Ngai Prau tam Poh Niămgoh

Bơta đăl dùl: Is 52. 13 – 53. 12

Khai neh kong tềl sồt bơh tìs-glài he dê.

Đăl tam sră Isaia, cau ala-bơr dê.

Do cau duh-broă Añ rơ̆p geh dờng-rơyŭ, rơ̆p geh yờ-tơngguh gơklŏ, màng dờng gĭt-nđờ. Krung be gal cau neh ai lơh krơi bơh gŏ khai ñăp-ñòp, roh jơh să- bồ bơnŭs, muh-măt khai krung ờ găm be ờs tai, krung be hơ̆ sơl, ală làng-bol rơ̆p nrơ̆t nùs, ală bơtau ờ găm gĭt đơ̆s chi lơi dơ đăp măt khai. Bơh bol khai rơ̆p gŏ broă ờ hềt geh cau yăl he in, rơ̆p gĭt jơnau he ờ hềt geh kơno. Ñcau mơ rơgơi pin wơl jơnau bol he kơno taih ? Mơ Kơnràñ neh sơnđiotơlĭk bơta pràn cau lơi in taih ? Khai rơ̆p dờng gơ̆s dơ đăp măt Khai be dùl cồng bơnung, be dùl rơyăs chi, bơh ù rañ-rơsơh. Khai ờ gơ̆s tai rùp-rài, krung ờ găm să hàng làng he sền rơmê tai, ờ găm să-bồ bơdìh tai, làng he gơboh-gơbài; kong cau dunia sền ờ-sơ̆p be cau ờ diă ờ diơng rơlau jơh, be cau jê-yăn rơlau jơh, be cau kòp-jê, be dùl nă cau kong lềt măt mơ kong sền ờ-sơ̆p, bơh be hơ̆, he ờ kờp khai tai. Ngăn lah khai neh cèng wơl bơta lơbơn-lơñơ he dê, khai neh tui wơl bơta jê-yăn he dê, mơ he kờp khai be cau sồt-dun wơl, kong Yàng lơh glài mơ tơmbàs. Mơya Khai neh kong jê sồt bơh tìsglài he dê, kong lề-trĕk bơh bơta iơ̆hbơsăk he dê. Khai dờp wơl bơta glài làng he in geh ring-lơngai, mơ bơh tềl sồt Khai dê mơ he geh tơmbời. Jơh ală he gơprah-gơpring be belàt, dùl nă dùl gùng ĭs. Kơnràñ neh rơndăp hơ đăng khai tìs iơ̆h jơh ală he dê. Bơh nùs, khai pồ- pơdơng să tờm, mơ ờ pờ bơr be belàt kong cèng gơsơ̆t, mơ be belàt kòn dơ đăp măt cau siăt tơrnò, khai ơm momŏ ờ pờ bơr. Bơh bơta rồn-bơklơn mơ kŭp-glài, khai neh kong tơnroh. Ñcau rơ̆p găm kah jơi-nòi khai taih ? Kơyoa bơh khai neh kong bơtrơh-tơlĭk bơh ù cau kĭs; bơh tìs-glài làng bol Añ, Añ lơh glài khai. Cau mong tơnơn bơtô bồc khai tam gùl bol cau iơ̆h-bơsăk, mơya tŭ chơ̆t, khai geh tơ̆p tam gùl cau păs-gơ̆s, bŭlah khai neh ờ lơh chi lơi ờ song-dơpă, mơ bơr khai ờ đơ̆s jơnau blơ̆-blăc. Kơnràñ neh kờñ lơh ơniai khai tam jê-yăn. Dilah khai pơdơng să gơ̆s phan lơh-yàng săl tìs, khai rơ̆p gŏ dùl jơi-nòi gơ̆s sùm, mơ kơnờm bơh khai, nùs kờñ Kơnràñ dê rơ̆p lơh-gơ̆s. Bơh bơta kơlôi-kơnòl khai dê, khai rơ̆p gŏ mơ rơ̆p geh hừh-hơh. Bơh bơta gĭt-wă, cau duh-broă songdơpă Añ dê rơ̆p pơnsong-dơpă gal cau, rơ̆p tui wơlală tìs iơ̆h bol khai dê. Bơh be hơ̆ Añ tơn jào rà làng bol khai in, khai rơ̆p tam pà phan geh bơh tam lơh mơ cau pràn-kơldăng. Bơh khai neh pơdơng să kong chơ̆t mơ neh kong kờp tam sèng jơi cau lơh tìs, khai neh tui wơl tìs rà cau dê, mơ neh kờl răc ală cau lơh tìs in.

