Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Yălniăm Lk 13, 1-9
Đăl tam Jơnau Yălniăm niămgoh jăt Luka
Dilah ờ ềng-màl, gen rơp roh-rui jơh
13 * 1 Tam tŭ hơ̆, geh bàr pe nă cau tus yal wơl Kơnràñ in gơrềng bơh bol Galilea, mơ Pilato neh pơrlŭ mhàm bol khai bal mơ ală phan lơh-yàng bol khai dê. 2 Hơ wơl, Kơnràñ đơs mơ bol khai: ‘‘Bol mê tồn lah bol Galilea do lah bol cau tìs rơlau mơ jơh ală cau Galilea, tài bơh bol khai neh kong be hơ̆ ơ ? 3 Añ đơs mơ bol mê, ờ di, mơya dilah bol mê ờ ềng-màl, gen jơh ală bol mê rơp roh-rui ndrờm be hơ̆ sơl. 4 Ngŏlah jơt phàm nă cau ne kong gơlăng tam Siloe tơrlah hơđăng, mơ gơklơn chơt, bol mê tồn lah bol khai lah bol cau dồs rơlau mơ jơh ală cau ơm tam Jerusalem ơ ? 5 Añ đơs mơ bol mê, ờ di, mơya dilah bol mê ờ ềng-màl, gen jơh ală bol mê rơp roh-rui ndrờm be hơ̆ sơl.”
Jơnau pơniơu tờm chi bal ờ gơlik plai
* 6 Kơnràñ đơs jơnau pơniơu do: ‘‘Cau ne geh tờm chi bal tăm tam suơn ño khai dê, khai tus jòi plai dơ gơ mơ ờ gŏ. 7 Khai đơs mơ cau lơh suơn ño: ‘‘Do neh pe sơnăm rau, añ tus jòi plai dơ tờm chi bal do mơ ờ gŏ. Be hơ̆, kơl tĕ gơ. Ñchi bơh tài lời gơ sa rề ù taih ?” 8 Mơya cau lơh suơn ño hơ wơl mơ đơs mơ khai: ‘‘Ơ ồng, dăn lời gơ sơnăm do tai, añ rơp tờ gùt dar gơ mơ ơn chi pơnđồm, 9 digơlăn hìngnau gơlik plai; dilah ờ gen ồng rơp kơl gơ.”‘‘
Hơ̆ jơnau đơ̆s Kơnràñ dê.
