Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 35. 4-7a
Tồr cau tĭ rơ̆p pờ wơl, mơ cau kloăt rơ̆p đơ̆s wơl.
Đăl tam sră Isaia, cau ala-bơr dê.
Bol mê đơ̆s tĕ mơ ală nùs-nhơm ờ sŭk: Chăm-cha tĕ, bañ ngòt! Ndo, Yàng bol mê tŭs làng săl-tê. Khai tờm rơ̆p tŭs mơ tơngklàs bol mê. Tŭ hơ̆ măt cau jơngo rơ̆p àng wơl, mơ tồr cau tĭ rơ̆p pờ wơl. Tŭ hơ̆ cau kuĕt-kơlte rơ̆p sơnđoh-ñchừn be jùn, mơ cau kloăt rơ̆p đơ̆s wơl. Kơyoa dà rơ̆p hòr tam blàng bràs, mơ croh dà rơ̆p hòr tam brê ngềt-ngơ̆t. Ù rañ-rơsơ̆h rơ̆p gơjềng wơl dà tơnao, mơ ù srau rơ̆p gơjềng croh dà.
Hơ̆ jơnau đơ̆s Kơnràñ dê.
Nrĭ-nrềng: 145. 6b-7a, 7b-8, 9-10
Hw: Bơtoah bol cau nùs rơbah-rơbừp, bơh lơgăr trồ gơrê mơ bol khai.
Kơnràñ gơ̆s Bơtau prăp nùs dờn-song jơl ală rài. Khai căhrơña song-dơpă cau kong rồn-bơklơn in, pà phan sa cau jơgloh in. Hw
Kơnràñ tơngklàs bol cau kong jàm, pờ măt cau jơngo in. Kơnràñ ai cau kồl bŭt in ntào song, gơboh mơ bol cau song-dơpă. Hw
Kơnràñ dong-kờl bol cau năc krơi, đơng-dong cau ùr bàng kòn đời, mơya lơh tơrlah kồ-kai bol iơ̆h-bơsăk. Kơnràñ ăt-prăp gơnoăr bơtau jơl ală rài, ơ Sion, Yàng mê dê ơm-ăt jơl ală rài. Hw
Bơta đăl bàr: Jk 2. 1-5
Ờ di Yàng neh săc-rơwăh cau rơbah làng dờn-dờp lơgăr Khai dê sơl ờ ?
Đăl tam sră Jakobe, cau Dờp-pơyoa bơtoăh dê.
Ơ oh mi kờñ-gơboh, oh mi gơ̆s cau pindờn dơ Jesu Kristo gơklŏ, Kơnràñ he, oh mi bañ sền màng ĭs. Di be tam tŭ oh mi pơrjum bal, geh cau mŭt, tê dò sơmbiăt màh, să soh ào bơteh; mơ krung geh tai cau rơbah mŭt, ồi-ào bơ̆-bơl, dilah oh mi sền trong dơ cau soh ào niăm-bơnĕ mơ đơ̆s: Dăn jà đi nggui dơ anih bơnàng-bò do. Găm mơ cau rơbah, gen oh mi đơ̆s wơl: Găm mê, mê ntào hơ gen, ngolah: Mê nggui tĕ hơ đơm kơrnờl jơng añ. Be hơ̆, ờ di lah oh mi neh sền màng ĭs tam gùl oh mi, mơ gơjềng bol rơña bềng iơ̆h nùs sơl ờ ? Ơ oh mi kờñ- gơboh, dăn iăt tĕ: Ờ di Yàng neh săc-rơwăh cau rơbah dơ đăp măt dunia, làng kơnờm bơta pindờn, bol khai gơjềng păs-gơ̆s, mơ geh dờn-dờp lơgăr Khai neh hơ bol cau gơboh mơ Khai in sơl lah ờ ?
Hơ̆ jơnau đơ̆s Kơnràñ dê.
ALLELUIA: Mt 4. 23
Alleluia. Alleluia. Kơnràñ Jesu yăl-pơnrơ Jơnau Yălniăm lơgăr trồ, mơ tơmbời jơh bơta kòp-tê jê-să mơ jơh bơta lơbơn-lơñơ tam làng-bol. Alleluia.
Jơnau Yălniăm: Mk 7. 31-37
Khai lơh ală cau tĭ kơno mơ ală cau kloăt đơ̆s.
Đăl tam Jơnau Yălniăm niămgoh jăt Marko.
Tŭ hơ̆, Kơnràñ lời tai kơnhoàl Tyro, lòt găt Siđon, tŭs hơ dà-lềng Galileia, mŭt tam kơnhoàl Đekapoli. Cau cèng tŭs Kơnràñ in dùl nă cau tĭ mơ kloăt, mơ dăn Kơnràñ ơn tê hơ đăng khai. Tơlĭk ĭs khai bơh mpồl làng-bol, Kơnràñ ơn ală nau tê Kơnràñ dê tam trồm tồr khai, mơ ai dà diau lĭp dơ mpiăt khai, mơ tơngờ hơ trồ, Kơnràñ rơnđơh mơ đơ̆s mơ khai: “Effetha”, hơ̆ lah: “Pờ tĕ.” Tŭ hơ̆ mơ, tồr khai geh pờ, mơ che kơ̆t mpiăt khai geh hồ, mơ khai đơ̆s loh-làng. Kơnràñ sồr bol khai bañ yăl mơ cau lơi; mơya Kơnràñ sơlơ sồr bol khai, bol khai sơlơ yăl-pơnrơ oă rơlau tai. Bol khai ai lơh krơi rơlau gơrềng bơh Kơnràñ mơ đơ̆s: “Khai neh lơh niăm jơh ală bơta, Khai lơh ală cau tĭ kơno mơ ală cau kloăt đơ̆s!”
Hơ̆ jơnau đơ̆s Kơnràñ dê.