Hơ̆ jơnau đơ̆s Kơnràñ dê.

 

Nrĭ-nrềng: 30. 2 mơ 6, 12-13, 15-16, 17 mơ 25

Hw: Ơ Bàp, kòn jào sồp-soàn kòn tam tê Bàp.

Ơ Kơnràñ, kòn ràn tŭs sơnđìng dơ Đi, dăn bañ lời kòn kong bàs jơl sùm, bơh bơta song-ring Đi dê, dăn tơngklàs kòn. Kòn jào sồp-soàn kòn tam tê Đi, ơ Kơnràñ, ơ Yàng dờn-song, dăn tơngklàs kòn. Hw

Kòn gơjềng gơ̆s bơta bàssìl-bilbơl bol sò-tơ̆m in, gơjềng bơta ñŏ-bơrsèl cau ơm gùt-dăr in, mơ bơta ngòt-rơngơ̆t cau mờng gĭt in, bàn añ tam gùng, bol khai pleh-ngài añ. Añ kong cau huĭ, ờ kah tai, gơlơh be neh chơ̆t, añ neh gơjềng gơ̆s be gri neh bơcah lề. Hw

Ai kòn, ơ Kơnràñ, kòn pin-kơnờm dơ Đi, kòn nggà hòi: Đi gơ̆s Yàng kòn dê. Să kĭs kòn ơm tam tê Đi, dăn tơngklàs kòn bơh tê bol sò-tơ̆m mơ bol kŭp-koăn. Hw

Dăn ai cau duh-broă Đi dê in geh gŏ muh-măt niăm-lơnhơn, dăn tơngkĭs kòn jăt nùs sơrmah-sơrmài Đi dê. Nùs oh mi tơ̆t-khin pràn-kơldăng tĕ, jơh ală oh mi gơ̆s cau kơnờm dơ Kơnràñ. Hw

 

Bơta đăl bàr: Juđea 4. 14-16; 5. 7-9

Khai neh bơsrăm dờn-duh, mơ neh gơjềng kồ tơngklàs rài rài jơh ală cau dờn-duh Khai in.

Đăl tam sră Paulo, cau Dờp-pơyoa bơtoăh, pơyoa bol Juđea in.

Ơ oh mi kờñ-gơboh, he geh dùl nă cau lơh-yàng dờng rơyŭ-rơyùm, neh lòt găn ală tăp trồ, gơ̆s Kơnràñ Jesu, Kòn Yàng dê, gen he prăp kơ̆ tĕ broă yăl-tơlĭk bơta pindờn he dê. Kơyoa, ờ di he geh cau lơh-yàng dờng ờ rơgơi gĭt-wă bơta lơbơn-lơñơ he dê, sơlơ̆u wơl, Khai neh ờs kong tơlòng bơh tơl gùng be he, mìng ờ tìs.

Tŭ găm ơm kĭs tam dunia do, Kơnràñ Kristo neh lơ̆s săp mơ gơ hòr dà măt pơdơng bơr khoai-dăn răc-ròc dơ Bơtau rơgơ klàs he bơh chơ̆t, mơ bơh nùs duhadăt, Khai neh geh dờp bơr. Bŭlah gơ̆s Kòn Yàng, Khai neh bơsrăm dờn-duh bơh ală bơta jê-yăn Khai kong, mơ tŭ bơsir, Khai neh gơjềng kồ tơngklàs rài rài jơh ală cau dờn-duh Khai in.

Hơ̆ jơnau đơ̆s Kơnràñ dê.

