Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Js 24. 1-2a, 15-17, 18b
Hi rơ̆p duh-khoai Kơnràñ, bơh Khai tờm gơ̆s Yàng hi dê.
Đăl tam sră Josue.
Tam ală ngai hơ̆, Josue tơrgùm wơl jơh tơl ală jơi-nòi tam Sikem, lồc gen hòi ală kuăng kra, ală cau ăt-bồ jơi-bơtiàn, ală cau căhrơña, ală cau ăt-bồ ling tŭs, mơ bol khai ntào hơ đăp măt Yàng. Josue đơ̆s mơ mơ jơh làng-bol be do: Dilah bol mê ờ bài duh-khoai Yàng, gen ai bol mê in săc-rơwăh: Ngai do, bol mê khăt nùs tĕ rơwăh di duh-khoai cau lơi rơlau: Ngolah ală huềng pàng yau bol mê neh duh-khoai tam Mesopotamia, ngolah ală huềng cau bòn Amore dê, tiah bol mê găm ơm kĭs. Ai añ mơ hìu-bơnhă añ, hi rơ̆p duh-khoai Kơnràñ. Làng-bol hơ wơl be do: Ờ rơgơi geh jơnau hi săng Kơnràñ mơ duh-khoai ală huềng bơdìh. Kơnràñ gơ̆s Yàng hi,Khai tờm neh lăm hi mơ pàng yau hi lĭk bơh lơgăr Ejypto, bơh hìu dĭ-gơna. Khai neh lơh ală broă krơi-sơrbơi dờng-rơyŭ dơ đăp măt hi, mơ neh prăp-gàr hi tam jơh ală gùng hi neh lòt, tam gùl ală làng-bol mơ hi neh lòt găn. Kơnràñ neh tă-tơlĭk jơh ală làng-bol hơ̆ krung be cau Amore, hơ đăng bơnah ù hi neh lòt mŭt.
Hơ̆ jơnau đơ̆s Kơnràñ dê.
Nrĭ-nrềng: 33. 2-3, 17-16,18-19, 20-21, 22-23
Hw: Oh mi lòng lơyăp mơ sền tĕ, làng gĭt Kơnràñ niăm gĭt-nđờ
Añ yălniăm Yàng tam tơl tŭ, bơr añ sùm ờ dơh jờngrơ Khai. Tam Yàng sồp-sòn añ yòm măt, cau rơbah iăt tĕ mơ chờhờp tĕ. Hw
Yàng wèt măt sền cau niăm-đào, mơ tồr Khai iăt săp bol khai dăn. Yàng lĭk măt tam dră mơ cau lơh iơ̆h, làng jùt-tơnroh tềl-pơnời bol khai tam dunia. Hw
Cau niăm-đào hòi-dăn mơ Kơnràñ iăt bơr bol khai, Khai klàs bol khai bơh tơl bơta kơlôi-kơnòl. Yàng ơm rềp mơ bol cau moăt-jrùng, mơ tơmbời ală nhơm-nùs jê-yăn bơcăh-lề. Hw
Cau niăm-đào tìp rà bơta cŭ-cua, mơya Yàng sùm tơngklàs. Khai prăp-gàr bol khai ntìng-ntau sir-tơl, ờ lời dùl nơm lơi kong pă. Hw
Bơta iơ̆h-bơsăk rơ̆p tơnchơ̆t cau iơ̆h-bơsăk, cau ềng mơ cau niăm păl bơh nùs tờm săl-tìs. Yàng tơmbời sồp-soàn cau duh-broă Khai dê, mơ cau lơi jòi tŭs sơnđìng dơ Khai, cau hơ̆ rơ̆p ờ di rơmăl wơl tìs-glài. Hw
Bơta đăl bàr: Ep 5. 21-32
Bơta ndơ̆p-ndơr do dờng-rơyŭ ngăn: tam Kơnràñ Kristo mơ tam Pơrjum-niăm.
Đăl tam sră Paulo, cau Dờp-pơyoa bơtoăh, pơyoa bol Epheso in.
