Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Ll 12. 1-8, 11-14
Jơnau-sồr gơrềng bơh bơta sa Lòt Găn.
Đăl tam sră Lĭk-lòt.
Tam ală ngai hơ̆, Kơnràñ đơ̆s mơ Moise mơ Aaron tam lơgăr Ejypto be do: Kơnhai do bol mê di kờp gơ̆s kơnhai bồ sơnăm, kơnhai dùl. Đơ̆s tĕ mơ jơh mpồl pơrjum oh kòn Israel be do: Jơ̆t ngai kơnhai do, tơl nă di kŭp dùl nơm belàt kòn, dùl hìu-bơnhă dùl nơm. Dilah hìu bơnhă dŭt cau, ờ rơgơi sa jơh dùl nơm belàt, gen di jà cau ơm rềp tŭs hìu làng tơl cau sa jơh dùl nơm belàt. Belàt hơ̆ ờ geh tềlsồt lơi, pal lah kòn dăm, neh dùl năm. Dilah kŭp be kòn krung di lơh be hơ̆ sơl. Gen di lời tềm tŭs jơ̆t poăn ngai kơnhai do, lồc gen, di tŭ rơyơm mho, jơh mpồl pơrjum oh kòn Israel rơ̆p gơsơ̆t gơ, ai mhàm gơ bong dơ bơr mpồng ală hìu geh sa poăc belàt. Măng hơ̆ rơ̆p sa poăc buh mơ bañ ờ kañ mơ biăp bơtăng. Di sa be do: Pal kơ̆t bŭt, jơng cù khŏ-drĕp, tê ăt gai jra mơ sa sơrbăc-sơrbăng. Bơh ngai hơ̆ gơ̆s ngai Lòt Găn Kơnràñ dê. Măng hơ̆ Añ rơ̆p Lòt Găn lơgăr Ejypto, rơ̆p tơnchơ̆t jơh ală kòn tơnhoa tam lơgăr Ejypto, bơh kòn-bơnŭs tŭs jơh jơi-phan, mơ Añ rơ̆p lơh glài ală huềng lơgăr Ejypto. Bơh Añ gơ̆s Yàng. Mhàm bong hơ đăng hìu bol mê ơm, rơ̆p gơ̆s tềl-sơnđio, mơ tŭ gŏ mhàm, Añ rơ̆p lòt găn mơ hồ-lời bol mê in, mơ bol mê rơ̆p ờ kong bơta bơrniăng tơniơ̆h tŭ Añ lơh glài lơgăr Ejypto. Bol mê kah tĕ ngai hơ̆, lơh lèh kah-kơlôi, mơ pal gờm ngai hơ̆ dờng-rơyŭ duhadăt Yàng. Bol mê rơ̆p bơtào lèh do làng gờm sùm bơh rài tòm rài.
Hơ̆ jơnau đơ̆s Kơnràñ dê.
Nrĭ-nrềng: 115. 12-13, 15-16bc, 17-18
Hw: Coàn yălniăm gơ̆s bơta geh bơnah bal mơ mhàm Kơnràñ Kristo dê.
Ñchi añ ai pơdơng wơl Kơnràñ in, làng săl wơl ală bơta Khai neh pà añ in taih ? Añ rơ̆p dờp coan tơngklàs, mơ añ rơ̆p hòi-dăn sơnđăn Kơnràñ. Hw
Màng-rơyŭ ngăn dơ đăp măt Kơnràñ lah bơta chơ̆t ală cau niămgoh Khai dê. Añ gơ̆s cau duh-broă Khai dê, gơ̆s kòn klau kòn ùr cau duh-broă Khai dê, Khai neh trơkă pă che srĕng añ in. Hw
Añ rơ̆p pồ-pơdơng bơr jờngrơ gơ̆s phan lơh-yàng, mơ añ rơ̆p hòi-dăn sơnđăn Kơnràñ. Añ rơ̆p prăp wil-tơl bơr răc-dăn mơ Kơnràñ, Dơ đăp măt jơh mơ làng-bol Khai dê. Hw
Bơta đăl bàr: 1 Kr 11. 23-26
Pah dơ̆ oh mi sa mơ hùc, oh mi yăl-pơnrơ broă Kơnràñ kong chơ̆t.
Đăl tam sră dùl Paulo, cau Dờp-pơyoa bơtoăh, pơyoa bol Korinto in.