 

Jơnau đăl lài Jơnau Yălniăm: Pl 2. 8-9

Kơnràñ Kristo, bơh he, neh dờn bơr jơl tŭs chơ̆t, mơ chơ̆t dơ chikal. Bơh be hơ̆, Yàng neh tơngklŏ Khai, mơ pà Khai in dùl sơnđăn-să lèt rơlau mơ ală sơnđăn-să.

Jơnau Yălniăm: Jn 18. 1 – 19. 42

(Gùng cĭh lăt: Kơnràñ Jesu = KJ; Cau yăl = cy; Làng-bol = lb; Dùl nă = dn)

Bơta kong jê-yăm Kơnràñ Jesu Kristo dê jăt Joan.

cy:Tŭ hơ̆, Kơnràñ jesu lĭk-lòt bal mơ bol jăt-dờn Khai dê, tŭs đah ne croh Kedron, tềng hơ̆ geh dùl bă suơn, Kơnràñ mŭt tam hơ̆ mơ bol jăt-dờn Khai dê. Juđa, cau jào Kơnràñ, krung gĭt tiah hơ̆, tài bơh Kơnràñ Jesu ờs pơrjum tềng hơ̆ bal mơ bol jăt-dờn Khai dê. Be hơ̆, Juđa, tơnơ̆ mơ tŭ neh dờp dùl mpồl ling mơ bol dongbroă bơh dơ bol lơh-yàng dờng mơ bol Phariseo, gen tŭs tềng hơ̆ bal mơ ồs đèng, ồs sơmpòl mơ tà đào. Kơnràñ Jesu gĭt jơh ală bơta rơ̆p tŭs mơ Khai, gen lĭk mơ đơ̆s mơ bol khai: KJ: “Ñcau bol mê jòi taih ?” cy:Bol khai đơ̆s mơ Kơnràñ: lb: “Jesu Nazareth.” cy:Kơnràñ đơ̆s mơ bol khai: KJ: “Añ do!” cy:Juđa, cau jào Kơnràñ, krung ntào bal mơ bol khai. Tŭ Kơnràñ đơ̆s mơ bol khai: “Añ do!”, gen bol khai rŭc wơl mơ gơpừ dơ ù. Be hơ̆, Kơnràñ lùp tai bol khai: KJ: “Ñcau bol mê jòi taih ?” cy:Bol khai đơ̆s: lb:“Jesu Nazareth.” cy:Kơnràñ Jesu hơ wơl: KJ: “Añ neh đơ̆s mơ bol mê: Añ do! Be hơ̆, dilah bol mê jòi Añ, gen lời tĕ bol do lòt”, cy:Làng gơlĭk gơ̆s wil-tơl jơnau Kơnràñ neh đơ̆s: “Ală cau Đi neh ai Añ in, Añ ờ lơh roh cau lơi tam bol khai.” Simon Petro geh đào, neh tă gơ mơ sreh cau duh-broă cau lơh-yàng dờng dê, lơh tăc tồr ma khai dê. Cau duh-broă hơ̆ sơnđăn lah Malko. Kơnràñ Jesu đơ̆s mơ Petro: KJ: “Srồm tĕ đào tam sơmprồm; coàn Bàp neh ai Añ in, Añ ờ hùc ơ ?” cy:Mpồl ling, cau ăt-bồ mơ bol dong-broă bol Juđe dê kŭp Kơnràñ Jesu, căp Khai, mơ lài jơh cèng tŭs hơ Anna; bơh khai lah po-bàp Kaipha, cau lơh-yàng dờng sơnăm hơ̆. Kaipha lah cau neh bơyai mơ bol Juđe: “Kuơ lah dùl nă chơ̆t bơh làng-bol in.” Simon Petro mơ dùl nă cau jăt-dơn ndai jăt Kơnràñ Jesu. Cau jăt-dờn do gĭt cau lơh-yàng dờng mơ neh mŭt bal mơ Kơnràñ Jesu tam hìu-gơlăng cau lơhyàng dờng dê; ai Petro ntào hơ bơdìh mpồng. Be hơ̆, cau jăt-dờn do, lah cau gĭt cau lơh-yàng dờng, đơ̆s mơ ùr kơ̆p mpồng mơ lăm Petro mŭt. Cau ùr duh-broă kơ̆p mpồng đơ̆s mơ Petro: dn: “Mê, mê ờ di sơl tam bol jăt-dờn cau hơ̆ dê ơ ?” cy:Petro đơ̆s: dn: “Ờ di añ!” cy:Tài bơh trồ noăt, bol duh-broă mơ bol dong-broă sing ồs chah mơ ntào njơr ồs; Petro krung ntào njơr ồs bal mơ bol khai. Cau