Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Mt 7, 21.24-27
Đăl tam Jơnau Yălniăm niămgoh jăt Mattheo.
21 Ờ di jơh ală cau lơi đơs mơ Añ: ‘‘Ơ Kơnràñ, ơ Kơnràñ”, gen rơp geh mut tam lơgar trồ, mơya mìng cau lơi lơh jăt nùs-kờñ Bàp Añ dê, Bơtau ơm tam trồ lơm.
24 Be hơ̆, cau lơi iăt ală jơnau đơs Añ dê do mơ lơh jăt, gen krung ndrờm be cau jăk-chài neh băc hìu khai hơđăng lŭ. 25 Mìu dùh, dà tih, càl khồm druh dơ hìu hơ̆, gen gơ krung ờ tơrlah; bơh neh geh băc hơđăng lŭ.
26 Ai cau lơi iăt ală jơnau đơs Añ dê do mơ ờ lơh jăt, gen krung ndrờm be cau brơngơl-gơla neh băc hìu khai hơđăng bràs. 27 Mìu dùh, dà tih, càl khồm druh dơ hìu hơ̆, gen gơ tơrlah, mơ gơ tơrlah-tơrlơm oă ngăn.”
Hơ̆ jơnau đơ̆s Kơnràñ dê.
