Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Pơnđĭk 9. 1-6
Bol mê sa tĕ bañ añ dê, mơ ñô tĕ tơrnờm añ neh bơrlŭ bol mê in.
Đăl tam sră Pơnđĭk-pơnđing.
Bơta ngăc-ngăr neh băc hìu he mơ bơtào poh nơm jrŏng, neh gơsơ̆t ală jơi kĭs, bơrlŭ tơrnờm, yờ cơnờng sào, mơ sồr bol dĭ ùr guh ală tiah jơnhoa tam bòn mơ yăl-tơnggĭt be do: Cau lơi bơnĕ-bơnài, tŭs tĕ mơ añ. Mơ yăl mơ bol cau bơrngơl-gơla be do: Bol mê tŭs tĕ sa bañ añ dê, mơ ñô tơrnờm añ neh bơrlŭ bol mê in. Bol mê săng-lời tĕ bơta bơrngơl-gơla, gen rơ̆p geh kĭs, mơ cơnđoà lòt tĕ jăt gùng-dà ngăc-ngăr.
Hơ̆ jơnau đơ̆s Kơnràñ dê.
Nrĭ-nrềng: 33. 2-3, 10-11, 12-13, 14-15
Hw: Oh mi lòng lơyăp mơ sền tĕ, làng gĭt Kơnràñ niăm gĭt-nđờ.
Añ yălniăm Kơnràñ tam tơl tŭ, bơr añ ờ dơh jờngrơ Khai. Tam Kơnràñ sồp-soàn añ yòm măt, cau rơbah iăt tĕ mơ chờhờp tĕ. Hw
Bol niămgoh Kơnràñ dê, duh-ngòt tĕ Khai. Bơh cau duh-ngòt Kơnràñ ờ pah-pơ̆t chi lơi. Bol păs-gơ̆s neh gơ dùh tam bơta rơbah-jơgloh, mơya cau jòi Kơnràñ ờ siơ̆u-siăr chi lơi niăm. Hw
Ơ oh kòn, tŭs tĕ ndo, iăt tĕ añ, añ rơ̆p bơto bol kòn in duh-ngòt Kơnràñ. Ñcau gơ̆s cau sền màng gùng rài, kờñ kĭs jŏ làng dờn-dờp rà bơta bơtoăh. Hw
Prăp tĕ lơmpiăt bañ đơ̆s jơnau iơ̆h, mơ cềm bơr mbài yăl-tơlĭk jơnau blăc-pơrlồm. Kơlôi pleh tĕ bơta iơ̆h mơ lơh jơnau niăm, jòi-sơwì tĕ mơ ting jăt bơta ring-lơngai. Hw
Bơta đăl bàr: Ep 5. 15-20
Oh mi ơm kĭs tĕ ngăc-ngăr jăt nùs niămgoh Kơnràñ dê.
Đăl tam sră Paulo, cau Dờp-pơyoa bơtoăh, pơyoa bol Epheso in.
Ơ oh mi kờñ-gơboh, oh mi sơwì tĕ, mbe di ơm kĭs nền-cê, bañ be bol cau bơrngơl-gơla, mơya be bol cau ngăc-ngăr; gĭt tơngui tŭ tơngai, bơh tŭ tơngai do klăm-jơngo. Bơh be hơ̆ oh mi bañ ơm kĭs ờ rơcăng, mơya gĭt-wă tĕ mbe lơi lah nùs niămgoh Yàng dê. Oh mi bañ bơñul-lơmbè, bơh tơrnờm gơlĭk bơta dri-tơlàr, mơya wă-dờp tĕ lìu-làc bơta Yàng Nhơm, bal bal đơ̆scrĭh ală jơnau nrĭ niămgoh, ală jơnau ari-arơ mơ ală jơnau đơ̆s mềr-đào mơ jơh nùs yălniăm Kơnràñ. Ưn-ngài tĕ sùm Yàng gơ̆s Bàp tam tơl tŭ mơ tơl bơta, bơh sơnđăn Jesu Kristo, Kơnràñ he.
Hơ̆ jơnau đơ̆s Kơnràñ dê.
ALLELUIA: Jn14. 23
Alleluia. Alleluia. Kơnràñ đơ̆s: Dilah cau lơi gơboh mơ Añ gen rơ̆p prăp jơnau Añ dê, mơ Bàp Añ rơ̆p gơboh mơ khai, mơ Bol Añ rơ̆p tŭs mơ khai, mơ Bol Añ rơ̆p ơm tam khai. Alleluia.
Jơnau Yălniăm: Jn 6. 51-58
Poăc Añ ngăn lah phan sa, mơ mhàm Añ ngăn lah phan hùc.
Đăl tam Jơnau Yălniăm niămgoh jăt Joan.
Tŭ hơ̆, Kơnràñ jesu đơ̆s mơ làng-bol Juđe be do: “Añ lah bañ kĭs sùm, neh mù bơh trồ. Dilah cau lơi sa bañ do, gen rơ̆p kĭs rài rài; mơ bañ Añ rơ̆p ai, lah poăc Añ bơh bơta kĭs dunia dê in.”. Be hơ̆, bol Juđe tam pơndăng ndring gơ̆p mơ đơ̆s: “Mbe lơh cau do rơgơi ai he in poăc Khai làng sa taih ?” Be hơ̆, Kơnràñ Jesu đơ̆s mơ bol khai: “Di ngăn, di ngăn, Añ đơ̆s mơ bol mê: Dilah bol mê ờ sa poăc Kòn kòn-bơnŭs mơ ờ hùc mhàm Khai, gen bol mê ờ geh bơta kĭs tam să tờm bol mê. Cau lơi sa poăc Añ mơ hùc mhàm Añ, gen geh bơta kĭs rài rài; mơ Añ rơ̆p ai khai in kĭs wơl tam ngai lồi-dŭt. Bơh poăc Añ ngăn lah phan sa, mơ mhàm Añ ngăn lah phan hùc. Cau lơi sa poăc Añ mơ hùc mhàm Añ, gen ơm tam Añ, mơ Añ tam khai. Be Bàp kĭs sùm neh pơyoa Añ, mơ Añ kĭs bơh Bàp; gen cau lơi sa Añ, krung rơ̆p kĭs bơh Añ. Do lah bañ mù bơh trồ, ờ di be ồng-pàng neh sa mơ neh chơ̆t; cau lơi sa bañ do, gen rơ̆p kĭs rài rài.”
Hơ̆ jơnau đơ̆s Kơnràñ dê.
