Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta đăl dùl: Is 61. 1-3a, 6a, 8b-9
Kơnràñ neh bong jiờu añ in, Khai neh sồr añ cèng Jơnau Yălniăm cau rơbah in, pùt-sơm ală nhơm nùs jê-yăn.
Đăl tam sră Isaia, cau ala-bơr dê.
Nhơm Kơnràñ dê ơm hơ đăng añ: Bơh Kơnràñ neh bong jiờu añ in; Khai neh sồr añ cèng Jơnau Yălniăm cau rơbah in, pùt-sơm bol nhơm-nùs jê-yăn in, yăl jơnau toh-glài bol cau kong ơm ngài in, hồ-klàs bol cau kong jàm in, yăl-tơlĭk sơnăm hàng-goh Yàng dê, mơ ngai sal-tê Yàng he dê; pơndờm-pơnđiăng ală cau moăt-jrùng in, cèng cau jê-yăn in tam Sion sơgơn ala ù-mbuh, jiờu chờhờp ala moăt-chơ̆t, ào rơhờn ala nhơm-nùs kơlôi moăt. Găm bol mê, bol mê rơ̆p geh hòi lah cau kơiơng-yàng Kơnràñ dê, lah cau boh-tê Yàng he dê. Añ rơ̆p dờn-song pà-jờng bol khai in, rơ̆p bơtào-gơ̆s mơ bol khai dùl bơta tam bơrkoăt gơ̆s sùm. Jơi-nòi bol khai rơ̆p geh pơnrơ sơnđăn tam gùl ală làng-bol, jơi-bơtiàn bol khai rơ̆p geh gĭt tam gùl ală làng-bol. Jơh ală cau lơi gŏ bol khai, gen đăl gĭt lơm bol khai lah jơi-nòi geh Kơnràñ yălniăm.
Hơ̆ jơnau đơ̆s Kơnràñ dê.
Nrĭ-nrềng: 88. 21-22, 25 mơ 27
Hw: Ơ Kơnràñ, kòn rơ̆p yăl jờng nùs gơboh Đi dê jơl ală rài.
Añ neh jòi bàn Đavit, cau duh-broă Añ, Añ neh bong jiờu niămgoh bơtào khai in, làng Añ sùm gràng-gàr khai, mơ tê Añ dong khai thăng-noàn. Hw
Dờn-song mơ hàng-goh Añ dê ơm sùm mơ khai, mơ bơh sơnđăn Añ, bơta pràn khai dê gơ guh tai sùm. Khai tờm rơ̆p hòi Añ: Kơnràñ gơ̆s Bàp añ, gơ̆s Yàng mơ bơnơm lŭ tơngklàs añ. Hw
Bơta đăl bàr: Pt 1. 5-8
Khai neh lơh he in gơjềng lơgăr-bơtau mơ cau kơiơng-yàng Yàng dê, Bàp Khai dê.
Đăl tam sră Pờ-tơlĭk dê.
Wờl-kờñ oh mi in geh bơta hàng-goh mơ bơta ring-lơngai Kơnràñ Jesu Kristo dê, gơ̆s cau cơng dờn-song, gơ̆s kòn tơnhoa cau chơ̆t dê, gơ̆s cau ăt-bồ ală bơtau dunia dê, gơ̆s Bơtau neh gơboh mơ he, Khai neh ngui mhàm Khai dê mơ rào he kloh ală tìs-glài, mơ neh lơh he in gơjềng lơgăr-bơtau mơ cau kơiơngyàng Yàng dê, Bàp Khai dê. Wờl-kờñ Khai in geh gơklŏ mơ pràn-gơnoăr jơl ală rài. Amen. Ne, Khai tŭs tam mhoal, ală măt rơ̆p sền gŏ Khai, mơ jơh ală cau neh srơ̆p Khai krung sền gŏ Khai sơl, ală jơi-nòi hơ đăng plai ù rơ̆p ñìm-răc Khai. Ngăn be hơ̆. Amen.
Kơnràñ gơ̆s Yàng, Bơtau găm gơ̆s, neh gơ̆s mơ rơ̆p tŭs, gơ̆s Bơtau Tờm Gơnrơh yăl: “Añ gơ̆s Alpha mơ Omega, gơ̆s sơntờm mơ lồi-dŭt.”
Hơ̆ jơnau đơ̆s Kơnràñ dê.
Jơnau đăl lài Jơnau Yălniăm: Is 61. 1
Nhơm Kơnràñ dê ơm hơ đăng añ, sồr añ cèng Jơnau Yălniăm cau rơbah in.
Jơnau Yălniăm: Lk 4. 16-21
Nhơm Kơnràñ dê hơ đăng añ, tài bơh Khai neh bong jiờu añ in.
Đăl tam Jơnau Yălniăm niămgoh jăt Luka.
Tŭ hơ̆, Kơnràñ Jesu tŭs tam Nazareth, tềng hơ̆ Khai neh geh siăm-ròng, mơ jăt be bơta ờs-mờng Khai dê, ngai sabbat Khai mŭt tam hìu-pơrjum, mơ ñă- ntào đăl sră. Cau jào Khai in sră Isaia, cau ala-bơr; mơ tŭ pờ sră, Khai gŏ păng tềng hơ̆ neh geh cĭh: “Nhơm Kơnràñ dê hơ đăng añ; tài bơh Khai neh bong jiờu añ in, pơyoa añ yăl Jơnau Yălniăm bol rơbah in, yăl-pơnrơ bơta hồ-lời bol kong jàm in, bơta àng măt bol jơngo in, ai bol kong rồn-bơklơn in geh khăt-gơboh, yălpơnrơ sơnăm hàng-goh Kơnràñ dê.” Kơnràñ dơ̆p sră, jào wơl dơ cau dong-broă mơ nggui; mơ măt jơh ală cau tam hìu-pơrjum wèt hơ Khai. Kơnràñ sơntờm đơ̆s mơ bol khai: “Ngai do, jơnau Sră Goh do dơ tồr bol mê neh gơlĭk gơ̆s di ngăn.”
Hơ̆ jơnau đơ̆s Kơnràñ dê.