lơh-yàng dờng lùp Kơnràñ Jesu gơrềng bơh bol jăt-dờn mơ jơnau bơto Khai dê. Kơnràñ Jesu hơ wơl mơ khai: KJ: “Añ neh đơ̆s loh-làng dunia in; Añ sùm sùm bơto tam hìu-pơrjum mơ tam hìu duh-khoai, lah anih jơh ală cau Juđe pơrjum bal, mơ Añ ờ đơ̆s chi lơi pồn-ndơ̆p. Ñchi gơlơh ồng lùp Añ ? Lùp tĕ ală cau neh iăt ñchi Añ neh đơ̆s mơ bol khai; bol hơ̆ gĭt ală bơta Añ neh đơ̆s.” cy:Lồc Kơnràñ đơ̆s ală jơnau hơ̆, gen dùl nă tam bol dong-broă ntào tềng hơ̆ pah Kơnràñ mơ đơ̆s: dn: “Mê hơ wơl mơ cau lơh-yàng dờng be hơ̆ ơ ?” cy:Kơnràñ Jesu hơ wơl mơ khai: KJ: “Dilah Añ đơ̆s ờ di, lơh cơng tĕ bơh bơta ờ di hơ̆; ai dilah di, ñchi gơlơh mê lơh Añ taih ?” cy:Anna pơyoa Kơnràñ găm kong căp tŭs hơ Kaipha lah cau lơh-yàng dờng. Ai Simon Petro găm ntào njơr ồs. Be hơ̆, cau lùp khai: dn: “Mê, mê ờ di sơl tam bol jăt-dờn Khai dê ơ ?” cy:Simon Petro pơndăng mơ đơ̆s: dn: “Ờ di añ!” cy:Dùl nă tam bol duh-broă cau lơh-yàng dờng dê, jơi-bơtiàn mơ cau neh Petro sreh tăc tồr, đơ̆s: dn: “Añ neh ờ gŏ mê tam suơn bal mơ Khai ơ ?” cy:Be hơ̆, Petro pơndăng tai; mơ tŭ hơ̆ mơ iăr nrau. Bol khai cèng Kơnràñ Jesu bơh Kaipha tŭs hơ hìu lơh broă cau kuăng dờng dê. Tŭ hơ̆ lah àng drim. Bol khai ờ mŭt tam hìu lơh broă cau kuăng dờng dê, mbài gơtờp bơ̆, mơ ờ geh sa lèh Lòt Găn. Be hơ̆, Pilato lĭk hơ bơdìh mơ bol khai mơ đơ̆s: dn: “Bol mê yă cau do bơh bơta lơi taih ?” cy:Bol khai hơ wơl mơ đơ̆s mơ khai: lb:“Dilah cau do ờ di lah cau lơh bơta iơ̆h, gen bol hi neh ờ jào Khai ồng in.” cy:Be hơ̆, Pilato đơ̆s mơ bol khai: dn: “Bol mê cèng tĕ Khai mơ cahrơña Khai jăt be gùng-boh-lăm bol mê dê!” cy:Bol Juđe đơ̆s mơ Pilato: lb:“Bol hi ờ geh gơsơ̆t cau lơi”, cy:Làng gơlĭk gơsê wil-tơl jơnau Kơnràñ Jesu neh đơ̆s, tŭ sơnđio Khai rơ̆p chơ̆t bơh gùng chơ̆t lơi. Be hơ̆ Pilato mŭt tai tam hìu cahrơña, hòi Kơnràñ Jesu mơ đơ̆s mơ Khai: dn: “Mê lah Bơtau bol Juđe ơ ?” cy:Kơnràñ Jesu hơ wơl: KJ: “Ồng đơ̆s jơnau hơ̆ bơh să tờm ồng, ngolah geh bol ndai neh đơ̆s mơ ồng gơrềng bơh Añ ?” cy:Pilato hơ wơl: dn: “Añ lah cau Juđe ơ ? Làng-bol mê mơ bol lơh-yàng dờng neh jào mê añ in; ñchi mê neh lơh ?” cy:Kơnràñ Jesu hơ wơl: KJ: “Lơgăr Añ ờ gơrê mơ dunia do; dilah lơgăr añ gơrê mơ dunia do, gen bol duhbroă Añ dê neh tam lơh, làng Añ ờ kong jào bol Juđe in; mơya tŭ do lơgăr Añ ờ di tềng do.” cy:Pilato đơ̆s mơ Kơnràñ: dn: “Be hơ̆, mê lah Bơtau ơ ?” cy:Kơnràñ Jesu hơ wơl: KJ: “Ồng đơ̆s hơ̆ Añ lah Bơtau. Tài bơh hơ̆ mơ Añ neh lĭk-lìng, mơ tài bơh hơ̆ mơ Añ neh tŭs