Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ngăc-ngăr 2. 12, 17-20
He yăl-glài tĕ làng khai in chơ̆t bàssìl.
Đăl tam sră Ngăc-ngăr.
(Bol cau iơ̆h-bơsăk đơ̆s be do:) He rơwàng tĕ kŭp cau song-dơpă, bơh khai ờ lơh kuơ-kuài chi lơi he in, mơ găm tam dră mơ broă he lơh, lah-pơrhơng he tìs gùng mơ yăl-yă he ờ gùng ờ dà. Gen he rơmê sền tĕ jơnau khai đơ̆s gơ̆s ngăn lah ờ, sơwì tĕ sền ală chi lơi rơ̆p gơlĭk tŭs khai in, mơ kơ̆p-càng tĕ sền lồi dŭt rài kĭs khai dê rơ̆p gơlĭk be lơi. Kơyoa, dilah khai ngăn lah kòn Yàng, Yàng rơ̆p dong-tò khai, rơ̆p tơngklàs khai bơh tê bol cau tam dră mơ khai. He tơmbàs mơ tơnyăn tĕ khai, làng lòng sền khai niăm-lơnhơn mơ ơ̆t-ơl sơl lah ờ. He yăl-glài tĕ làng khai in chơ̆t bàssìl, bơh jăt bơr khai đơ̆s, gen cau rơ̆p klàs khai!. Bol khai kơlôi be hơ̆, mơya bol khai tìs, bơh tìs iơ̆h bol khai dê neh lơh bol khai in bồmjơngo. Mơ bol khai ờ gĭt rơndăp-nùs ndơ̆p-ndơr Yàng dê, gen krung ờ kơnờm dờp phan-jờng song-dơpă, mơ krung ờ boh-bài bơta bơnàng-bò bol nhơm-nùs niămgoh dê.
Hơ̆ jơnau đơ̆s Kơnràñ dê.
Nrĭ-nrềng: 53. 3-4, 5, 6 mơ 8
Hw: Kơnràñ găm đơng-dong nhơm-nùs añ.
Ơ Yàng, dăn klàs añ bơh sơnđăn Đi, dăn tơngui gơnoăr căhrơña añ in. Ơ Yàng, dăn iăt săp añ răc-dăn, dăn sơrkềng tồr iăt bơr añ hòi-dong. Hw
Bơh bol pơnhừ brồ ntào tam dră, mơ bol jàñ-bơsăk jòi tơnchơ̆t añ, bol khai ờ kăh Yàng ơm dơ đăp măt he. Hw
Ne, Yàng dong-kờl añ, Khai găm đơng-dong nhơm-nùs añ. Bơh nùs, añ pồ-pơdơng phan lơh-yàng hơ Khai, ơ Kơnràñ, añ rơ̆p yălniăm sơnđăn Đi, bơh sơnđăn Đi niăm-sir. Hw
Bơta đăl bàr: Jk 3. 16 – 4. 3
Plai bơkào song-dơpă dê geh sĭh tam bơta ring-lơngai dơ ală cau pơnring-lơngai.
Đăl tam sră Jakobe, cau Dờp-pơyoa bơtoăh dê.
Ơ oh mi kờñ gơboh, tềng lơi geh bơta tam boăh tam ềng, tềng hơ̆ geh bơta sơlŭ-sơlă mơ tơl bơta mờng-iơ̆h. Mơya bơta ngăc-ngăr mù bơh trồ, gen lài jơh lah sàng-goh, ring-ròm, pơha-nùs, bơnĕ-bơnài, niăm-nđàc, bềng nùs niăm-lơnhơn mơ plai bơkào niămgoh, ờ sơwì sền-màng ĭs, ờ blơ̆-blăc. Plai bơkào song-dơpă dê geh sĭh tam bơta ring-lơngai dơ ală cau pơnring-lơngai. Bơh lơi mơ oh mi tam boăh-gơjrañ mơ tam lah tam ring taih ? Hơ̆ ờ di lah tài bơh bơta ngir-ngờñ găm tam lơh tam să-jăn oh mi sơl lah ờ ? Oh mi hàm-kờñ mơ ờ geh dờn-dờp, gen oh mi tam tơnchơ̆t bal. Oh mi tam boăh tam ềng mơ ờ geh hừh nùs, gen oh mi tam lah tam ring. Oh mi ờ geh, lah tài bơh oh mi ờ dăn. Oh mi dăn mơ ờ geh dờn-dờp, lah tài bơh oh mi dăn ờ di, mìng kơ̆p-kơnờm tơnhờm ală bơta ngir-ngờñ oh mi dê lơm.
Hơ̆ jơnau đơ̆s Kơnràñ dê.
ALLELUIA: Jn 8. 12
Alleluia. Alleluia. Kơnràñ đơ̆s: Añ lah bơta àng dunia dê; cau lơi jăt Añ, rơ̆p geh àng bơta kĭs dê. Alleluia.
Jơnau Yălniăm: Mk 9. 30-37
Kòn kòn-bơnŭs rơ̆p kong jào tam tê cau. Cau lơi kờñ gơ̆s cau lài jơh, gen rơ̆p gơ̆s cau lồi-dŭt jơh ală cau dê.
Đăl tam Jơnau Yălniăm niămgoh jăt Marko.
Tŭ hơ̆, Kơnràñ Jesu mơ bol jăt-dờn lĭk bơh tềng hơ̆, lòt găn Galilea; mơ Kơnràñ ờ kờñ cau lơi in gĭt. Bơh Kơnràñ bơto bol jăt-dờn Khai dê mơ đơ̆s mơ bol khai: “Kòn kòn-bơnŭs rơ̆p kong jào tam tê cau, mơ bol khai rơ̆p gơsơ̆t Khai, mơ lồc kong chơ̆t pe ngai, Khai rơ̆p kĭs wơl.” Bol jăt-dờn ờ wă jơnau hơ̆, mơ bol khai ngòt ờ khĭn lùp Kơnràñ. Kơnràñ mơ bol jăt-dờn tŭs tam Kapharnaum. Tŭ neh ơm tam hìu, Kơnràñ lùp bol khai: “Tam gùng, ñchi bol kòn tam pơndăng taih ?” Bol khai ơm ngềt. Kơyoa tam gùng, bol khai neh tam pơndăng ñcau dờng rơlau. Kơnràñ nggui, hòi bol Jơ̆t Bàr mơ đơ̆s mơ bol khai: “Dilah cau lơi kờñ gơ̆s cau lài jơh, gen rơ̆p gơ̆s cau lồi-dŭt jơh ală cau dê, mơ gơ̆s cau duh-broă jơh ală cau dê.” Kơnràñ ai dùl nă kơnòm dêt, ơn khai tam gùl bol jăt-dờn, kơnđu khai mơ đơ̆s mơ bol khai: “Cau lơi wă-rò dùl nă tam ală kơnòm dêt be do bơh sơnđăn Añ, hơ̆ lah wă-rò Añ, mơ cau lơi wă-rò Añ, gen ờ di lah wă-rò Añ, mơya lah wă-rò Bơtau neh pơyoa Añ.”
Hơ̆ jơnau đơ̆s Kơnràñ dê.