Ơ oh mi kờñ-gơboh, ai añ, añ neh wă-dờp bơh Kơnràñ bơta mơ añ neh pơdờn wơl oh mi in, lah Kơnràñ Jesu, tam măng kong jào, Khai ai bañ mơ ưnngài, pĕ gơ mơ đơ̆s: “Bol kòn dờp mơ sa tĕ, do lah Să Añ dê, rơ̆p kong jào tài bơh bol kòn, bol kòn lơh tĕ broă do làng kah-kơlôi Añ”. Krung ndrờm be hơ̆ sơl, neh lồc sa rau, Khai ai coàn, mơ đơ̆s: “Coàn do gơ̆s bơta tam bơrkoăt pa tam Mhàm Añ, pah dơ̆ bol kòn hùc, bol kòn lơh tĕ broă do làng kah-kơlôi Añ.” Bơh pah dơ̆ oh mi sa bañ mơ hùc coàn do, oh mi lơh pơnrơ broă Kơnràñ kong chơ̆t, jơl tŭs tŭ Khai tŭs wơl.
Hơ̆ jơnau đơ̆s Kơnràñ dê.
Jơnau đăl lài Jơnau Yălniăm: Jn 13. 34
Kơnràñ đơ̆s: Añ pà bol kòn in dùl jơnau bơtăn pa, lah bol kòn tam gơboh tĕ bal, be Añ neh gơboh mơ bol kòn.
Jơnau Yălniăm: Jn 13. 1-15
Khai gơboh mơ bol khai tŭs lồi-dŭt.
Đăl tam Jơnau Yălniăm niămgoh jăt Joan.
Lài mơ lèh Lòt Găn, Kơnràñ Jesu gĭt lah jiờ Khai dê neh tŭs, Khai pal lòt găn bơh dunia do tŭs hơ Bàp; bơh neh gơboh mơ bol cau Khaid ê găm ơm tam dunia, Khai gơboh mơ bol khai tŭs lồi-dŭt. Tam tŭ sào mho, tŭ cà neh ơn tam nùs Juđa, kòn Simon Iskariot, jơnau jào Khai; mơ gĭt lah Bàp neh pà jơh ală bơta tam tê Khai, mơ Khai neh lĭk bơh Yàng, mơ Khai lòt tŭs hơ Yàng, gen tŭ găm sào, Khai ñă-ntào, hồ ào, ai chèo kơ̆t dơ bŭt. Lồc gen, Khai tuh dà tam thù- bàk, sơntờm rào jơng bol jăt-dờn, mơ jùt mơ chèo kơ̆t bŭt. Be hơ̆, Khai tŭs hơ Simon Petro. Simon Petro đơ̆s mơ Khai: “Ơ Kơnràñ, Đi rào jơng kòn in ơ ?” Kơnràñ Jesu hơ wơl mơ đơ̆s mơ khai: “Bơta Añ lơh, tŭ do kòn ờ gĭt, mơya hìngnau kòn rơ̆p gĭt.” Petro đơ̆s mơ Khai: “Ờ tŭ lơi Đi rơ̆p rào jơng kòn in!” Kơnràñ Jesu hơ wơl mơ khai: “Dilah Añ ờ rào jơng kòn, kòn ờ geh bơnah bal mơ Añ.” Simon Petro đơ̆s mơ Khai: “Ơ Kơnràñ, ờ di mìng jơng kòn lơm, mơya jơh tê mơ bồ tai!” Kơnràñ Jesu đơ̆s mơ khai: “Cau lơi neh um, gen ờ càng, mìng rào jơng lơm, bơh geh goh jơh; bol kòn neh goh, mơya ờ di jơh ală.” Tài bơh Kơnràñ gĭt cau lơi rơ̆p jào Khai, tàng Khai đơ̆s: “Ờ di jơh ală bol kòn goh.” Be hơ̆, tơnơ̆ mơ tŭ rào jơng bol khai, Kơnràñ soh ào, ơm wơl dơ cơnờng sào, mơ đơ̆s mơ bol khai: “Bol kòn gĭt bơta Añ neh lơh bol kòn in ờ ? Bol kòn hòi Añ: “Ơ Pôgru” mơ: “Ơ Kơnràñ”, mơ bol kòn đơ̆s di ngăn; kơyoa Añ lah be hơ̆. Be hơ̆, dilah Añ lah Kơnràñ mơ Pôgru, neh rào jơng bol kòn, gen bol kòn pal tam rào jơng bal. Kơyoa Añ neh lơh krơh bol kòn in, làng bol kòn krung lơh be Añ neh lơh bol kòn in.
Hơ̆ jơnau đơ̆s Kơnràñ dê.