tam dunia, làng lơh cơng bơh bơta ngăn-ngồn in; cau lơi gơrê mơ bơta ngăn-ngồn, gen iăt săp Añ.” cy:Pilato đơ̆s mơ Kơnràñ: dn: “Ñchi lah bơta ngăn-ngồn ?” cy:Lồc đơ̆s jơnau hơ̆, Pilato lĭk tai mơ bol Juđe mơ đơ̆s mơ bol khai: dn: “Añ ờ gŏ chi lơi tìs tam cau do. Mơya bol mê geh bơta ờs-mờng lah añ hồ dùl nă cau bol mê in tam lèh Lòt Găn; be hơ̆, bol mê kờñ añ hồ bol mê in Bơtau bol Juđe ờ ?” cy:Bol khai nggà đơ̆s tai: lb:“Ờ di cau do, mơya Barabba!” cy:Barabba lah cau thừ-blơ̆. Tŭ hơ̆, Pilato sồr cèng Kơnràñ Jesu mơ pù lơh. Bol ling tàñ dùl nơm gơnoàr mơ lò, ơn dơ bồ Khai mơ tơnwăr Khai in dùl nơm ào phồng; bol khai tŭs hơ Khai mơ đơ̆s: lb:Niăm-să Bơtau bol Juđe!” cy:Mơ pah Khai. Pilato lĭk tai hơ bơdìh mơ đơ̆s mơ bol Juđe: dn: “Do añ cèng Khai hơ bơdìh bol mê in, làng bol mê gĭt lah añ ờ gŏ jơnau tìs lơi tam Khai.” cy:Be hơ̆, Kơnràñ Jesu lĭk hơ bơdìh, groă gơnoàr lò mơ wăr ào phồng. Pilato đơ̆s mơ bol khai: dn: “Do lah cau!” cy:Tŭ gŏ Kơnràñ, bol lơh-yàng dờng mơ bol dong-broă nggà đơ̆s: lb:“Tơ̆s tĕ dơ chikal, tơ̆s tĕ dơ chikal!” cy:Pilato đơ̆s mơ bol khai: dn: “Bol mê cèng tĕ Khai mơ tơ̆s tĕ dơ chikal; kơyoa añ ờ gŏ jơnau tìs tam Khai.” cy:Bol Juđe hơ wơl mơ Pilato: lb:“Bol hi geh gùng-boh-lăm, mơ jăt be gùng-boh-lăm gen Khai pal chơ̆t, tài bơh Khai neh lơh să tờm lah Kòn Yàng dê.” cy:Tŭ kơno jơnau hơ̆, gen Pilato sơlơ ngòt, khai mŭt tai tam hìu cahrơña mơ đơ̆s mơ Kơnràñ Jesu: dn: “Mbơh mê tŭs ?” cy:Mơya Kơnràñ Jesu ờ hơ wơl chi lơi mơ khai. Be hơ̆, Pilato đơ̆s mơ Kơnràñ: dn: “Mê ờ đơ̆s mơ añ ơ ? Mê ờ gĭt lah añ geh gơnoăr hồ mê mơ geh gơnoăr tơ̆s mê dơ chikal ơ ?” cy:Kơnràñ Jesu hơ wơl: KJ: “Ồng ờ geh gơnoăr lơi gơwèt mơ Añ, dilah gơ ờ geh ai ồng in bơh hơ đăng; gen tàng, cau jào Añ ồng in, gen geh tìs dờng rơlau. Bơh nhơ̆, Pilato jòi gùng hồ Kơnràñ; mơya bol Juđe nggà đơ̆s: lb:Dilah ồng hồ cau do, gen ồng ờ di lah bơyô Sesare dê! Cau lơi lơh să tờm lah bơtau, gen tam dră mơ Sesare.” cy:Tŭ kơno ală jơnau hơ̆, Pilato cèng Kơnràñ hơ bơdìh mơ nggui dơ sơbàn cahrơña, tam anih hòi lah Lithostrotos, dà Hebrơ lah Gabbatha. Hơ̆ lah Ngai Rơcăng lèh Lòt Găn, pơgăp jiờ dơ̆ prau. Pilato đơ̆s mơ bol Juđe: dn: “Do lah bơtau bol mê dê!” cy:Bol khai nggà: lb:“Cèng tĕ, cèng tĕ, tơ̆s tĕ Khai dơ chikal!” cy:Pilato đơ̆s mơ bol khai: dn: “Añ tơ̆s bơtau bol mê dơ chikal ơ ?” cy:Bol lơh-yàng dờng hơ wơl: lb:“Bol hi ờ geh bơtau lơi, mìng Sesare lơm.” cy:Tŭ hơ̆, Pilato jào Kơnràñ bol khai in làng tơ̆s dơ chikal.

