Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Jo 10, 31- 42
Đăl tam Jơnau Yălniăm niămgoh jăt Joan
31 Bol Jude ai tai lŭ làng to Kơnràñ. 32 Kơnràñ Jesu hơ wơl mơ bol khai: ‘‘Añ neh sơnđio bol mê in rà broă niăm bơh Bàp; bơh broă lơi tam ală broă hơ̆ mơ bol mê to lŭ Añ taih ?” 33 Bol Jude hơ wơl mơ Kơnràñ: ‘‘Bol hi ờ to lŭ Đi bơh broă niăm, mơya bơh jơnau tràl-sơrbil, mơ tài bơh Đi lah kòn-bơnus mơ lơh să tờm Đi lah Yàng.” * 34 Kơnràñ Jesu hơ wơl mơ bol khai: ‘‘Neh ờ geh cih tam gùng boh-lăm bol mê dê ơ: ‘‘Añ neh đơs: Bol mê lah yàng”? 35 Dilah gùng boh-lăm hòi ală cau geh jơnau đơs Yàng dê lah ală yàng, mơ Sră Goh ờ rơgơi kong lơh roh, 36 gen mơ cau Bàp neh pơniăm-goh mơ pơyoa tus tam dunia, bol mê đơs: ‘‘Mê đơs tràl-sơrbil !”, tài bơh Añ neh đơs: Añ lah Kòn Yàng dê ? 37 Dilah Añ ờ lơh ală broă Bàp Añ dê, gen bol mê bañ pindờn Añ; 38 mơya dilah Añ lơh, mơ dilah bol mê ờ kờñ pindờn Añ, gen pindờn tĕ ală broă, làng bol mê git mơ wă lah Bàp ơm tam Añ mơ Añ ơm tam Bàp.” 39 Be hơ̆, bol khai jòi kup Kơnràñ; mơya Kơnràñ lik klàs bơh tê bol khai.
Kơnràñ Jesu lòt tai hơ đah ne Jordano
40 Kơnràñ lòt tai hơ đah ne Jordano, tus dơ tiah Joan neh lơh bơta pơnđum dơ̆ sơnrờp, mơ Kơnràñ ơm wơl tềng hơ̆. 41 Gal cau tus hơ Kơnràñ mơ đơs: ‘‘Joan neh ờ lơh tềl krơi lơi; mơya jơh ală bơta Joan neh đơs gơrềng bơh cau do lah di ngăn.” 42 Tềng hơ̆, gal cau neh pindờn dơ Kơnràñ.
Hơ̆ jơnau đơ̆s Kơnràñ dê.
