Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 50. 5-9a
Añ neh ai ngkời cau in pù.
Đăl tam sră Isaia, cau ala-bơr dê.
Yàng neh pờ tồr añ, mơ añ ờ kơndăng, mơ krung ờ rŭc wơl. Añ neh ai ngkời cau in pù, neh ai tơrmồ cau in duĭ tơnò tềp, añ neh ờ pồn muh-măt, pleh ală bơr ñŏ-bơrsèl mơ ală cau chŏh-tơnhiăl. Bơh Kơnràñ đơng-dong añ, gen añ ờ bàssìl; gen añ dol muh dol măt kră be lŭ, añ gĭt añ rơ̆p ờ kong bàssìl. Bơtau căhrơña añ ờ tìs ơm rềp mơ añ, ñcau găm rơgơi pơndăng mơ añ wơl; bol hi lĭk hơ sơbàn, cau lơi lah cau sò-tơ̆m añ dê, tŭs tĕ ndo! Ndo, Kơnràñ gơ̆s Yàng dong-tò añ, ñcau khĭn kŭp-glài añ taih ?
Hơ̆ jơnau đơ̆s Kơnràñ dê.
Nrĭ-nrềng: 114. 1-2, 3-4, 5-6, 8-9
Hw: Añ rơ̆p cơnđoà lòt hơ đăp măt Kơnràñ tam tiah cau kĭs dê.
Añ gơboh mơ Kơnràñ, bơh Khai neh iăt săp añ khoai-dăn, bơh Kơnràñ neh sơrkềng tồr iăt bơr añ, tam ngai añ hòi-dăn Khai. Hw
Che-wăc huềng chơ̆t dê neh rơwàng añ wơl, mơ sơnyoăl làng-bồc neh tơnjơm hơ đăng să añ, añ neh dùh tam bơta moăt-kơnòl kòl-yăn. Mơ añ neh hòi-dăn sơnđăn Kơnràñ: Ơ Kơnràñ, dăn klàs să kĭs añ. Hw
Kơnràñ song-dơpă mơ niăm-lơnhơn, mơ Yàng hi dê tơpă-tơpài ngăn. Kơnràñ prăp-gàr bol cau lơmư-lơmừn, añ jê-yăn mơ Khai neh tơngklàs añ. Hw
Bơh Khai neh klàs añ bơh huềng chơ̆t, làng măt añ ờ hòr dà mơ jơng añ ờ gơplơ̆-gơplừ. Añ rơ̆p cơnđoà lòt hơ đăp măt Kơnràñ tam tiah cau kĭs dê. Hw
Bơta đăl bàr: Jk 2. 14-18
Bơta pindờn ờ geh broă lơh, gen lah bơta pindờn chơ̆t.
Đăl tam sră Jakobe, cau Dờp-pơyoa bơtoăh dê.
Ơ oh mi kờñ-gơboh, dilah cau lơi yăl să he geh bơta pindờn, mơ ờ lơh-lòt jăt bơta pindờn, gen ñchi kuơ taih ? Bơta pindờn be hơ̆ rơgơi klàs khai wơl sơl ờ ? Dilah geh oh mi ruh-lŏ lơi ờ geh piăng sào ào soh, mơ geh cau tam oh mi sồr wơl khai be do: Wờl oh mi in lòt ring-lơngai, sa hờm soh răm, mơ ờ ai khai in wơl ală chi lơi păl ngui să-jăn in, gen ñchi kuơ taih ? Gơrềng bơh bơta pindờn krung be hơ̆ sơl, dilah ờ geh broă lơh, lah bơta pindờn chơ̆t bơh tờm riăs. Mơya geh cau rơ̆p đơ̆s: Mê, mê geh bơta pindờn; găm añ, añ geh broă lơh. Mê sơnđio tĕ añ in gŏ bơta pindờn ờ broă lơh mê dê, mơ añ rơ̆p ai broă lơh mơ sơnđio mê in gŏ bơta pindờn añ dê.
Hơ̆ jơnau đơ̆s Kơnràñ dê.
ALLELUIA: Jn 14. 5
Alleluia. Alleluia. Kơnràñ đơ̆s: Añ lah gùng, bơta ngăn mơ bơta kĭs; ờ geh cau lơi tŭs mơ Bàp, di lah ờ găn Añ. Alleluia.
Jơnau Yălniăm: Mk 8. 27-35
Đi lah Kristo. Kòn kòn-bơnŭs păl kong oă bơta jê-yăn.
Đăl tam Jơnau Yălniăm niămgoh jăt Marko.
Tŭ hơ̆, Kơnràñ Jesu mơ bol jăt-dờn Khai dê lòt tŭs tam ală bòn Sesare Philippe dê; mơ tam gùng Kơnràñ lùp bol jăt-dờn Khai dê mơ đơ̆s mơ bol khai: “Cau đơ̆s Añ lah ñcau taih ?” Bol khai hơ wơl mơ Kơnràñ mơ đơ̆s: “Joan Baptista, cau bà đơ̆s lah Elia, cau bà tai đơ̆s lah dùl nă tam bol ala-bơr.” Kơnràñ lùp bol khai: “Ai bol kòn đơ̆s Añ lah ñcau taih ?” Hơ wơl, Petro đơ̆s mơ Kơnràñ: “ Đi lah Kristo.” Kơnràñ đơ̆s kràñ-cê mơ bol khai bañ yăl cau lơi in gơrềng bơh Khai. Kơnràñ sơntờm bơto bol khai: “Kòn kòn-bơnŭs păl kong oă bơta, kong bol kuăng kra, bol lơh-yàng dờn g, bol gơnoăr-cĭh săng-sơrbì, kong gơsơtê , mơ tơnơ̆ mơ pe ngai kĭs wơl”; Kơnràñ đơ̆s loh-làng jơnau hơ̆ Petro hoài Kơnràñ tŭs hơ khai mơ sơntờm lah-pơrhơng Kơnràñ. Kơnràñ wơlke, gŏ bol jăt-dờn Khai dê, mơ đơ̆s kràñ-cê mơ Petro: “Rŭc tĕ tơnơ̆ Añ, ơ Satan, tài bơh mê ờ kơlôi ală bơta Yàng dê, mơya ală bơta kòn-bơnŭs dê lơm.” Kơnràñ hòi mpồl làng-bol bal mơ bol jăt-dờn Khai dê tŭs, mơ đơs mơ bol khai: “Dilah cau lơi kờñ jăt Añ, gen păl săng-lời să tờm, tui chikal he dê mơ jăt Añ. Kơyoa cau lơi kờñ tơngklàs bơta kĭs he dê, gen rơ̆p roh gơ; ai cau lơi kong roh bơta kĭs he dê tài bơh Añ mơ Jơnau Yălniăm, gen rơ̆p tơngklàs gơ.”
Hơ̆ jơnau đơ̆s Kơnràñ dê.