Be hơ̆, bol khai cèng Kơnràñ Jesu lòt. Kơnràñ tui chikal Khai dê, lĭk-lòt tŭs hơ tiah hòi lah tiah Kơndoh Bồ, dà Hebrơ hòi lah Golgotha, tềng hơ̆, bol khai tơ̆s Kơnràñ dơ chikal, mơ bàr nă ndai bal mơ Khai, dùl nă dùl đah, ai Kơnràñ Jesu tam gùl. Pilato sồr cĭh dùl păng mpàn mơ ơn hơ đăng chikal; gơ cĭh lah: “Jesu Nazareth, Bơtau bol Juđe.” Rà cau tam bol Juđe neh đăl păng mpàn hơ̆, tài bơh tiah Kơnràñ Jesu kong tơ̆s dơ chikal rềp mơ bòn dờng; mơ gơ cĭh dà Hebrơ, dà Latin mơ dà Grek. Be hơ̆, bol lơh-yàng dờng bol Juđe dê đơ̆s mơ Pilato: dn: “Bañ cĭh: Bơtau bol Juđe, mơya cĭh: Khai neh đơ̆s: “Añ lah Bơtau bol Juđe.” cy:Pilato hơ wơl: dn: “Jơnau añ neh cĭh, gen neh cĭh!” cy:Lồc tơ̆s Kơnràñ Jesu dơ chikal, bol ling ai ào Kơnràñ dê mơ lơh gơ̆s poăn bơnah, dùl nă dùl bơnah, mơ bol khai krung ai ào jrùh tai. Ào jrùh do ờ geh gùng ntir, tàñ drài dùl blah bơh hơ đăng tŭs hơ đơm. Be hơ̆, bol khai đơ̆s ndring gơ̆p: dn:“Bol he bañ crè gơ, mơya tă khà tĕ làng sền cau lơi geh” cy: Làng gơlĭk gơ̆s wil-tơl jơnau Sră Goh đơ̆s: “Bol khai neh tam pà ào Añ, mơ neh tă khà ào jrùh Añ.” Bol ling neh lơh ală bơta hơ̆. Ntào rềp dơ chikal Kơnràñ Jesu dê geh mè Khai mơ kơnùr mè Khai lah Maria, bau Kleopa, mơ Maria Magdala. Tŭ Kơnràñ Jesu gŏ mè mơ cau jăt-dờn Kơnràñ gơboh ntào rềp, gen đơ̆s mơ mè: KJ: “Ơ mò, do lah kòn ai.” cy: Lồc gen, Khai đơ̆s mơ cau jăt-dờn: KJ: “Do lah mè mê.” cy: Mơ bơh jiờ hơ̆, cau jăt-dờn rò mè rê tam hìu khai dê. Tơnơ̆ hơ̆, Kơnràñ Jesu gĭt lah jơh ală bơta neh sir rau, làng jơnau Sră Goh gơlĭk gơ̆s wil-tơl, gen Khai đơ̆s: KJ: “Añ tơhìr.” cy: Geh dùl nơm gri bềng dà sràt ơn tềng hơ̆; be hơ̆, bol khai ai dùl nơm phan nsồp iŭ bềng dà sràt, pùt dơ chi đìng, tong dơ bơr Kơnràñ. Tŭ neh liăp dà sràt, Kơnràñ Jesu đơs: KJ: “Neh sir rau!” cy: Mơ Khai kun bồ, jào nhơm.

