Ngai Yàng 3 Kàl Kis Wơl

Jơnau Yălniăm: Jn 2. 13-25

Bol mê lơh tơrlah tĕ hìu duh-khoai do, mơ tam pe ngai Añ rơ̆p bơtào wơl gơ.

Đăl tam Jơnau Yălniăm niămgoh jăt Joan.

Mờr tŭs lèh Lòt Găn bol Juđe dê, Kơnràñ Jesu guh hơ Jerusalem. Khai gŏ tam hìu duh-khoai bol tăc kơnrồ, belàt, ntờp, mơ bol gơl priă găm nggui; Khai ai che lơh gai, bơtrơh jơh ală cau bơh hìu duh-khoai bal mơ belàt, Kơnrồ, lơh prihprah priă-jền bol gơl priă mơ tơlơ cơnờng; Khai đơ̆s mơ bol tăc ntờp: “Cèng-tơlĭk tĕ ală phan do bơh ndo! Bañ lơh hìu Bàp Añ gơ̆s hìu tăc phan.” Bol jăt-dờn Khai dê kah wơl lah neh geh cĭh: “Bơta duh-hur hìu Yàng in sa siăr añ.” Gen bol Juđe hơ wơl mơ đơ̆s mơ Khai: “Tềl lơi Ồng sơnđio bol hi in mơ lơh be hơ̆ ?” Kơnràñ Jesu hơ wơl mơ đơ̆s mơ bol khai: “Bol mê lơh tơrlah tĕ hìu duhkhoai do, mơ tam pe ngai Añ rơ̆p bơtào wơl gơ.” Gen bol Juđe đơ̆s: “Hìu duhkhoai do neh geh băc tam poăn jơ̆t prau sơnăm, mơ Ồng rơ̆p bơtào wơl gơ tam pe ngai ơ ?” Mơya Kơnràñ đơ̆s gơrềng bơh hìu duh-khoai lah să-jăn Khai. Gen tàng, tŭ Kơnràñ kĭs wơl bơh bol cau chơ̆t, bol jăt-dờn Khai dê kah wơl lah Khai neh đơ̆s jơnau hơ̆, mơ bol khai pindờn dơ Sră Goh mơ dơ jơnau Kơnràñ Jesu neh đơ̆s. Tam tŭ Kơnràñ ơm tam Jerusalem, tam ngai lèh Lòt Găn, geh gal cau pindờn dơ sơnđăn Khai, bơh gŏ ală tềl Khai dê mơ Khai neh lơh. Mơya să tờm Kơnràñ Jesu ờ pindờn bol khai, tài bơh Khai gĭt jơh ală cau, mơ Khai ờ càng cau lơi lơh cơng gơrềng bơh kòn-bơnŭs, kơyoa să tờm Khai gĭt geh chi lơi tam kòn-bơnŭs.

Hơ̆ jơnau đơ̆s Kơnràñ dê.

Jơnau Blàng Sră Goh: Bàp Vincente K’Brèp

 

NGAI YÀNG 3 KÀL KIS WƠL

Niam să ồng mò, kồñ  wa mơ gơp să oh mi.

Kòn Cau he pơndĭk: Jơh tăc che sơ̆ ggùl wah. Jơh tăc che săh ggùl gùng. Jơh pă ngkơr sùng ggùl lòng, ndrờm be bàr nă cau jăt dờn rê tam bòn Emmaus ngai do. Mơya Yàng Jesu neh sơnđàc tơlĭk măt làng bol jăt dờn in kơ̆ nùs pin dờn tơ Yàng. Bơh neh sền gŏ mơ măt, ăt mơ tê Yàng Jesu neh kis wơl, gen tàng bol khai khin gơs cau lơh cơng cau ndăi in.

Ngăn be hơ̆, tam sră Bol Dờp Pơyoa, ồng Pier lah cau neh yal pơnrơ làng bol ơm tam Jerusalem in jơnau ngăn ngồn. Do ờ di bơh bơta jăk chài is khai dê, mơya khai đơs jơnau ngăn ngồn. Bơh khai yal pơnrơ lah dùl nă cau neh ơm kis bal, sào sa bal mơ bol khai. Mơ tai, hơ̆ lah cau bol kuang ăt bồ hìu Pơrjum neh ngui tê cau bơrdih, làng pơng mơ chơ̆t tơ chi kal. Cau hơ̆ lah Yàng Jessu. Bol ơm tam Jerusalem cau lơi krung git lơm, mơya bol khai ờ git Yàng Jesu neh kis wơl, mìng bol jăt dờn lơm git bơh Yàng neh tơlik bol khai in gŏ. Dùl bơta dờng màng rơlau lah Yàng kis wơl ờ di rê jòi nau be cau jòi dồs, mơ ya Khai pà bơta ring lơngai. Be bol jăt dờn neh dờp bơta ring lơngai bơh Yàng Jesu kis wơl be lơi, bol khai krung tam pà bơta ring lơngai hơ̆ jơh gơ̆p să oh mi ndai in tai.

Mìng dùl nă Yàng Jesu neh kis wơl mơ lah bơtau tơng klàs ờ di mìng bol jăt dờn lơm, mơya jơh tơl nă cau in be Joan neh cĭh tam sră 1Jo. Be bol jăt dờn neh nđal git Yàng Jesu tŭ bol khai dờp ƀan. Gen jơh tơl nă bol he, ngai do, pal kis be lơi làng cau ờ hềt git Yàng sền gŏ rài kis bol he, bol khai nđal git Yàng Jesu gam kis tơ ggùl bol he. Pĕt ƀan lah chi lơi? Hơ̆ lah tềl kơndrơh Să Mhàm Niam Goh. Tŭ bol he wèt nus mềr gơboh mơ kŭt Yàng ơm dơmăng, triang lòt lơh Yàng, wă rò Să Niam Goh, lah tŭ  bol he sơnđio cau in git Yàng găm ơm dơ gùl bol he. Pĕt ƀan lah chi lơi? Hơ̆ lah rài kis phi sắ bol he dê.  Ùr lău git phi să bơ̆t bơntào hìu bơnhă bal. Me bàp phi să oh kòn in. Ơm mơ cau tam  ƀòn lơgar git tampà rài kis song dơpă. Git ñô pà bơkah, git lah pà jơnau. Git ai phan cau jêgloh in sa, cau sèt ào in soh, git dong kờl tơ̆p să cau chơ̆t jê. Kis bê hơ̆ lah he lơh cơng Yàng Jesu găm tơ ggùl bol he.

Dăn mơ Yàng pà bơta ring lơngai Yàng dê bol kòn in, mơ ai bol kòn in git kis mơ cèng bơta ring lơngai hơ̆ cau ndai in tai.