Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Mt 9, 27-31
Đăl tam Jơnau Yălniăm niămgoh jăt Mattheo.
Kơnràñ Jesu tơmbời bàr nă cau jơngo măt
* 27 Tam tŭ Kơnràñ Jesu lik-lòt bơh tềng hơ̆, gen geh bàr nă cau jơngo măt jăt Khai hòi-nggà mơ đơs: ‘‘Khoai ơ kòn Davit dê, dăn sơnđàc bol hi !” 28 Tŭ Kơnràñ tus tam hìu, gen bol cau jơngo măt tus mơ Khai, mơ Kơnràñ Jesu đơs mơ bol khai: ‘‘Bol mê pindờn Añ rơgơi lơh bơta hơ̆ sơl ờ ?” Bol khai đơs: ‘‘Ơi, ơ Kơnràñ.” 29 Tŭ hơ̆, Kơnràñ bư dơ măt bol khai mơ đơs: ‘‘Jăt be nùs pindờn bol mê dê, gen gơlik gơs bol mê in.” 30 Mơ măt bol khai neh gơpờ. Mơya Kơnràñ Jesu đơs kràñ-cê mơ bol khai: ‘‘Sền ngăc tĕ, bañ ai cau lơi in git.” 31 Mơya bol khai lik-lòt, yal-pơnrơ Kơnràñ làm jơh tiah hơ̆.
Hơ̆ jơnau đơ̆s Kơnràñ dê.