(Cùn kơltăng, ơm momŏ dùl thoa.)

cy: Bơh lah ngai Rơcăng Lài, làng ală bồc ờ găm tai dơ chikal tam ngai sabbat, kơyoa ngai sabbat hơ̆ lah ngai dờng, tàng bol Juđe dăn mơ Pilato ai pờng pă ală ntìng kơrgòs bol kong tơ̆s mơ tơmù bol khai. Be hơ̆, bol ling tŭs mơ pờng pă ală ntìng kơrgòs cau sơnrờp mơ cau ne kong tơ̆s dơ chikal bal mơ Kơnràñ; tŭ bol khai tŭs hơ Kơnràñ Jesu, gŏ Khai neh chơ̆t rau, gen bol khai ờ pờng pă ală ntìng kơrgòs Khai dê, mơya dùl nă tam bol ling ai tà srơ̆p dơ wĕ Khai dê, gen gơlĭk mơ mhàm mơ dà. Cau sền gŏ, neh lơh cơng, mơ cơng khai dê ngăn-ngồn, mơ khai gĭt lah khai đơ̆s ngăn-ngồn, làng bol mê krung pindờn. Ală bơta do neh gơlĭk gơ̆s, làng Sră Goh gơlĭk gơ̆s wil-tơl: “Ờ dùl nơm ntìng lơi Khai dê rơ̆p kong pă”, mơ jơnau ndai tam Sră Goh đơ̆s: “Bol khai rơ̆p sền dơ cau bol khai neh srơ̆p bluh.”

Tơnơ̆ hơ̆, Joseph, cau Arimathea, lah cau jăt-dờn Kơnràñ Jesu dê, mơya ndơ̆p bơh ngòt bol Juđe, dăn mơ Pilato tă bồc Kơnràñ Jesu; mơ Pilato ai. Be hơ̆, khai tŭs mơ tă bồc Kơnràñ. Nikođemo lah cau lài-òr neh tŭs mơ Kơnràñ tam trồ măng, krung tŭs mơ cèng pơgăp dùl rơhiăng kĭ cài trŭ pơrlŭ bal mơ kơlhô. Be hơ̆, bol khai ai bồc Kơnràñ Jesu, pò mơ biài che dơmai lơbơn bal mơ sơnơm bơlhu, jăt bơta ờs-mờng tơ̆p bồc bol Juđe dê. Tam tiah Kơnràñ kong tơ̆s dơ chikal geh dùl bă suơn, mơ tam suơn geh dùl nơm bơtô bồc pa, tam hơ̆ ờ hềt ơn cau lơi. Be hơ̆, tài bơh lah ngai Rơcăng Lài bol Juđe dê, mơ bơh bơtô bồc gơ rềp, tàng bol khai ơn Kơnràñ Jesu tam hơ̆.

Hơ̆ jơnau đơ̆s Kơnràñ dê.