̆ cơng tàng yăl-yă bol mê, mơ rơ̆p sa poăc bol mê be ồs chu. Bol mê neh prăp-tềm bol mê in bơta hào-gơjrañ tam ngai lồi-dŭt. Ndo, jền tơngai cau tơwès bol mê in mơ bol mê neh pìt-ờm, priă hơ̆ găm tơnggà, mơ săp tơnggà cau tơwès dê neh mpong tŭs dơ tồr Kơnràñ ală mpồl pràn. Bol mê neh ñô sa bơñullơmbè tam rài do, nùs bol mê neh dờp-hờm bơta chờ-bơnàr tam ngai tơnchơ̆t. Bol mê neh yăl-glài mơ tơnchơ̆t cau song-dơpă, bơh bol khai neh ờ dră wơl bol mê.

Hơ̆ jơnau đơ̆s Kơnràñ dê.

 

ALLELUIA: Jn 15. 15b

Alleluia. Alleluia. Kơnràñ đơ̆s: Añ neh hòi bol kòn lah cau bơyô, bơh jơh ală bơta Añ neh kơno bơh Bàp Añ, gen Añ neh ai bol kòn in gĭt. Alleluia.

Jơnau Yălniăm: Mk 9. 38-43, 45, 47-48

Cau lơi ờ tam dră mơ bol he, gen lah đah bol he. Dilah tê kòn lơh kòn in gơtŭp tìs, gen koh tĕ gơ.

Đăl tam Jơnau Yălniăm niămgoh jăt Marko.

Tŭ hơ̆, Joan đơ̆s mơ Kơnràñ Jesu be do: “Ơ Pôgru, bol kòn neh gŏ cau ai sơnđăn Đi bơtrơh cà, mơ bol kòn neh kơryăn khai, bơh khai ờ jăt bol he.” Kơnràñ Jesu đơ̆s: “Bañ kơryăn khai. Kơyoa ờ geh cau lơi ai sơnđăn Añ lơh broă pràngơnoăr mơ rơgơi đơ̆s iơ̆h Añ in; kơyoa cau lơi ờ tam dră mơ bol he, gen lah đah bol he. Kơyoa cau lơi ai bol kòn in hùc dùl bơngàn dà bơh sơnđăn lah bol kòn gơrê mơ Kơnràñ Kristo, ngăn, Añ đơs mơ bol kòn: Cau hơ̆ rơpê ờ roh phan-jờng  khai dê. Cau lơi lơh gơ tŭp tìs dùl nă in tam ală kơnòm dêt găm pindờn dơ Añ do, gen niăm rơlau cau hơ̆ in lah, khai kong wăn mơ mpăl lŭ dờng dơ ngko mơ kong cơm tam dà-lềng. Dilah tê kòn lơh kòn in gơ tŭp tìs, gen koh tĕ gơ: niăm kòn in, lŭt tê mơ mŭt tam bơta kĭs, rơlau mơ geh bàr nơm tê mơ mŭt tam brah-tìng, tam ồs ờ rồc-lồi. Dilah jơng kòn lơh kòn in gơ tŭp tìs, gen koh tĕ gơ: niăm kòn in, lŭt jơng mơ mŭt tam bơta kĭs, rơlau mơ geh bàr nơm jơng mơ kong cơm tam brah-tìng. Dilah măt kòn lơh kòn in gơ tŭp tìs, gen kơluĕ tĕ gơ: niăm kòn in, lè măt mơ mŭt tam lơgăr Yàng, rơlau mơ geh bàr đah măt mơ kong cơm tam brah-tìng, tềng hơ,ê kĭhrơhài gơ dê ờ chơtê, mơ ồs ờ rồc-lồi.”

Hơ̆ jơnau đơs Kơràñ dê.