Ơ oh mi kờñ-gơboh, oh mi tam dờn-duh tĕ bal tam bơta duh-ngòt Kơnràñ Kristo. Cau bau ùr dờn duh tĕ bau klau he, be bal mơ Kơnràñ: Kơyoa cau bau klau lah bồ cau bau ùr, be Kơnràñ Kristo lah bồ Pơrjum-niăm. Khai tờm gơ̆s Bơtau tơwài să-jăn he. Mơya be Pơrjum-niăm dờn-duh Kơnràñ Kristo be lơi, gen cau bau ùr krung dờn-duh cau bau klau he tam ală bơta be hơ̆ sơl. Ơ bol cau lah bau klau, gơboh tĕ mơ bau ùr he, be Kơnràñ Kristo gơboh mơ Pơrjum-niăm, mơ jào să bơh Pơrjum-niăm, làng pơniăm-goh Pơrjum-niăm, tŭ Khai ngui dà mơ bơr kĭs sùm rào goh Pơrjum-niăm, làng ràng-tơlĭk he in dùl Pơrjum-niăm gơklŏ, ờ tềl bơ̆, ờ gơ̆s krồn, ngolah di chi lơi ndai ndrờm be hơ̆, mơya niămgoh mơ sàng-kloh. Krung be hơ̆, cau bau klau păl gơboh mơ cau bau ùr he be să tờm he. Cau lơi gơboh mơ bau ùr he, lah gơboh mơ să tờm. Kơyoa ờ tŭ lơi geh cau lơi ềng mơ să-jăn he, mơya siăm-ròng mơ kơnđơ̆t-kơnđu gơ, be Kơnràñ Kristo bal mơ Pơrjum-niăm: Bơh he lah jơng tê să-jăn Khai dê, bơh ntìng poăc Khai dê. Bơh be hơ̆, cau săng-lời me bàp he mơ pơnđồp mơ bau ùr he: Mơ jơh bàr gơjềng dùl să-jăn. Bơta ndơ̆p-ndơr do dờng-rơyŭ ngăn, añ kờñ đơ̆s gơrềng bơh Kơnràñ Kristo mơ Pơrjum-niăm.
Hơ̆ jơnau đơ̆s Kơnràñ dê.
ALLELUIA: Jn 10. 27
Alleluia. Alleluia. Kơnràñ đơ̆s: Belàt Añ dê iăt jơnau Añ, Añ gĭt bol gơ, mơ bol gơ jăt Añ. Alleluia.
Jơnau Yălniăm: Jn 6. 54a, 60-69
Bol kòn rơ̆p tŭs mơ ñcau taih? Đi geh ală jơnau đơ̆s bơta kĭs rài rài dê.
Đăl tam Jơnau Yălniăm niămgoh jăt Joan.
Tŭ hơ̆, tam hìu-pơrjum Kapharnaum, Kơnràñ Jesu neh yăl-tơlĭk: “Cau lơi sa poăc Añ mơ hùc mhàm Añ, gen geh bơta kĭs rài rài.” Kơno be hơ̆, rà cau tam bol jăt-dờn Khai dê đơ̆s: “Jơnau do gơ kăl tồr! Ñcau rơgơi iăt Khai ?” Mơya Kơnràñ Jesu gĭt dơ să tờm Khai lah bol jăt-dờn Khai dê kơmrào bơh jơnau hơ̆, Khai đơ̆s mơ bol khai: “Jơnau hơ̆ lơh gơ tŭp tìs bol kòn ơ ? Be hơ̆, dilah bol kòn gŏ Kòn kòn-bơnŭs guh hơ anih Khai neh ơm lài, gen mbe lơh ? Nhơm lah bơta tơngkĭs, poăc-să ờ kuơ chi lơi; ală jơnau Añ neh đơ̆s mơ bol kòn lah Nhơm mơ lah bơta kĭs. Mơya tam bol kòn geh bol ờ pindờn.” Kơyoa bơh sơnrờp, Kơnràñ Jesu neh gĭt bol lơi ờ pindờn, mơ cau lơi rơ̆p jào Khai. Mơ Khai đơ̆s: “Bơh hơ̆, Añ neh đơ̆s mơ bol mê: Ờ geh cau lơi rơgơi tŭs mơ Añ, dilah bơta hơ̆ ờ geh pà khai in bơh Bàp.” Bơh tŭ hơ̆, rà cau tam bol jăt-dờn Kơnràñ dê rŭc wơl, ờ lòt bal mơ Khai tai. Be hơ̆, Kơnràñ Jesu đơ̆s mơ bol Jơ̆t Bàr: “Bol kòn krung kờñ rŭc sơl ờ ?” Simon Petro hơ wơl mơ Kơnràñ: “Ơ Kơnràñ, bol kòn rơ̆p tŭs mơ ñcau taih ? Đi geh ală jơnau đơ̆s bơta kĭs rài rài dê; mơ bol kòn neh pindờn mơ neh gĭt Đi lah Bơtau niămgoh Yàng dê.”
Hơ̆ jơnau đơ̆s Kơnràñ dê.
